អង្គការអន្តរជាតិមួយដែលបានតាមដានស្ថានការណ៍អំពើពុករលួយនៅលើពិភពលោក បានដាក់ឈ្មោះប្រទេសកម្ពុជា ក្នុងលំដាប់នៃប្រទេសដែលមានអំពើពុករលួយធ្ងន់ធ្ងរនៅឡើយ។
តំណាងអង្គការនេះ បានទាមទារឲ្យកម្ពុជា ពង្រឹងការអនុវត្តច្បាប់ប្រឆាំងអំពើពុករលួយថែមទៀត ដើម្បីចាប់ខ្លួនជនសង្ស័យដោយមិនរើសមុខ និងធ្វើឲ្យមានតម្លាភាពក្នុងការចំណាយថវិការដ្ឋ និងវិស័យផ្សេងៗទៀត។
អង្គការតម្លាភាពអន្តរជាតិនៅកម្ពុជា នៅថ្ងៃទី៥ ខែធ្នូ បានចេញផ្សាយរបាយការណ៍សិក្សាស្រាវជ្រាវមួយ ដាក់ប្រទេសកម្ពុជា ស្ថិតនៅក្នុងលំដាប់លេខ១៥៧ ក្នុងចំណោមប្រទេសសរុប១៧៦។ នេះ គឺជាចំណាត់ថ្នាក់មួយកំណត់ថា កម្ពុជា មានអំពើពុករលួយធ្ងន់ធ្ងរក្នុងឆ្នាំ២០១២ នេះ។
របាយការណ៍បានបញ្ជាក់ទៀតថា កម្ពុជា ជាប់ចំណាត់ថ្នាក់លេខ១៥៧ នោះ គឺប្រសើរជាងប្រទេសឡាវ ជាប់ចំណាត់ថ្នាក់លេខ១៦០ និងប្រទេសភូមា (មីយ៉ាន់ម៉ា) ជាប់ចំណាត់ថ្នាក់១៧២។ ប្រទេសដែលមានអំពើពុករលួយខ្ពស់បំផុតនោះ គឺប្រទេសសូម៉ាលី (Somali) និងប្រទេសកូរ៉េខាងជើង (North Korea)។
របាយការណ៍បានបន្តថា ប្រទេសដែលស្អាតស្អំ ឬគ្មានអំពើពុករលួយនោះ មានដូចជាប្រទេសដាណឺម៉ាក (Denmark) ប្រទេសនូវែលហ្សេឡង់ (New Zealand) ប្រទេសស្វីស (Swiss) ប្រទេសសិង្ហបុរី (Singapore) និងប្រទេសអូស្ត្រាលី (Australia) ជាដើម។
នាយកប្រតិបត្តិនៃអង្គការតម្លាភាពអន្តរជាតិនៅកម្ពុជា លោក ព្រាប កុល បានមានប្រសាសន៍នៅក្នុងសន្និសីទកាសែត នៅសណ្ឋាគារឡឺរ៉ូយ៉ាល់ (Le Royal Hotel) នៅថ្ងៃទី៥ ខែធ្នូ ថា អង្គការរបស់លោកបានចាត់ចំណាត់ថ្នាក់នេះពីលេខ០ ដែលប្រទេសគ្មានអំពើពុករលួយ ដល់លេខ១០០ ដែលជាប្រទេសមានអំពើពុករលួយធ្ងន់ធ្ងរ។ ចំណែកឯលេខ៤៣ គឺជាប្រទេសមានអំពើពុករលួយមធ្យម៖ «អ្នកធ្វើអាជីវកម្ម សហគ្រិន ដែលគេមកពីបណ្ដាប្រទេសជឿនលឿន ប្រទេសដែលមានភាពស្អាតស្អំ ដូចជានៅប្រទេសបច្ចឹម ដូចជានៅប្រទេសប៉ែកអឺរ៉ុប មួយចំនួន គេពិបាកមកធ្វើការវិនិយោគនៅក្នុងប្រទេសដែលមានអំពើពុករលួយធ្ងន់ធ្ងរ។ ទី២ បើយើងនិយាយអំពីលក្ខណៈជីវភាព គឺប៉ះពាល់ដល់ប្រជាពលរដ្ឋ អ្នកក្រីក្រហ្នឹងធ្ងន់ធ្ងរជាងគេ ដែលគាត់មិនស្គាល់អំពើពុករលួយស្អីផង។ ហើយយើងទាំងអស់គ្នាជាប្រជាពលរដ្ឋក្នុងប្រទេសដែលមានអំពើពុករលួយ សុទ្ធតែជាជនរងគ្រោះទាំងអស់»។
