បន្ទាប់ពីបានស្ងប់ស្ងាត់មួយរយៈកន្លងទៅនេះបច្ចុប្បន្ននៅខេត្តសៀមរាបគេសង្កេតឃើញថាសកម្មភាពដឹកជញ្ជូនឈើគ្រប់ប្រភេទកំពុងតែកម្រើកសារជាថ្មីឡើងវិញជាពិសេសការដឹកជញ្ជូនឈើក្រញូងបាននឹងកំពុងតែចាប់ផ្ដើមផងដែរ។
តាមសេចក្ដីរាយការណ៍បានឲ្យដឹងថា សកម្មភាពចរាចរណ៍ដឹកជញ្ជូនឈើក្រញូងនោះគឺបានកើតមានជាងមួយអាទិត្យមកហើយនៅខេត្តសៀមរាបដែលសកម្មភាពទាំងនោះដឹកចេញពីតំបន់ច្រកអូស្មាច់ខេត្តឧត្តរមានជ័យឆ្លងកាត់ផ្លូវលេខ៦៨នៃភូមិសាស្ត្រស្រុកក្រឡាញ់ខេត្តសៀមរាបឆ្ពោះទៅកាន់ខេត្តបន្ទាយមានជ័យ។
ដោយឡែកសកម្មភាពដឹកជញ្ជូនឈើក្រញូងចេញពីស្រុកអន្លង់វែងឆ្ពោះមកខេត្តសៀមរាបតាមផ្លូវលេខ៦៧វិញក៍មិនចាញ់ផ្លូវ៦៨ដែរពោលគឺសកម្មភាពរបស់ក្រុមឈ្មួញទាំងនោះបានធ្វើការដឹកជញ្ជូនដោយរថយន្តសេរីទំនើបៗមានដូចជាលុចស៊ិស កាមរីបានឡែន ហាយព្រិទ ហាយលិនឌែនិងរថយន្តសេរីខ្ពស់ៗជាច្រើនទៀត។
សេចក្ដីរាយការណ៍បន្ថែមថារាល់ការដឹកជញ្ជូនឈើក្រញូងរបស់ក្រុមឈ្មួញងងឹតទាំងអស់នៅផ្លូវលេខ៦៨នឹង៦៧គឺបានទំនាក់ទំនងបង់ថ្លៃសេវាការពារឲ្យក្រុមសមត្ថកិច្ចពាក់ព័ន្ទដែលមានតួនាទីបង្ក្រាបទាំងអស់ទើបអាចដំណើរការបានរលូនដូចពាក្សចាស់លោកពោលថា(អាសាច់ជូនខ្លា)ទើបនៅស្រុកបាន។
សមត្ថកិច្ចមួយរូបបានបង្ហើបសូមមិនបញ្ចេញឈ្មោះថាបទល្មើសការដឹកជញ្ជូនឈើក្រញូងដែលកើតមាននៅខេត្តសៀមរាបតាមផ្លូវលេខ៦៧នឹង៦៨នោះសុទ្ធតែបានទាក់ទងជាមួយសមត្ថកិច្ចពាក់ព័ន្ទដូចជាមេព្រៃ ប៉ូលិស ប៉េអឹម ឌឺបេ និងចារកិច្ចផងដែរទើបអាចធ្វើសកម្មភាពដឹកជញ្ជូនដោយមិនមានការបង្ក្រាបតាមបទបញ្ជារថ្នាក់លើ។
ជាក់ស្ដែងកាលពីម៉ោងប្រហែល១០យប់ថ្ងៃទី២៥ ឆ្នាំ២០១៤នៅផ្លូវលេខ៦៧ មានការដឹកជញ្ជូនឈើក្រញូងតាមរថយន្តបាឡែនជាច្រើនគ្រឿងសំដៅចូលមកក្រុងសៀមរាបដោយមិនមានការទប់ស្កាត់បង្ក្រាបពីសំណាក់ជំនាញពាក់ព័ន្ទនោះឡើយបើទោះបីជាសមត្ថកិច្ចពាក់ព័ន្ទទាំងនោះបានបោះទីតាំងឈរជើងបណ្ដាក់គ្នារដូចខ្យងក៍ដោយ គឺបានត្រឹមតែដេករាប់ក្បាលឡានយកលុយតែប៉ុណ្ណោះ។
