សកម្មភាពបទល្មើសនេសាទ ដូចជាអូសលៀសដោយម៉ាស៊ីន កាណូតរុញស៊ីបយកត្រីទាំងតូចទាំងធំ ដាក់ណរ៉ាវក្រឡាញឹករាប់ពាន់ម៉ែត្រ និងដាក់ឆ្នុក នៅបឹងទន្លេសាប ស្ថិតក្នុងឃុំកំពង់ឃ្លាំង ស្រុកសូទ្រនិគម ខេត្តសៀមរាប យ៉ាងអាណាធិបតេយ្យ គ្មានការទប់ស្កាត់ ឬបង្រ្កាបពីមន្រ្តីជំនាញទាល់តែសោះនៅចុងឆ្នាំ២០១២នេះ។
ប្រភពពីប្រជាពលរដ្ឋនៅឃុំកំពុងឃ្លាំងបានរាយការណ៍ថា ឆ្នាំ២០១២នេះមានក្រុមអ្នកមានលុយមានអំណាចមួយចំនួនកំពុងប្រកបមុខរបរនេសាទខុសច្បាប់ដូចខាងលើពេញផ្ទៃទន្លេសាប ដោយសេរីគ្មានការរំខានពីអស់លោកនាយផ្នែក នាយសង្កាត់រដ្ឋបាលជលផលនៅប្រចាំស្រុកនេះនោះទេ។ ប្រភពបន្តរាយការណ៍ថា អ្នកដែលដាក់ណរ៉ាវក្រឡាញឹកធំៗមានជិត១០នាក់ តែម្នាក់ឈ្មោះ ដង្ខៅង៉ែត មានវ័យប្រហែលជាង៤០ឆ្នាំ អតីតជាកូនថៅកែឡូនេសាទ បានដាក់ណរ៉ាវធំហើយវែងជាងគេ ដែលណរ៉ាវ១មានប្រវែងជាង៣ទៅ៥រយម៉ែត្រឯណោះ។ ប្រភពបន្តរាយការណ៍ទៀតថា ក្រុមអ្នករុញស៊ីបមានដូចជា ទី១-ឈ្មោះឆុងឆៃ ភេទប្រុស អាយុជាង២០ឆ្នាំ ទី២-ឈ្មោះគុណ ភេទប្រុស អាយុជាង២០ឆ្នាំ ទី៣-ឈ្មោះយ៉ ភេទប្រុស អាយុជាង៣០ឆ្នាំ ជនជាតិវៀតណាម និងប្រភន្ធឈ្មោះជា។ ប្រភពបន្ថែមថា ចំណែកឯសកម្មភាព កាណូតអូសលៀសអូសខ្ចៅរាប់រយគ្រឿង ក៏បង្កអោយមានផលប៉ះពាល់ដូចជា អូសរហូតដល់ទឹកទន្លេសាបមួយចំហៀងទន្លេឡើងកករល្អក់ ពុលស្លាប់ត្រី ស្លាប់បង្គារ ដាច់មង ដាច់សន្ទួចរបស់ពលរដ្ឋជារៀងរាល់ថ្ងៃផងដែរ។
ពលរដ្ឋម្នាក់សុំមិនបញ្ចេញឈ្មោះបានលួចខ្សឹបប្រាប់ថា មូលហេតុដែលក្រុមអូសលៀសអូសខ្ចៅ ក្រុមរុញស៊ីប ដាក់ណរចរ៉ាវវែងៗ ដាក់ឆ្នុក ហ៊ានប្រកបរបររកស៊ីនេះឡើងវិញ ព្រោះមានមនុស្ស២-៣នាក់តាំងខ្លួនជាថ្នាក់រដ្ឋបាលរបស់រដ្ឋមន្រ្តីនៅឯរាជធានីភ្នំពេញបានអះអាងថា ” រាជរដ្ឋាភិបាលកម្ពុជាបានលុបបទបញ្ជាលេខ ០០១ ចេញហើយ ដូច្នេះប្រជាពលរដ្ឋអាចប្រកបរបរខាងលើនេះបានដោយសេរីមិនចាំបាច់ភ័យខ្លាចអីទេ រកអីរកទៅ “។
ក្រុមអ្នករុញស៊ីបខាងលើបានលួចបង្ហើបថា ខាងផ្នែករដ្ឋបាលជលផលប្រចាំស្រុកសូទ្រនិគមនេះ ធ្លាប់បានចាប់កាណូតរុញស៊ីបរបស់ពួកគេ យកលុយ១លានរៀលក្នុងកាណូត១គ្រឿង ជាថ្នូរនិងការដោះលែងកាលពីពេលថ្មីៗនេះ។
