លោក ហុក-ប៊ុនធឿន ហៅស្មីមានវ័យប្រហែលជាង៣០ឆ្នាំ បច្ចុប្បន្នរស់នៅក្នុងក្រុង-ខេត្តសៀមរាប កំពុងតែតាំងខ្លួនជាអ្នកជើងខ្លាំង ខាងរតការឡានដឹកឈើអោយក្រុមហ៊ុនហួតម៉េងរីតា ខូអិលធីឌី ទាំងយប់ទាំងថ្ងៃ ដែលក្រុមហ៊ុននេះត្រូវបានគេស្គាល់ថា ថៅកែឈ្មោះ ជ័យ មានតំណែងផ្កាយ២។
យោងទៅលើផែនទីដែលដាក់តាំងនៅមុខក្រុមហ៊ុន ហួតម៉េងរីតា ខូអិលធីឌីបានសរសេរថា ” ផែនទី ទីតាំងដីវិនិយោគអភិរឌ្ឍន៍លើវិស័យកសិកម្ម-ឧស្សាហកម្ម និងដំណាំកៅស៊ូរបស់ក្រុមហ៊ុន ហួតម៉េងរីតា ខូអិលធីឌី ស្ថិតក្នុងដែនជំរកសត្វព្រៃគូលែន ព្រហ្មទេព ភូមិសាស្រ្តស្រុកអន្លង់វែង ខេត្តឧត្តរមានជ័យ លើផ្ទៃដី ៣០០០ ហិកតា“។
ប្រភពសុំមិនបញ្ចេញឈ្មោះបានអោយដឹងថា ក្រុមហ៊ុនហួតម៉េងរីតា មិនត្រឹមតែដឹកឈើដែលជាកាកសំណល់របស់ដីសម្បទានរបស់ខ្លួននោះទេ ថែមទាំងទិញឈើខុសច្បាប់ពីខាងក្រៅ យកចូលក្រុមហ៊ុនដោយលួចលាក់ រួចលើកដាក់រថយន្តយីឌុបដឹកចេញ ចែកចាយតាមបណ្តាខេត្តក្រុង ដោយយកលេសថា ឈើក្រុមហ៊ុនមានច្បាប់គ្រប់គ្រាន់។
ប្រភពបានរាយការណ៍ថា កាលពីប៉ុន្មានខែកន្លងទៅនេះអ្នករតការឡានដឹកឈើលេខ២របស់ក្រុមហ៊ុន ហួតម៉េងរីតាគឺឈ្មោះ ប៊ុលបាន ភេទប្រុសអាយុប្រហែលជាង៣០ឆ្នាំ តែប្រហែលជិត៣ខែកន្លងទៅនេះ លោក ប៊ុលបាន មិនចេញមុខរតការឡានដឹកឈើទៀតទេគ្រាន់តែជិះរថយន្តតាមមើលពីក្រោយឡានដឹកឈើ ហើយបានប្រគល់អោយលោក ហុកប៊ុនធឿន ហៅស្មីជាអ្នករតការ បង់លុយអោយសមត្ថកិច្ចតាមដងផ្លូវជំនួសវិញម្តង។
លោកប៊ុលបាន មេការរថការឡានដឹកឈើអោយក្រុមហ៊ុនហួតម៉េងរីតា បានប្រាប់តាមទូរស័ព្ទកាលពីថ្ងៃទី៤គុម្ភៈនេះថា ”ខ្ញុំឈប់រតការឈើខាងលើហើយ ខ្ញុំអោយ អាស្មី និងតាឌឿ ជាអ្នករតការវិញម្តង“ ។
លោក ឌឿ (នាមហៅក្រៅ) មានវ័យប្រហែលជាង៤០ឆ្នាំ បច្ចុប្បន្នរស់នៅក្នុងក្រុងសៀមរាបបានប្រាប់តាមទូរស័ព្ទនៅរសៀលថ្ងៃទី៦គុម្ភៈនេះថា លោកបានរតការឈើតែ១រថយន្ត កាលពីថ្ងៃទី៤គុម្ភៈ គ្រាន់សល់លុយកាក់ខ្លះទុកចូលឆ្នាំចិន។ លោកឌឿបានអោយដឹងទៀតថា លោកពុំដែលបានកាន់ក្រដាសច្បាប់របស់ក្រុមហ៊ុនខាងលើទេ តែតាមលោកដឹងក្រដាសច្បាប់នៅជាប់ជាមួយតៃកុងឡានដឹកឈើ។ អ្នកយកព័ត៌មានយើងសួរទៅលោកឌឿ១សំនួរទៀតថា ” ក្រុមហ៊ុនហួតម៉េងរីតា មានច្បាប់ចាំបាច់មានអ្នកយកលុយរតការបង់អោយសមត្ថកិច្ចតាមដងផ្លូវធ្វើអ្វី?