សហជីព យល់ព្រមកំណត់ប្រាក់ខែកម្មករ១២០ដុល្លារ

លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករបាននិយាយឲដឹងថា នៅថ្ងៃទី២០ ខែកុម្ភៈ ឆ្នាំ២០១៣ថា បន្ទាប់ពីមានការ ជួបប្រជុំ ពីគ្រប់ភាគីពាក់ព័ន្ធដែលរួមមាន អង្គការពលកម្មអន្តរជាតិ (ILO) និងមន្រ្តីសហជីពមួយចំនួន នៅក្នុងប្រទេសកម្ពុជា ដែលក្នុងនោះមានសហជីព របស់ លោកផងដែរ បានសម្រេចលទ្ធផលហើយ ដោយកំណត់យក១២០ដុល្លារ សម្រាប់ប្រាក់ខែរបស់កម្មករ។

ក្រុមមន្រ្តីសហជីព ដែលធ្វើការទាក់ទងទៅនឹងកម្មកររោងចក្រ ផ្នែកវាយនភណ្ឌ និងផលិតស្បែកជើង បានសម្រេចកំណត់ប្រាក់ខែកម្មករ ចំនួន១២០ដុល្លារ មុនការជួបប្រជុំក្រុមការងារទី៨ របស់រាជរដ្ឋាភិបាលកម្ពុជា ដែលឈានចូលមកដល់ថ្ងៃទី២៦ ខែកុម្ភៈ ខាងមុខនេះ ដើម្បីស្នើឲ្យអង្គប្រជុំយល់ព្រម។

នៅក្នុងកិច្ចប្រជុំក្រុមការងារទី៨ របស់រាជរដ្ឋាភិបាលកម្ពុជា ដែលដឹកនាំដោយលោក រដ្ឋមន្រ្តីក្រសួងសង្គមកិច្ច លោក អ៊ិត សំហេង នៅថ្ងៃទី២៦ ខែកុម្ភៈ នោះ លោក ប៉ាវ ស៊ីណា ស្នើសុំឲ្យគ្រប់ភាគីពាក់ព័ន្ធ បានចូលរួមក្នុងការពិគ្រោះយោបល់នោះផង៕