សាលាបង្រៀនយីហោ​ សុខាទាន់សម័យ ត្រូវម្ចាស់​ស្ថានីយ៍​វិទ្យុប្តឹង​ពី​បទ​ឆបោក

នៅថ្ងៃទី២៥ ខែកញ្ញា ឆ្នាំ២០១២​នេះ នាយកស្ថានីយ៍វិទ្យុបាន​ដាក់ពាក្យបណ្តឹង សាលាបង្រៀនអន្តរជាតិថែរក្សាសម្ផស្ស និងសំអាងការសុខាទាន់សម័យដែលមានទីតាំងស្ថិត​នៅ​ខាង​លិចផ្សារអគ្គថ្មី សាខាក្រុងប៉ោយប៉ែត​ ពី​បទ​រំលោភសេចក្តីទុកចិត្ត នៅអធិការដ្ឋាននគរបាលក្រុងប៉ោយប៉ែត ដើម្បីទាម​ទា​យក​ថ្លៃ​ផ្សាយ​វិទ្យុ បន្ទាប់ពីសាលានេះល្មើសកិច្ចសន្យាផ្សាយពាណិជ្ជកម្មអត់ឲ្យលុយ។​

លោកស្រី ចេន ណា នាយកគ្រប់គ្រងស្ថានីយ៍វិទ្យុ7FM 93.25MHz ប្រចាំក្រុងប៉ោយប៉ែត បានឲ្យដឹងថា សាលាបង្រៀនអន្តរជាតិថែរក្សាសម្ផស្សនិងសំអាងការសុខាទាន់សម័យ បានល្មើសកិច្ចសន្យាផ្សាយពាណិជ្ជកម្ម ដោយសាលាខាងលើដាក់កុងត្រាផ្សាយរយះពេលមួយឆ្នាំ តម្លៃ១៦៨០ដុល្លារ ក្នុង០១ខែៗខាងសាលាត្រូវបង់ថ្លៃផ្សាយ ២៦០​ដុល្លារ ស្រាប់តែផ្សាយទើបតែបាន០៦ខែ អ្នកគ្រប់គ្រងសាលាខាងលើឈប់មុនកិច្ចសន្យា និងមិនបានបង់ប្រាក់តាមកាលកំណត់មួយខែកន្លះហើយ។ ពេលលោកស្រីទៅទូទាត់ប្រាក់ត្រូវបានខាងសាលាមិនព្រមបង់ប្រាក់ឲ្យមកខាងស្ថានីយ៍វិទ្យុទេ បែជាមានការប្រកែកគ្នារហូតដល់តឹងសរសៃកររៀងៗខ្លួន និងមិនអាចសម្រួលគ្នាបាន ទើបលោកស្រីសម្រេចចិត្តមកដាក់បណ្តឹងឲ្យសមត្ថកិច្ចជួយដោះស្រាយវិញ។

លោក​ស្រី ចេន ណា បានបន្តថា ការមកដាក់ពាក្យបណ្តឹងនៅថ្ងៃនេះ ព្រោះអ្នកគ្រប់គ្រងសាលាប្រមាថមើលងាយ និងបោះពាក្យសំដីថា( បើគេមិនឲ្យលុយ​ចង់ធ្វើអីគេ ហើយចង់ទៅប្តឹងអីណាក៏ទៅប្តឹងទៅ) ដែលពាក្យសំដីទាំងនេះមិនអាចទទួលយកបានឡើយ ហើយស្ថានីយ៍មួយចំនួនក៏ធ្លាប់ត្រូវបានសាលាមួយនេះ ផ្សាយពាណិជ្ជកម្មហើយមិនឲ្យលុយផងដែរ ថ្ងៃនេះលោកស្រីនឹងប្តឹងសាលាខាងលើពីបទរំលោភសេចក្តីទុកចិត្ត។

ទាំងនេះគឺជាការអះអាងរបស់នាយកគ្រប់គ្រងស្ថានីយ៍វិទ្យុ7FM 93.25MHz តែប៉ុណ្ណោះ ដោយឡែកនាយកគ្រប់គ្រងសាលាបង្រៀនអន្តរជាតិថែរក្សាសម្ផស្សនិងសំអាងការសុខាទាន់សម័យ ដែលកំពុងរងការចោទប្រកាន់មិនទាន់ចេញមុខមកបំភ្លឺនៅឡើយទេជុំវិញករណីនេះ៕