ក្រុមអ្នកតវ៉ាបន្តទាមទារឲ្យដោះលែងលោកម៉មសូណង់ដូ

ក្រុមអ្នកតវ៉ា ដែលមានទាំងកុមារផង បានបន្តស្រែកទាមទារឲ្យដោះលែងលោកម៉ម សូណង់ដូ។ ការប្រមូលផ្តុំគ្នាលើកបដា និងស្រែកមេក្រូតវ៉ានោះ បានធ្វើឡើងបីថ្ងៃជាប់ៗគ្នា នៅកន្លែងប៉ូលិសបិទផ្លូវមុខតុលាការសាលាដំបូងរាជធានីភ្នំពេញ ជិតរង្វង់មូលនាងគង្ហីង ចម្ងាយប្រមាណ ២០០ ម៉ែត្រពីតុលាការ ដែលកំពុងតែដំណើរការកាត់ទោសលោកម៉ម សូណង់ដូ និងអ្នកពាក់ព័ន្ធ សរុប ១៤ នាក់ ។ នៅព្រឹកថ្ងៃទី១៣ ខែកញ្ញា ឆ្នាំ២០១២ តុលាការសាលាដំបូងរាជធានីភ្នំពេញ បានបន្តកាត់ទោសលោកម៉ម សូណង់ដូ ដោយសួរដេញដោលលើសាក្សីដាក់បន្ទុកបានចំនួន ៥ នាក់បន្ថែមទៀត។

ចំណែកប៉ូលិសនៅតែបន្តពង្រាយកម្លាំងដាក់របាំងបិទផ្លូវមុខតុលាការ ខាងជើងស្តាតអូឡាំពិក ចាប់ពីភ្លើងស្តុបអាងទឹក រហូតដល់ភ្លើងស្តុបនាងគង្ហីង។ ក្រុមអ្នកភូមិតវ៉ា មិនត្រូវបានអនុញ្ញាតឲ្យចូលទៅកាន់តុលាការឡើយ។

ការចោទប្រកាន់លោក ម៉ម សូណង់ដូ គឺតុលាការបានភ្ជាប់នឹងករណីជម្លោះដី ដែលបង្កឡើងដោយប្រជាពលរដ្ឋមួយក្រុម ដែលជាសាខាសមាគមអ្នកប្រជាធិបតេយ្យ នៅក្នុងភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។ ករណីជម្លោះដីនោះ ត្រូវបានអាជ្ញាធររដ្ឋាភិបាលចោទប្រកាន់ថា អ្នកទាំងនោះចាប់ដីរដ្ឋ បង្កើតតំបន់អបគមន៍ ហើយត្រូវបានរដ្ឋាភិបាលបង្ក្រាប និងបណ្តេញចេញ កាលពីថ្ងៃទី១៦ ខែឧសភា ឆ្នាំ២០១២ បណ្តាលឲ្យក្មេងស្រីម្នាក់ស្លាប់ និងមនុស្សជាច្រើនបានរត់គេចខ្លួនពីការតាមចាប់របស់តុលាការខេត្ត ក្រចេះ៕ដោយ ជខ