ពលរដ្ឋចោទថាសមត្ថកិច្ច ផាកពិន័យពន្ធផ្លូវលើសពីការសរសេរលើបង្កាន់ដៃ

ប្រជាកសិករ និងអ្នកដឹកទឹកលក់តាមរឺម៉កមួយចំនួននៅខេត្ដសៀមរាប បានរិះគន់មន្ដ្រីពន្ធដារ ដែលបានផាកពិន័យលើគ្រឿងយន្ដកសិកម្មនិងរឺម៉កពួកគេ ដោយសារមន្ដ្រីទាំងនោះមិនបានឲ្យវិក័យប័ត្រ និងសរសេរចំនួនទឹកប្រាក់ពេលផាកពិន័យ។

លោក អែម សាយ នៅភូមិសាសាកំរើក ក្រុងសៀមរាប  ថ្លែងថា មានមន្ដ្រីពន្ធដារ ប៉ូលីស និងកងរាជអាវុធហត្ថ បានដាក់គោលដៅចាំត្រូតពិនិត្យ និងផាកពិន័យលើយានយន្ដដែលល្មើសច្បាប់ ហើយបានឃាត់គោយន្ដថាឡេថងរបស់គាត់ បង្ខំឲ្យបង់លុយចំនួន១២ម៉ឺនរៀល។ កសិកររូបនេះ បន្តថា សមត្ថកិច្ចចោទថា គោយន្ដនោះមិនមានពន្ធផ្លូវ។ លោកថា មន្ដ្រីពន្ធដារបានផាកពិន័យគាត់ដោយមិនសរសេរចំនួនទឹកប្រាក់ក្នុងវិកយប័ត្រ ។

លោក អៀប វិបុល ជាអ្នកដឹកទឹកលក់តាមរឺម៉ក និយាយថា គាត់ត្រូវបានមន្ដ្រីពន្ធដារផាកពិន័យរឺម៉កកញ្ចាស់មួយគ្រៀងចំនួន៣ម៉ឺនរៀល តែដោយសារអត់មានលុយគ្រប់ចំនួនគាត់បានបង់តែចំនួន១៥០០០រៀល ហើយមន្ដ្រីនោះ មិនបានប្រគល់វិក័យឲ្យទេ។

អ្នកយកព័ត៌មានយើងមិនអាចទាក់ទងមន្ដ្រីសមត្ថកិច្ច ដែលរងការចោទប្រកាន់នោះបានទេ ដោយសារពលរដ្ឋមិនស្គាល់ឈ្មោះមន្រ្តីទាំងនោះ។

ប្រធានរដ្ឋបាលពន្ធដារ  លោក ចៅ ម៉ៅមុន្នី មានប្រសាសន៏ថា ការបង់ពន្ធផ្លូវលើគ្រឿងយន្ដកសិកម្ម មានតំលៃថោក ទៅតាមប្រភេទកំលាំងម៉ាស៊ីន។ លោកបញ្ជាក់ថា តាមច្បាប់ត្រូវពិន័យទាំងឆ្នាំចាស់និងឆ្នាំថ្មីដែលមិនបានបង់ ។ លោកថា រីឯស្ទីកឃរ័សម្រាប់សំគាល់ពន្ធផ្លូវត្រាក់ទ័រមិនអាចយកទៅបិទជាប់ គោយន្ដថាឡេថងបានទេ ។

យ៉ាងនេះក្ដី បើតាមបង្កាន់ដៃផាកពិន័យពន្ធផ្លូវ ដែលសរសេរមិនច្បាស់ ដែលចុះហត្ថលេខាដោយ លោក ហន សម្ភស្ស ដែលអ្នកយកព័ត៌មានយើងទទួលបាន បង្ហាញថា ទឹកប្រាក់នោះមានចំនួនតែបីម៉ឺនរៀលប៉ុណ្ណោះ ខុសពីការលើកឡើងរបស់ប្រជាកសិករថា បានបង់លុយពន្ធផ្លូវចំនួន១២ម៉ឺនរៀល។ រីឯប័ណ្ណបង់ពន្ធផ្លូវលើគោយន្តជាប័ណ្ណសម្រាប់ត្រាក់ទ័រមែន។

មន្ដ្រីសម្របសម្រួល បណ្ដាញរួបរួមគណនេយ្យភាពសង្គម នៅអាស៊ីបូព៌ា និងប៉ាស៊ីហ្វិក លោក សនជ័យ មានប្រសាសន៏ថា មន្ដ្រីពន្ធដារដែលទទួលលុយលើសពីចំនួនចុះក្នុងវិក័យប័ត្រ ចាត់ទុកអំពើពុករលួយ ។លោកជម្រុញឲ្យក្រសួងសេដ្ឋកិច្ច សិក្សាឲ្យបានច្បាស់លាស់ ថាតើគ្រឿងចក្រ និងមធ្យោបាយដឹកជញ្ជូនកសិកម្ម មានប៉ុន្មានប្រភេទមាន នៅស្រុកខ្មែរ ដែលត្រូវបង់ពន្ធ ដើម្បី ជៀសវាងមន្ដ្រី ពន្ធដារឆ្លៀតឱកាសពុករលួយ៕ ដោយ៖ បូ សាវី