ពលករខ្មែរជាង១៦ម៉ឺននាក់ត្រូវថៃបញ្ជូនមកខ្មែរវិញដែល​ពុំធ្លាប់​មាន

នាថ្ងៃទី១៤ ខែធ្នូ ២០១២ ជាពេលវេលាកំណត់ ដែលរដ្ឋាភិបាលថៃ សម្រេចបញ្ជូនពលករខុសច្បាប់ ភូមា ឡាវ និងដោយឡែកពលករខ្មែរ ខុសច្បាប់ចំនួនជាង ១៦ម៉ឺននាក់ ប្រឈមទៅនឹងការបញ្ជូន ត្រឡប់មកស្រុកកំណើតវិញ ជាលក្ខណៈទ្រង់ទ្រាយធំ ក៏ប៉ុន្តែសេចក្តីសម្រេច ទំនងជា ពន្យារពេល។

លោក មឿន តុលា ប្រធានកម្មវិធីសិទ្ធិការងារ នៃមជ្ឈមណ្ឌលអប់រំច្បាប់ស្រាប់ សហគមន៍ បានថ្លែងឲ្យដឹងថា ថៃទំនងជាពន្យារពេលថ្ងៃកំណត់ ក្នុង ការបញ្ជូនពលករខ្មែរខុសច្បា ប់ជាលក្ខណៈទ្រង់ទ្រាយធំ ប្រសិនណាបើពួកគេ មិនបានបំពេញបញ្ជីជាពលករ ស្របច្បាប់ទេនោះ។លោកថា លោកមានការព្រួយបារម្ភ បើសិនជាថៃពិតជាបញ្ជូន ពលករខ្មែរខុសច្បាប់ ជាលក្ខណៈទ្រង់ទ្រាយធំមែន លើបញ្ហាសិទ្ធិមនុស្ស និងភាពគ្មាន ការងារធ្វើរបស់ពួកគេ នៅពេលដល់ស្រុកកំណើតវិញ “យើងខ្លាចអាជ្ញាធរថៃ ធ្វើអីមួយខុសឆ្គង លើសិទ្ធិមូលដ្ឋានរបស់ពួកគេ ព្រោះមនុស្សបញ្ជូនមក ច្រើនពេកដល់ទៅ១៦ម៉ឺននាក់ និងខ្លាចយើងគ្មានគម្រោង សមាហរកម្មណាមួយ ធានាពួកគាត់ឲ្យមានការងារ ក្នុងស្រុកទាន់ពេលវេលា”។

តាមសេចក្តីរាយការណ៍នានាបានឲ្យដឹងថា ច្រកតាមព្រំដែនថ្ងៃនេះ មិនទាន់មានភាគីថៃ បញ្ជូនពលករខ្មែរ ជាលក្ខណៈទ្រង់ទ្រាយធំនៅឡើយទេ។

រីឯសារព័ត៌មានថៃ Bangkok Post បានរាយការណ៍ឲ្យដឹងនៅថ្ងៃទី១៤ ខែធ្នូ ឆ្នាំ២០១២ថា ក្រុមជំនួញ ម្ចាស់ក្រុមហ៊ុន សហគ្រាសថៃ បានស្នើឲ្យ រដ្ឋាភិបាលពន្យារពេល បញ្ជូនពលករខុសច្បាប់ ដើម្បីបញ្ចៀសការខ្វះនូវ កម្លាំងពលកម្មតាមរោងចក្រ សហគ្រាស ក្រុមហ៊ុនថៃជាដើម។លោក Phumin Harinsut ប្រធានស្តីទីសភាពាណិជ្ជកម្មថៃ បានថ្លែងឲ្យដឹងថា ក្រុមអ្នកជំនួញថៃបានស្នើ ឲ្យនាយករដ្ឋមន្រ្តីថៃ លោកស្រី យីងឡាក់ ស៊ីណាវ៉ាត់ត្រា ពន្យារពេលបញ្ជូនពលករខុសច្បាប់ ជាលក្ខណៈទ្រង់ទ្រាយធំ។

ប្រមុខរាជរដ្ឋាភិបាលខ្មែរ សម្តេចតេជោ ហ៊ុន សែន នាយករដ្ឋមន្រ្តីបានអំពាវនាវជារឿយៗ និងជាថ្មីម្តងទៀត កាលពីថ្ងៃពុធ ទី១២ ខែធ្នូ ឆ្នាំ២០១២កន្លងទៅថ្មីៗនេះ សូមឲ្យពលករខ្មែរនៅតាមទីជនបទ ដែលមានជីវភាពគ្រួសារខ្វះខាត និងក្រខ្សត់នោះ កុំធ្វើចំណាកស្រុក ព្រោះវា មានភាពប្រថុយប្រថានជាច្រើន ដែលអាចបណ្តាលឲ្យមានគ្រោះថ្នាក់ ដល់អាយុជីវិត ហើយគួរងាកមកស្វែងរកការធ្វើក្នុងប្រទេស ដែលកំពុងខ្វះ ខាតកម្លាំង និងមានប្រាក់ឈ្នួល ប្រហាក់ប្រហែលនឹងប្រទេសជិតខាង៕