កងរាជអាវុធហត្ថចាប់ខ្លួនស្រ្តីមុខសញ្ញជួញដូរគ្រឿងញៀននៅក្រុងប៉ោយប៉ែត

កម្លាំងកងរាជអាវុធហត្ថក្រុងប៉ោយប៉ែតបានធ្វើប្រតិបត្តិការ បង្រ្កាបករណីជួញដូរគ្រឿងញៀននៅចំណុចលើទំនប់អូរខៃដន ស្ថិតក្នុងភូមិអូរខៃដន សង្កាត់និម្មិត ក្រុងប៉ោយប៉ែតខេត្តបន្ទាយមានជ័យ នៅវេលាម៉ោង១២និង០០នាទីថ្ងៃទី១៦.០៧.២០១២ ឃាត់ខ្លួនជនសង្ស័យបានម្នាក់និង ដកហូតបានថ្នាំញៀន៥០គ្រាប់បញ្ជូនទៅតុលាការ។

លោកហម-ម៉ុត មេបញ្ជាការ អ ហ ក្រុងប៉ោយប៉ែតបានឲ្យដឹងនៅថ្ងៃទី១៨ខែកក្កដាថាប្រតិបត្តិការ នោះឃាត់ខ្លួនជនសង្ស័យចំនួន០១នាក់គឺឈ្មោះ រ៉េន-សុខជា ភេទស្រីអាយុ២៦ឆ្នាំរស់នៅភូមិវាលហាត់ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។ ព្រមទាំងដកហូតសម្ភារៈវត្ថុតាងរួមមានថ្នាំញៀនមេតំហ្វេតាមីន គ្រាប់ចំនួន៥០គ្រាប់ (ហាសិបគ្រាប់) និងម៉ូតូចំនួន០១គ្រឿង ម៉ាកវ៉េវពណ៌ក្រហមស គ្មានស្លាកលេខ លេខម៉ាស៊ីន MF100PE 0847774 ។

លោកម៉ែន-ភិរម្យ មេបញ្ជាការង អ ហ ខេត្តបន្ទាយមានជ័យបានឲ្យដឹងថា ក្រោយសួរនាំនៅថ្ងៃទី១៧ខែកក្កដាម្សិលមិញនេះជនសង្ស័យរួមជាមួយ វត្ថុតាងត្រូវបានកសាងសំណុំរឿងបញ្ជូនទៅតុលាការចាត់ការតាម និតិវិធីច្បាប់៕