“ លោកឌឿ បកស្រាយថា ” ខ្ញុំជាអ្នករតការតូចតាច សួរចឹងឆ្លើយមិនចេញទេ សួរថៅកែធំទៅ“។
យើងពុំអាចសុំការបំភ្លឺពីលោក ហុកប៊ុនធឿន ហៅស្មីដែលជាអ្នកជើងខ្លាំងខាងរតការឡានដឹកឈើ បានទេនៅរសៀលថ្ងៃទី៦ ខែគុម្ភៈ ឆ្នំ២០១៣ ដដែលនេះ ព្រោះទូរស័ព្ទចូលមិនមានអ្នកលើកទទួល។
នៅរសៀលម៉ោង៣និង៥នាទី ថ្ងៃទី៦ ខែគុម្ភៈ ឆ្នាំ២០១៣នេះ យើងពុំអាចសុំការបំភ្លឺពីលោក ជ័យ ដែលជាថៅកែក្រុមហ៊ុនហួតម៉េងរីតាខូអិលធីឌី បានទេព្រោះទូរស័ព្ទនៅក្រៅតំបន់សេវា។
សូមបញ្ជាក់ថា នៅកំឡុងខែមករា និងខែគុម្ភៈ ឆ្នាំ២០១៣នេះ សកម្មភាពដឹកឈើលេខ២របស់ក្រុមហ៊ុន ហួតម៉េងរីតា ខូអិលធីឌី គឺបានសំរុកដឹករាប់រយរថយន្ត ដឹកចេញតាមផ្លូវដីក្រហម ទល់មុខវត្ត ក្នុងភូមិវត្ត ឃុំស្រែណូយ ស្រុកវ៉ារិន ខេត្តសៀមរាប សំដៅទៅស្រុកស្រីស្នំ ស្រុកស្រឡាញ់ស្រុក អង្គរជុំ និងខ្លះឆ្លងទៅខេត្តបន្ទាយមានជ័យ។ ហើយមួយចំនួនទៀត ដឹកចេញពីក្រុមហ៊ុនខាងលើឆ្លងកាត់តាមផ្លូវលេខ៦៧ (ផ្លូវហៃវ៉េ) ឆ្ពោះទៅទិសខាងកើត តាមផ្លូវជាតិលេខ៦ ឆ្លងកាត់ខេត្តសៀមរាប ខេត្តកំពុងធំជាដើម។
ពលរដ្ឋខេត្តសៀមរាប-ឧត្តរមានជ័យសង្ស័យថា រថយន្តដឹកឈើរបស់ក្រុមហ៊ុនហួតម៉េងរីតាខាងលើ មិនមានច្បាប់ត្រឹមត្រូវ ឬមិនមានច្បាប់គ្រប់គ្រាន់ ឬមានច្បាប់តែដឹកឈើលើសចំនួនកំណត់ និងលើសចំនួនរថយន្ត បាមជាមានអ្នកចាំរតការបង់លុយអោយសមត្ថកិច្ចតាមដងផ្លូវបែបនេះ។ពួកគាត់បន្តថា បើរថយន្តមានច្បាប់ត្រឹមត្រូវម្តេចក៏បើកលឿនដូចហោះ មិនហ៊ានអោយអ្នកសារព័ត៌មានថតរូប មិនហ៊ានបើកកៅស៊ូប៉ាតង់ចំហរអោយគេមើលជាក់ស្តែង ហើយអះអាងតែមាត់ខ្លួនឯងថាល្អត្រឹមត្រូវ។ ពលរដ្ឋសុំអោយអង្គភាពប្រឆាំងអំពើពុករលួយចាត់ការករណីខាងលើផង៕
.jpg)
.jpg)
.jpg)
.png)
.jpg)
.jpg)
.JPG)
