សម្តេចម៉ែយាងចូលរួមពិធីជួបជុំរបស់មហាជន នៅមុខព្រះបរមរាជវាំង

សម្តេចម៉ែ សម្តេចព្រះ នរោត្តម មុនិនាថ សីហនុ និង​ព្រះមហាក្សត្រ សម្តេចព្រះ​បរមនាថ នរោត្តម សីហមុនី បាន​យាង​ចេញ​ពី​ព្រះបរមរាជវាំង ហែហមដោយមន្ត្រីជាច្រើន បាន​យាង​​ចូលរួម​ជាមួយនឹង​មហាជន រួមទាំង​ព្រះសង្ឃ ដែល​កំពុង​ជួបជុំ កកកុញ នៅ​មុខ​ព្រះបរមរាជវាំង នា​រសៀល​ម៉ោង ៥ ថ្ងៃទី​២៣​តុលា ឆ្នាំ​២០១២ ដែល​ជា​ថ្ងៃ​ចុងក្រោយ នៃ​ថ្ងៃ​កាន់​ព្រះ​មរណទុក្ខ​ព្រះ​បរមសព​សម្តេច​ព្រះ​មហា​វីរក្សត្រ នរោត្តម សីហនុ​។​

មហាជន​ប្រជ្រៀត​គ្នា​រក​តែ​ដើរ​មិន​រួច នៅ​មុខ​ព្រះបរមរាជវាំង នា​រសៀល​ថ្ងៃ​ទី​២៣​តុលា ឆ្នាំ​២០១២​។ ចំណែក​ព្រះសង្ឃ​ប្រមាណ ១​ម៉ឺន​អង្គ ក៏​នឹង​គង់ អង្គុយ​តាំងសមាធិ សូត្រធម៌ ឧទ្ទិស​ថ្វាយ​ដល់​ព្រះ​វិញ្ញាណក្ខន្ធ​សម្តេច​ព្រះមហាវីរក្សត្រ សម្តេចព្រះ នរោត្តម សីហនុ នា​ព្រលប់​ថ្ងៃនេះ​។

នៅមុខវាំង គឺចាប់តាំងពីព្រឹកព្រលឹមថ្ងៃទី២៣តុលានេះមកម្លេះ មហាជនមកពីគ្រប់ទិសទី ច្រើនជាងថ្ងៃណាទាំងអស់ បានចេញ-ចូល ទៅអុជធូបគោរពព្រះវិញ្ញាណក្ខន្ធសម្តេច​ព្រះមហាវីរក្សត្រ សម្តេចព្រះ នរោត្តម​ សីហុន នៅមុខព្រះបរមរាជវាំង៕