ប្រភពច្បាស់ការបានអោយដឹងថា មានដង្ខៅធំៗ៣នាក់ដែលកំពុងប្រមូលទិញលៀសដឹកឡានកូរ៉េធំៗ ពីឃុំកំពុងឃ្លាំង ស្រុកសូទ្រនិគម ខេត្តសៀមរាប ដែលមានឈ្មោះទី១-ចែសុខ លោករ៉ុង ទី២-លោកស៊ុន ចែញ៉ែត ទី៣-លោកហាប់ ចែថូ។ ប្រភពបន្តថា ចែសុខមិនត្រឹមតែជាថៅកែប្រមូលទិញលៀសខ្ចៅប៉ុណ្ណោះទេ គាត់ថែមទាំងមានទូកកាណូតអូសលៀសខ្ចៅជាច្រើនគ្រឿងទៀតផង។
លោក ដង្ខៅង៉ែត បានប្រតិកម្មច្រឡោតតោតតូងតាមទូរស័ព្ទថា ” អ្នករកស៊ីបទល្មើសនេសាទមានច្រើនណាស់នៅឃុំកំពុងឃ្លាំងនេះ បើអ្នកកាសែតចុះផ្សាយចុះអោយអស់ បើចុះតែលោកម្នាក់ លោកនឹងប្តឹងទាំងអ្នកកាសែត ទាំងអ្នករកស៊ីខុសច្បាប់ផ្សេងទៀត ហើយប្តឹងទាំងមន្រ្តីជំនាញដែលឃុបឃិតយកលុយអ្នករកស៊ីបទល្មើសនេសាទផ្សេងទៀត ដែលមិនចុះបង្ក្រាបតាមច្បាប់ ហើយពួកអស់លោកអ្នកកាសែតឯងអស្ចាប៉ុណ្ណា បើខ្លាំងទៅជួបខ្ញុំនៅការិយាល័យទី៥ក៏បានដែរ ហើយបើហ៊ានចុះផ្សាយខ្ញុំៗនឹងប្តឹង ហើយចាំជួបគ្នានៅតុលាការ “។
ចែសុខបានប្រាប់អ្នកយកព័ត៌មានយើងតាមទូរស័ព្ទកាលពីពេលថ្មីៗថា គាត់ជាអ្នកទិញលៀសពីពលរដ្ឋមែន ហើយគាត់ពុំបានខ្វល់រឿងច្បាប់ទំលាប់អីទេ បើគេមានលៀសលក់គឺគាត់ទិញ ការអូសលៀសខុសច្បាប់ ឬត្រូវច្បាប់ជារឿងរបស់អ្នកអូសលៀសតែប៉ុណ្ណោះ គាត់អត់ឈីក្បាលវិលមុខអីទេ ចង់អូសរីងទាំងទឹកទន្លេសាបក៏គាត់មិនដឹងដែរ ព្រោះប្តីគាត់ធ្វើទាហ៊ានប្រាក់ខែតិច គាត់ត្រូវតែរករបរក្រៅទើបអាចស៊ីគ្រប់។
យើងពុំអាចសុំការបំភ្លឺពីលោ រឹមសំអុន នាយផ្នែករដ្ឋបាលជលផលស្រុកសូទ្រនិគមបានទេ ពាក់ប័ន្ធករនីបទល្មើសនេសាទខាងលើនេះ ព្រោះទូរស័ព្ទខលចូលជាច្រើនដងតែលោកមិនលើកទទូល។
លោក ព្រិនសាវិន នាយខណ្ឌរដ្ឋបាលជលផលខេត្តសៀមរាបបានប្រាប់តាមទូរស័ព្ទថា ទី១-ណរ៉ាវ ខាងជលផលបានអនុញ្ញាតិអោយដាក់បានតែ ៥០ម៉ែត្រប៉ុណ្ណោះ ទី២-រុញស៊ី គឺមិនអនុញ្ញាតិទេ ទី៣-លៀសខ្ចៅ អោយពលរដ្ឋប្រើកញ្ចែ្រងកើប មិនអោយប្រើម៉ាស៊ីនអូសទេ។ លោកនាយខណ្ឌបន្ថែមថា អ្នកដែលទៅបំផុសបំផុលប្រជាពលរដ្ឋថា រដ្ឋាភិបាលបានលុបប្រកាសលេខ ០០១ អោយពលរដ្ឋរកស៊ីមុខរបរនេសាទខុសច្បាប់ដូចមុននោះវាជាការឃោសនាអកុសល្យតែប៉ុណ្ណោះ វាមិនពិតទេ៕
.jpg)
.jpg)
.jpg)
.png)
.jpg)
.jpg)
.JPG)
