បុរសសង្ហា ស៊ឹមសោភ័ណ្ឌ បង្ហាញមុខគូស្នេហ៍ថ្មី?

ក្រោយពីមិនដែលលេចលឺដំណឹងថា តារាសម្ដែងសម្បុរស្រអែមស្រស់ ស៊ឹម សោភ័ណ្ឌ មានជំពាក់ចំណងស្នេហ៍ជាមួយនារីណាម្នាក់នោះ ថ្មីៗនេះ គេប្រទះឃើញរូបថតរបស់លោក ឈរឱបនារីម្នាក់ខ្វិតស្អិតដូចតុកកែ ដែលគេជឿថា នោះជាគូស្នេហ៍របស់លោក ដែលលោកមានចេតនាចង់បង្ហាញ។

មុននឹងរូបថតផ្អែមល្ហែមនេះ ត្រូវបង្ហាញ គឺអស់ពេលជាច្រើនឆ្នាំមកហើយ ក្រោយប្រឡូកសិល្បៈ តារាសម្ដែងសម្បុរស្រអែមស្រស់ ស៊ឹម សោភ័ណ្ឌ បានបិទជិតឈឹង ចំពោះព័ត៌មានស្នេហ៍ បើទោះជាគេយល់ថា រូបរាងសង្ហារដូចលោក មិនខ្វះទេស្រីក្មេងស្រឡាញ់ ឬស្ត្រីវ័យជ្រេសម្លឹងឃើញក៏ដោយនោះ។ប៉ុន្តែការបើកបង្ហាញថ្មីៗ តាមរូបថតពីរសន្លឹកនេះ គេជឿថា លោក ស៊ឹម សោភ័ណ្ឌ បានធ្វើឲ្យប្រិយមិត្តអ្នកគាំទ្រទាំងអស់ ផុតមន្ទិល ទៅហើយស្របពេលរូបភាពក្នុងរូបថតទាំងពីរសន្លឹកនោះ គេឃើញ លោក ស៊ឹម សោភ័ណ្ឌ ឈរពីក្រោយឱបនារីវ័យក្មេងស្អិតដូចតុកកែនោះ។

ប្រិយមិត្តអ្នកគាំទ្រដែលបានឃើញរូបថតនេះ យល់ថា ពួកគេមានសភាពស្និទ្ធស្នាលដូចជាគូស្នេហ៍ដ៏ស្អិតល្មួតមួយគូ ស្របពេលអ្នកខ្លះ ក៏សរសើរថាលោក ស៊ឹម សោភ័ណ្ឌ ពិតជាភ្នែកមុតមែន ព្រោះរកបានសង្សារមានរូបរាងដ៏សែនស្អាត ឯសាច់ ក៍សាច់សខ្ចីដូចពងមាន់បកទៀតនោះ។ទោះយ៉ាងណា ការសង្ស័យនេះ ត្រូវលោក ស៊ឹម សោភ័ណ្ឌ បានច្រានចោល ដោយលោក បានអះអាងថា លោកមិនទាន់មានគូស្នេហ៍នោះទេ ហើយនារីក្នុងរូបនោះ គឺជាមិត្តភ័ក្ដិក្នុងសិល្បៈប៉ុណ្ណោះ។

លោក ស៊ឹម សោភ័ណ្ឌ ថ្លែងថា “មានឯណាបង…នាងគឺតារាគ្នាឯងទេ… គាត់ជាតួថ្មី ហើយពួកយើងថតលេងតើ មិនមែនជាគូស្នេហ៍អីទេ”។យ៉ាងណាក៏ដោយ លោក ស៊ឹម សោភ័ណ្ឌ បានព្យាយាមមិនបញ្ចេញនូវអត្តសញ្ញាណច្បាស់លាស់ពីនារីវ័យក្មេងនោះ ក្រោយមានការសាកសួរ ដោយលោកបានឆ្លើយយ៉ាងខ្លីថា “អត់ស្គាល់”៕