អ្នកភូមិបឹងកក់ និងអ្នកបុរីកីឡាដាក់ញត្តិសុំឲ្យ ស្ថានទូតអាមេរិច ជប៉ុន សហភាពអឺរ៉ុបជួយ

អ្នកភូមិបឹងកក់ និងសហគមន៍បុរីកីឡា ព្រឹកថ្ងៃសុក្រ ទី៧ ខែកញ្ញា ឆ្នាំ២០១២ មានចាស់ មាន ក្មេង បានទៅដាក់ញត្តិ នៅស្ថានទូតអាមេរិក ជប៉ុន និងសហភាពអឺរ៉ុប ព្រមទាំងស្ថានទូតប្រទេស មហាអំណាចមួយចំនួនទៀត ក្នុងរាជធានីភ្នំពេញ ដើម្បីសុំអន្តរាគមន៍ឲ្យអាជ្ញាធរកម្ពុជាដោះលែងស្ត្រីអ្នកបឹងកក់ ម្នាក់ និងអ្នកបុរីកីឡាម្នាក់ចេញពីពន្ធនាគារមកវិញ។

ក្នុងពេលអ្នកភូមិបឹងកក់ និងបុរីកីឡា ប្រមូលផ្តុំដាក់ញត្តិនៅស្ថានទូតនានា នាព្រឹកថ្ងៃទី៧ ខែកញ្ញា ឆ្នាំ២០១២ មិនមានការរារាំង ។អ្នកភូមិបឹងកក់ អ្នកស្រី យ៉ោម បុប្ផា ត្រូវបានតុលាការសម្រេចឃុំខ្លួន ពីបទ ប្រើអំពើហិង្សាដោយចេតនា វាយលើបុរសពីរនាក់ កាលពីថ្ងៃ៤ ខែកញ្ញា ឆ្នាំ២០១២។ ចំណែកអ្នកតវ៉ាដីធ្លីម្នាក់ទៀតនៅបុរីកីឡា គឺអ្នកស្រី ទឹម សាក់មុន្នី  ក៏ត្រូវបានតុលាការក្រុងភ្នំពេញ សម្រេចឃុំខ្លួនកាលពីព្រឹកថ្ងៃទី៥ ខែកញ្ញា ឆ្នាំ២០១២៣ តាមពាក្យបណ្តឹងរបស់ក្រុមហ៊ុន ផានអ៊ីម៉ិច ពីបទញុះញង់ឲ្យប្រព្រឹត្តបទឧក្រិដ្ឋ។

កាលពីថ្ងៃទី៦ ខែកញ្ញា ឆ្នាំ២០១២ អង្គការសង្គមស៊ីវិល និងអង្គការសិទ្ធិមនុស្សជាច្រើន បានចេញសេចក្ដីថ្លែងការណ៍ដាច់ដោយឡែកពីគ្នាជាបន្តបន្ទាប់ ដោយថ្កោលទោសនឹងការចាប់ខ្លួនស្ត្រីអ្នកភូមិបឹងកក់ និងបុរីកីឡាទាំងពីរ ហើយបានទាមទារឲ្យដោះលែងស្ត្រីទាំងពីរនាក់ជាបន្ទាន់ និងគ្មានលក្ខខណ្ឌ៕ ដោយ CCKNEWS