ប្តូរ​ស្នងការ​នគរបាល​ខេត្ត​ព្រះវិហារ​មក​ក្រសួង​ដើម្បី​ទទួល​ភារកិច្ច​ថ្មី

ស្នងការ​នគរបាល​ខេត្ត​ព្រះវិហារ លោក​ឧត្តម​សេនីយ៍ត្រី​ម៉ៅ ពៅ ដែល​មាន​ស្នាដៃ​ចូល​រួម​ក្នុង​ការរា​រាំង ប្រឆាំង​កលល្បិច​ក្រុម​ថៃអាវ​លឿង​ដែល​ចង់បាន​ប្រាសាទ​ព្រះវិហារ ត្រូវ​បាន​​ផ្លាស់​ពីស្នងការ​ខេត្ត មក កាន់​ក្រសួង​មហា​ផ្ទៃ​វិញ ដើម្បី​ត្រៀម​នឹង​ទទួល​ភារកិច្ច​ថ្មី។

ក្នុង​ពិធីផ្ទេរ​និងតែង​តាំងមុខ​តំណែង​ស្នងការ នៃស្នង​ការដ្ឋាន​នគរបាល​ខេត្ត​ព្រះវិហារ ចូលរួម​ជាអធិប​តី​ដោយ ​អគ្គ ស្នង​ការ​នគរបាល​ជាតិ ឯកឧត្តម នាយ​ឧត្តមសេនីយ៍ នេត សាវឿននៅ​ព្រឹកថ្ងៃ​ទី២៥ តុលា​នេះ លោក​ឧត្តម សេនីយ៍​ត្រី ម៉ៅ ពៅ បានទទួល​ការប្រកាស​ជាផ្លូវការ​អំពីការ​ផ្លាស់​មក​អគ្គស្នងការដ្ឋាន​នគរ​បាលជាតិ​នៃ ក្រសួង​មហា​ផ្ទៃវិញ ចំណែក​តំណែង​ស្នងការ​នគរបាល​ខេត្ត​ព្រះវិហារ នឹង​ត្រូវ​ប្រគល់​ទៅអោយ លោក ស៊ី គីរី ដែលផ្លាស់​មកពី​ស្នង​ការរង​ខេត្ត​ពោធិសាត់។

អគ្គស្នងការ​នគរបាល​ជាតិ ឯកឧត្តម នាយ​ឧត្តម​សេនីយ នេត សាវឿន បាន​មាន​ប្រសាសន៍​នាព្រឹក ថ្ងៃទី២៥​តុលានេះ​ផងដែរ ដោយ​បាន​រលឹក​សរសើរ​អំពីស្នា​ដៃ​លោក​ឧត្តម​សេនីយ​ត្រីម៉ៅ ពៅ និង​បញ្ជាក់​ថា លោក ម៉ៅ ពៅ នឹង​ត្រូវវិល​ត្រឡប់​មក​នាយក​ដ្ឋាន​បុគ្គលិក​វិញ ដើម្បី​រង់ចាំ​ការតែង​តាំង​ថ្មី ពីថ្នាក់​ដឹក​នាំ​ក្រសួង។ លោក​ឧត្តមសេនីយ៍​ត្រីម៉ៅ ពៅ បានបំពេញ​ភារកិច្ច​នៅ ក្នុង​ខេត្ត​ព្រះវិហារ ចំនួន៥​ឆ្នាំ​២ខែ នៅ​មុន​ការ ផ្លាស់​តំណែង​របស់​លោក​មកកាន់​ក្រសួង​មហាផ្ទៃ ដើម្បី​ត្រៀម​ទទួល មុខ​តំណែង​ថ្មីនេះ។

លោក​ឧត្តម សេនីយ៍​ត្រីម៉ៅ ពៅ គឺជាស្នងការ​នគរបាល ដែល​ធ្លាប់​បាន​រួមចំណែក​រារាំង​និង ទប់​ស្កាត់​កល​ល្បិច របស់ ក្រុម​ថៃ​អាវលឿង ដែល​បាន​បញ្ជូន​មនុស្ស​ចូលមក​បង្កហេតុ​ក្នុងវត្ត​កែវ​សិក្ខា​គីរីស្វារៈ ក្នុង ព្រឹត្តិការណ៍​ខែ កក្កដា ឆ្នាំ​២០០៨។ លោក​ឧត្តមសេនីយ៍​ត្រីម៉ៅ ពៅ គឺជា​មន្ត្រី​នគរបាល​ដែលបាន​សួរ​សម្លើយ​ដោយ​ផ្ទាល់​នូវ ជន​សង្ស័យ​ថៃ ដែល​គេបាន​បញ្ជូន​មកធ្វើ​ជាដូន​ជី​ក្នុង​វត្តកែវសិក្ខា​គីរីស្វារៈ និង​បាន​ចូល​រួម ជាមួយ​នឹង កង​កម្លាំង តាម​ព្រំដែន​ទប់ ស្កាត់ការ​ធ្វើ​សង្គ្រាម​របស់ថៃ ឈ្លានពាន​ទឹកដី​ប្រាសាទ​ព្រះវិហារ នា​ជំនាន់ អតីត​កាល​មក​នេះ៕  ប្រភពះ អគ្គស្នងការដ្ឋាននគរបាលជាតិ