ក្រសូងពត៌មានព្រមានដល់ការផ្សាយពាណិជ្ជកម្មគ្រឿងស្រវឹង

ក្រសួងពត៌មានបានព្រមានដោយប្រើសំដីធ្ងន់នៅថ្ងៃព្រហស្បត្តិ៍ទី​១១តុលាដល់ប្រពន្ធ័ផ្សព្វផ្សាយ​ក្នុងការធ្វើការឃោសនា​គ្រឿង​ស្រវឹងដោយ​មិនបានរំលឹកដល់អ្នកប្រើប្រាស់ពីគ្រោះថ្នាក់​ដែល​អាច​កើតមានក្នុងពេលបើកបរ។

ការព្រមាននេះធ្វើឡើងបន្ទាប់ពីក្រសួងបានបញ្ជាក់ថាខ្លួនបានសង្កេតឃើញថា​ប្រពន្ធ័ផ្សព្វផ្សាយ​បាន​អនុវត្តន៍​មិនបានល្អ​និងថែមទាំង​ប្រើសារញោះញង់ឲ្យសេពគ្រឿស្រវឹង​បែបស្រើបស្រាលអារម្មណ៍​ទៀតផង។

កាលពីចុងឆ្នាំមុនសមេ្តចនាយករដ្ឋមន្ដ្រីហ៊ុនសែនបានដាក់ចេញនូវបទបញ្ជាដល់រាល់ការផ្សព្វ​ផ្សាយគ្រឿងស្រវឹងត្រូវភ្ជាប់ជាមួយសេចក្ដីព្រមានថា​«បើស្រវឹងកុំបើកបរ»។

ក្រសួងពត៌មានកត់សំគាល់ថាបទបញ្ជានោះមិនត្រូវបានអនុវត្តគ្រប់សា្ថបន័ពត៌មាននិងប៉ាណូ​ពាណិជ្ជកម្ម​ឲ្យបានល្អនោះ​ទេ​ហើយបន្ថែមពីនោះមានការផ្សព្វផ្សាយទាក់ទាញថាសុរាគឺជាភេសជ្ជៈ​ប៉ូវទៀតផង។

ឯកឧត្តម ខៀវកញារិទ្ធរដ្ឋមន្ត្រីក្រសួងពត៌មានបានចេញលិខិតមួយ

នៅថ្ងៃនេះហើយបានរំលឹក​បណ្តាញ​ផ្សព្វផ្សាយត្រូវអនុវត្តន៍​សេចក្ដីណែនាំ​ស្តីពី​ការព្រមានដល់អ្នកសេពគ្រឿងស្រវឹង​ថា«បើស្រវឹងកុំបើកបរ»

ឲ្យបានខ្ជាប់ខ្ជួនហើយពិធីករពិធីការនីនានាត្រូវក្រើនរំលឹកពីសុវត្ថិភាព​ចរាចរ​ឲ្យបានញឹកញាប់។

ឯកឧត្តមខៀវកញារិទ្ធបានសង្កត់ធ្ងន់យ៉ាងម៉ឺងម៉ាត់ថានឹងដកនូវអជ្ញាបណ្ណ័និងបញ្ឈប់អាជីវកម្ម​ប្រពន្ធ័ផ្សព្វផ្សាយណាដែលរឹងរូស៕