ចំណែកឯនាយកនៃអង្គការតម្លាភាពអន្តរជាតិនៅកម្ពុជា លោក រ័ត្ន សោភ័ណ បានមានប្រសាសន៍ដែរថា លោកទាមទារឲ្យមានច្បាប់មួយដើម្បីឲ្យអ្នកកាសែត និងប្រជាពលរដ្ឋខ្មែរ បានទទួលព័ត៌មានគ្រប់គ្រាន់អំពីការចំណាយថវិការដ្ឋ កិច្ចសន្យានានាជាមួយក្រុមហ៊ុនឯកជន ការសម្រេចចិត្តនានាលើវិស័យហិរញ្ញវត្ថុ និងឲ្យមានការបើកចំហ ឬតម្លាភាពក្នុងការសម្រេចចិត្តរបស់រដ្ឋាភិបាលលើបញ្ហាសំខាន់ៗ៖ «រដ្ឋាភិបាលត្រូវតែដាក់បញ្ចូលសកម្មភាពការងារប្រឆាំងអំពើពុករលួយនៅក្នុងសម្រេចចិត្តសាធារណៈទាំងអស់ ត្រូវពង្រឹងយន្តការស្វែងរកការស៊ើបអង្កេតអំពើពុករលួយ និងការអនុវត្តវិធាន និងចាត់ការផ្លូវការតាមរយៈតុលាការឯករាជ»។
ទាក់ទងនឹងរបាយការណ៍នេះ អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានមានប្រសាសន៍ប្រតិកម្មថា លោកមិនអាចទទួលយករបាយការណ៍នេះបានទេ ពីព្រោះវាគ្រាន់តែជាការយល់ឃើញ ឬទស្សនៈរបស់អង្គការនោះ៖ «ក្នុងរយៈពេល ១០ឆ្នាំនេះ យើងបានទទួលការវាយតម្លៃពីអង្គការរូបិយវត្ថុអន្តរជាតិ ក៏ដូចជាអង្គការដទៃទៀតដែរ។ អាស្រ័យហេតុដូច្នេះ យើងមើលទៅលើទម្រង់ទឹកមុខរបស់ប្រជាពលរដ្ឋកម្ពុជា យើងឃើញមាន ៨០ជាង ៨២% ឬ ៨៣% ដែលបានវាយតម្លៃខ្ពស់ចំពោះអ្វីដែលជាសមិទ្ធផលរបស់រាជរដ្ឋាភិបាល ដឹកនាំដោយសម្ដេចអគ្គមហាសេនាបតីតេជោ ហ៊ុន សែន ហ្នឹង រាជរដ្ឋាភិបាលកម្ពុជា កំពុងតែដើរចំទិសដៅដែលខ្លួនពេញចិត្ត»។
តំណាងរាស្ត្រគណបក្ស សម រង្ស៊ី លោក សុន ឆ័យ បានមានប្រសាសន៍ថា លោកគាំទ្ររបាយការណ៍របស់អង្គការតម្លាភាពអន្តរជាតិនេះថាជាការត្រឹមត្រូវ៖ «ពង្រឹងស្ថាប័នជាតិ ស្ថាប័នរដ្ឋសភា ត្រូវតែមានការអនុវត្ត ការតាមដាន ការសួរដេញដោល មានសិទ្ធិទម្លាក់រដ្ឋមន្ត្រីណាដែលបានប្រព្រឹត្តអំពើពុករលួយ និងមិនបំពេញការងារត្រឹមត្រូវ។ ស្ថាប័នអង្គភាពប្រឆាំងអំពើពុករលួយ ត្រូវតែឯករាជ មិនត្រូវស្ថិតក្រោមឥទ្ធិពលរបស់នាយករដ្ឋមន្ត្រីដែលជាអ្នកសម្រេចឲ្យចាប់អ្នកណា ឬមិនឲ្យចាប់អ្នកណានោះទេ»។
កន្លងមក អង្គការយូ.អេស.អេ.អាយ.ឌី (USAID ) របស់សហរដ្ឋអាមេរិក ធ្លាប់បានចេញផ្សាយរបាយការណ៍សិក្សាស្រាវជ្រាវលំអិតមួយ ចុះថ្ងៃទី១៩ ខែសីហា ឆ្នាំ២០០៤ បានរកឃើញថា ប្រទេសកម្ពុជា បាត់បង់ថវិការដ្ឋចំនួនរវាង ៣០០លានដុល្លារអាមេរិក ទៅ ៥០០លានដុល្លារអាមេរិក ក្នុងមួយឆ្នាំៗ ដោយសារតែអំពើពុករលួយក្នុងការផ្តល់ដីសម្បទានព្រៃឈើ ការសូកប៉ាន់ និងការរត់ពន្ធជាដើម។
នៅក្នុងសន្និសីទកាសែតនៅថ្ងៃទី៥ ខែធ្នូ ឆ្នាំ២០១២ នាយកប្រតិបត្តិនៃអង្គការតម្លាភាពអន្តរជាតិនៅកម្ពុជា លោក ព្រាប កុល បានមានប្រសាសន៍ថា អង្គភាពប្រឆាំងអំពើពុករលួយរបស់រដ្ឋាភិបាល ដែលទើបបានបង្កើតឡើងរយៈពេលជាង ២ឆ្នាំមកហើយនោះ ត្រូវតែបន្តពង្រឹងសមត្ថភាពក្នុងការស៊ើបអង្កេតដោះស្រាយពាក្យបណ្ដឹងរបស់ប្រជាពលរដ្ឋឲ្យមានប្រសិទ្ធភាព ដើម្បីចាប់ខ្លួនជនសង្ស័យផ្ដន្ទាទោសដោយមិនរើសមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
.jpg)
.jpg)
.jpg)
.png)
.jpg)
.jpg)
