គណបក្សប្រឆាំង​បង្វែការធើ្វបាតុកម្ម​ថ្ងៃ២៣​តុលាទៅជាការគោរពវិញ្ញាណក្ខន្ធ

មេដឹកនាំ​ចលនា​យុវជន នៃ​គណបក្សប្រឆាំង សម រង្ស៊ី បាន​បោះបង់ចោល​នូវ​ការធ្វើ​បាតុកម្ម នៅ​ថ្ងៃទី​២៣ ខែតុលា ឆ្នាំ​២០១២ ខាងមុខនេះ ទៅជា​ការធ្វើ​ពិធី​គោរព​ព្រះ​វិញ្ញាណក្ខន្ធ ព្រះមហាវីរក្សត្រ សម្តេច​ព្រះបាទ នរោត្តម សីហនុ វិញ​។ នេះ​យោងតាម​លោក សួង សុភ​ណ្ឌ ប្រធាន​ចលនា​យុវជនគណបក្ស សម រង្ស៊ី​។​

កាលពី​ព្រឹក ថ្ងៃទី​១៩ ខែតុលា ឆ្នាំ​២០១២ លោក សួង សុភ​ណ្ឌ បាន​ប្រាប់​តាម​ទូរស័ព្ទ​ថា នៅ​ថ្ងៃទី​២៣ ខែតុលា ឆ្នាំ​២០១២ នៅ​ក្រុម​ចលនា​យុវជន​គណបក្ស សម រង្ស៊ី នឹង​ប្រមូល​ផ្តុំគ្នា​នៅ​ទីលាន​ប្រជាធិបតេយ្យ ចំនួន​ប្រមាណ ៤០០ នាក់ ដើម្បី​គោរព​ព្រះ​វិញ្ញាណក្ខន្ធ​សម្តេចព្រះ​មហាវីរក្សត្រ​។ ពីដំបូង​ក្រុមយុវជន​គណបក្សប្រឆាំង គ្រោង​នឹង​ជួបជុំធ្វើបាតុកម្ម នៅ​ថ្ងៃ​២៣​តុលា ខួប​នៃ​ថ្ងៃ​ចុះ​កិច្ចព្រមព្រៀង​សន្តិភាព​ទីក្រុង​ប៉ារីស កាលពី​ឆ្នាំ​១៩៩១ ដោយ​ទាមទារ​ឲ្យ​រដ្ឋាភិបាលគោរព​សិទ្ធិមនុស្ស និង​កែទម្រង់ គ​.​ជ​.​ប​. ជាដើម​។​

លោក សួង សោ​ភណ្ឌ បាន​បន្តថា នៅ​ថ្ងៃទី​២៣​តុលា​នោះ ក្រុមយុវជននឹង​កោរសក់ ចំនួន ៣០ នាក់ ឬ​ច្រើនជាង​នេះ ហើយ​ដើរ​ហែ​ក្បួនពី​ទីលាន​ប្រជាធិបតេយ្យ ឆ្ពោះទៅកាន់​ខាងមុខ​ព្រះបរមរាជវាំង ដោយមាន​ពាក់​ជួត​ក្រណាត់នៅលើ​ក្បាល ដែល​សរសេរថា “​ខ្ញុំ​ស្រឡាញ់​ព្រះករុណា​”​។​

​សូមបញ្ជាក់ថា កាលពីមុន ក្រុមយុវជន​គណបក្ស​ប្រឆាំង សមរង្ស៊ី បានប្រកាស​ពី​គម្រោង​ធ្វើបាតុកម្មនៅ​ថ្ងៃទី​២៣ តុលា ដោយ​ទាមទារ​ឲ្យ​មាន​ការគោរព​ពេញ​លេញនូវ​កិច្ចព្រមព្រៀង​សន្តិភាព ថ្ងៃ​២៣​តុលា ឆ្នាំ​១៩៩១ និង​គោរព​តាម​រដ្ឋធម្មនុញ្ញ និង​ទាមទារ​ឲ្យ​មានការ​កែសម្រួល​សមាស​ភាព​ដឹកនាំ​គណៈកម្មាធិការ​ជាតិ​រៀបចំ​ការបោះឆ្នោត គ​.​ជ​.​ប​. និង​ការគោរព​សិទ្ធិមនុស្ស ព្រមទាំង​លទ្ធិប្រជាធិបតេយ្យ ជាដើម​៕