មិនត្រឹមតែសមត្ថកិច្ចមិនបានធ្វើការទប់ស្កាត់បង្ក្រាបបទល្មើសដែលដឹកជញ្ជូនឆ្លងកាត់ក្រសែភ្នែកតែប៉ុណ្ណោះទេ ថែមទាំងជួយរត់ការនឹងកាងឲ្យក្រុមឈ្មួញទុច្ចរិតដឹកជញ្ជូនឈើដោយខុសច្បាប់បានដោយសុវត្ថិភាព បើទោះបីជាមានបទបញ្ជារពីតំណាងអយ្យការអមសាលាដំបូងខេត្តសៀមរាបក្ដី ក៏ក្រុមឈ្មួញនិងសមត្ថទាំងនោះហាក់គ្មានការអើពើរកោដក្រែងទាល់តែសោះ។
គួររំលឹកផងដែរថា កាលពីលោក ទី-សុវិនថាល់ ព្រះរាជអាជ្ញាសាលាដំបូងចាស់នៅកាន់ដំណែង លោកធ្លាប់បានចុះបង្ក្រាបបទល្មើសព្រៃឈើយ៉ាងក្តៅគគុគទាំងយប់ទាំងថ្ងៃដោយមិនខ្លាចនឿយហត់ តែបន្ទាប់ពីព្រះរាជអាជ្ញាឡើងថ្មីចូលកាន់តំណែងសកម្មភាពឈ្មួញដឹកឈើខុសច្បាប់ហាក់បានចិត្តរិតធ្វេគ្មានការកោដញញើត ព្រោះក្រុមឈ្មួញនិងសមត្ថកិច្ចទាំងនោះគិតថា លោកព្រះរាជអាជ្ញាឡើងថ្មីមិនទាន់ដឹងរឿង ហើយមិនដែលចុះបង្ក្រាបបទល្មើសដោយផ្ទាល់ទៀតផង។
សកម្មភាពរបស់កងកម្លាំងប្រដាប់អាវុធមួយចំនួនដែលយកឈ្មោះអង្គភាពទៅប្រមូលលុយពីការដឹកជញ្ជូនឈើនឹងកាងឲ្យក្រុមឈ្មួញនោះប្រហែលជាថ្នាក់ដឹកនាំខេត្តសៀមរាបដែលមានលោក ឃឹម-ប៊ុនសុង ជាចៅហ្វាយខេត្ត លោកឧត្តមសេនីយ៍ទោ សត-ណាឌី មេប៉ូលិសខេត្ត លោកឧត្តមសេនីយ៍ ម៉ន-សាម៉ុន មេប៉េអឹមខេត្ត មិនទាន់បានដឹងពីសកម្មភាពនៃការដឹកជញ្ជូនឈើនឹងមន្ត្រីថ្នាក់ក្រោមមួយចំនួនយកតួនាទីទៅធ្វើទង្វើដោយខុសច្បាប់នៅឡើយទេ។
មន្ត្រីរាជការកងកម្លាំងប្រដាប់អាវុធនឹងប្រជាពលរដ្ឋបានទទូចស្នើសុំឲ្យថ្នាក់ដឹកនាំអង្គភាពខេត្តមេត្តាជួយលុបបំបាត់ការដឹកជញ្ជូនឈើដោយខុសច្បាប់រួមជាមួយមន្ត្រីអសកម្មមួយចំនួនដែលមិនបានគោរពទួនាទីរបស់ខ្លួន។ ជាពិសេសសូមលោក កើត-វណ្ណរ៉េត ព្រះរាជអាជ្ញាអមសាលាដំបូងខេត្តសៀមរាប មេត្តាចុះបង្រ្កាបបទល្មើសព្រៃឈើនៅខេត្តសៀមរាបផង ព្រោះមានតែតុលាការចុះផ្ទាល់ទេទើបអាចបង្ក្រាបបទល្មើសព្រៃឈើបានជោគជ័យ បើសង្ឃឹមទៅលើសមត្ថកិច្ច និងមន្ត្រីជំនាញព្រៃឈើច្បាស់ជារលាយព្រៃឈើអស់ជាមិនខាន ដែលទង្វើទាំងនេះផ្ទុយពីអនុសាសន៍របស់រាជរដ្ឋាភិបាលកម្ពុជា៕
.jpg)
.jpg)
.jpg)
.png)
.jpg)
.jpg)
