ក្រុមហ៊ុនចំនួនពីររងការចោទថា រំលោភយកដីជនជាតិភាកតិចគួយ នៅព្រះវិហារ

ប្រជាសហគមន៏ជនជាតិភាគតិចគួយ ប្រមាណ៧០គ្រួសារ នៅស្រុកត្បែងមានជ័យ ខេត្ដព្រះវិហារ ចោទក្រុមហ៊ុនចិនចំនួនពីរ ថាបានឈូសឆាយរំលោភយកដីស្រែចំការពួកគេ ដាំដើមអំពៅ និងដើមអាកាស្យា ។

លោក ផាន់ យ៉េន អះអាងថា ជាតំណាងអ្នកភូមិស្រែព្រាង ឃុំព្រះមេរ័ ស្រុកត្បែងមានជ័យ ប្រាប់អ្នកយកព័ត៌មានយើងថា ដីសហគម៏ជនជាតិភាគតិចគួយ ប្រមាណ៧០គ្រួសារ ដែលកំពុងគាស់កកាយធ្វើស្រែចំការ ត្រូវបានក្រុមហ៊ុនចិន ឈ្មោះរូយ ហ្វេង និងក្រុមហ៊ុន ឈ្មោះ ឡាន ហ្វេង បានឈូសឆាយរំលោភយកដាំដើមអាកាស្យា និងដើមអំពៅ ដោយមេការក្រុមហ៊ុនអះអាងថា មានច្បាប់អនុញ្ញាតិពីរដ្ឋាភិបាល។ តំណាងប្រជាពលរដ្ឋដ៏ដែលបន្ដថា  ដីពួកគាត់ ជាច្រើនហិតា នៅជាប់ព្រំប្រទល់ស្រុកត្បែងមានជ័យ និងស្រុកឆែប ខេត្ដព្រះវិហារ កំពុងប្រឈមនិងការបាត់បង់ បើសិនមិនមានការជួយទប់ស្កាត់ពីអាជ្ញាធរ ។

លោក ផាន់ សុខេន ជាជនជាតិភាគតិចគួយ នៅភូមិស្រែព្រាវ ឲ្យដឹងថា ក្រុមហ៊ុនហ៊ុនចិនទាំងពីរ កំពុងឈូសឆាយដីព្រៃពួកគេជារៀងរាល់ថ្ងៃ។ លោកបន្ដថា ពួកគេកំពុងព្រួយបារម្ភបាត់បង់ដីព្រៃដូនតា ពួកគេដែលធ្លាប់តែអាស្រ័យផល្លានុផលនៅតំបន់នោះ។ លោកថា កន្លងពួកគេមកធ្លាប់ប្ដឹងអភិបាលខេត្ដ និងអភិបាលស្រុកអោយជួយ រកដំណោះស្រាយដែរ ប៉ុន្ដែបានត្រឹមតែសន្យាប៉ុណ្ណោះ។

ទាក់ទងនិងបញ្ហានេះ អ្នកយកព័ត៌មានយើងមិនអាចទាក់ទងក្រុមហ៊ុនទាំងពីរ ដើម្បីបំភ្លឺពីការចោទប្រកាន់នេះបានទេ ។

អភិបាលស្រុកត្បែងមានជ័យលោកប៉ាង យាត មានប្រសាសន៏បដិសេធន៏ថា ក្រុមហ៊ុនមិនបានឈូសឆាយរំលោភយកដីប្រជាពលរដ្ឋទេ តែលោកបញ្ជាក់ថា ពលរដ្ឋធ្លាប់បានរារាំងក្រុមហ៊ុនដែរ ។

ដោយឡែកមេឃុំព្រះម័រ លោក ណែម ថាំង មានប្រសាសន៏ថា ពិតជាមានការឈូសឆាយដីពួកគាត់មែន ដោយសារ មេឃុំអាណាត់មុន បានចុះហត្ថលេខាឲ្យក្រុមហ៊ុនទាំងពីរនោះធ្វើចំការដាំអំពៅនិងដើមអាកាស្យ។ លោកអះអាងថា ក្រុមសហគមន៏ជនជាតិភាគតិចគួយទាំងនោះកំពុងសុំអន្ដរាគមន៏សុំដីសំរាប់ សហគមន៏របស់ពួកគេ មកអាជ្ញាធរឃុំ។

មន្ដ្រីពង្រឹងអំណាចសហគមន៏ នៃមជ្ឍមណ្ឌលសិទ្ធិមនុស្សកម្ពុជា លោក ឈឹម សាវុធ មានប្រសាសន៏កត់សំគាល់ថា តាមច្បាប់ ដីកម្មសិទ្ធិជនជាតិដើមភាគតិចមុនរដ្ឋាភិបាលធ្វើវិសោធនកម្ម មិនអាចមានជនណាម្នាក់រំលោភបំពានបានទេ សូម្បីជនជាតិខ្លួនឯងក៏ពុំមានសិទ្ធិលក់ដូរដែរ ។

កន្លងមករាជរដ្ឋាភិបាលកម្ពុជា បានផ្ដល់ដីព្រៃសប្បទានសេដ្ឋកិច្ច ដល់ក្រុមហ៊ុនឯកជនជាច្រើន ធ្វើការអភិវឌ្ឍន៏ ដើម្បីជួយកាត់បន្ថយភាពក្រីក្រ និងពលរដ្ឋចំណាកស្រុកទៅធ្វើការនៅប្រទេសក្រៅ។ ប៉ុន្ដែការផ្ដល់ដីសម្បទាននេះ ត្រូវបានសង្គមស៊ីវិល អះអាងថា ក្រុមហ៊ុនមួយចំនួននៅស្រុកខ្មែរ មិនបានធ្វើឲប្រជាពលរដ្ឋរីកចំរើននោះទេ មានតែធ្វើឲ្យពួកគេកាន់តែក្រីក្រ និងធ្វើជាកម្មករឲ្យជនបរទេសប៉ុណ្ណោះ។ មន្ដ្រីពង្រឹងអំណាចសហគមន៏នៃមជ្ឍមណ្ឌលសិទ្ធិមនុស្សកម្ពុជា លោក ឈឹម សាវុធ មានប្រសាសន៏បន្ដថា  ការអភិវឌ្ឍន៏នៅតំបន់និមួយៗ ដ៏រាបណាមានការយល់ព្រមទាំងពីរភាគី មានន័យថា ទាំងប្រជាពលរដ្ឋនិងក្រុមហ៊ុនទើបឲ្យពលរដ្ឋមានការរីចំរើន៕ដោយ៖ ប៊ូសាវី