អ្នកកាសែតម្នាក់ត្រូវបានចាប់ខ្លួនក្នុងករណីឆបោក

អ្នកកាសែត នៅក្នុងអង្គភាព ដំណឹងកម្ពុជា ម្នាក់បានត្រូវតុលាការ ឃុំខ្លួនដាក់ពន្ធនាគារ នាព្រឹកថ្ងៃទី ២៣ខែឧសភា ឆ្នាំ២០១៣ បន្ទាប់ពីអ្នកកាសែតរូបនោះ ចូលខ្លួនទៅបំភ្លឺករណីឆបោកប្រាក់។

            អ្នកកាសែត អង្គភាពដំណឹងកម្ពុជា រូបនោះមានឈ្មោះ ទៀ ចំរើន អាយុ៥២ឆ្នាំ ទីលំនៅ ភូមិកំពង់ឃ្លាំង ឃុំ កំពង់ឃ្លាំង ស្រុកសូទ្រនិគម ខេត្តសៀមរាប។

            ទាក់ទងនឹងការចាប់ខ្លួនអ្នកកាសែតខាងលើនេះ ព្រះរាជអាជ្ញាអមសាលាដំបូងខេត្តសៀមរាប លោកទី សុវិនថាល់ បានឲ្យដឹងថា លោកហេង ផេង តំណាងអាយ្យកា សម្រេចឃាត់ខ្លួននៅនឹងតុលាការ ហើយបញ្ជូនទៅ ចៅក្រមស៊ើបសួរភ្លាមៗតែម្តង ពេលរូបគាត់ចូលបំភ្លឺករណីឆបោកប្រាក់។ ការឃាត់ខ្លួននេះ គឺមានបណ្តឹងពីជន រងគ្រោះ។ លោកបន្តថា អ្នកកាសែតរូបនេះ បានប្រព្រឹត្តិនូវអំពើឆបោក ជាច្រើនករណីមកហើយ ដោយប្រើ រូបភាពយកឈ្មោះចៅក្រម ឈ្មោះតំណាងអាយ្យកា ធ្វើជាដើមទុន បើទោះបីជាស្ថាប័នតុលាការ ផ្តល់ឪកាស ឲ្យកែប្រែ​គំនិតក៏ដោយ។

            លោកទី សុវិនថាល់ ឲ្យដឹងទៀតថា ជននេះបានដើរបោកប្រាស់យកលុយពី ក្រុមគ្រួសារអ្នកនេសាទ ខុសច្បាប់ដែលជាប់ពន្ធនាគារ  ដោយអះអាង ថា រូបគេអាចជួយដោះស្រាយបាន តាមរយៈចាយលុយជាមួយ ចៅក្រមឬតំណាងអាយ្យកា។ ក្រៅពីជនរងគ្រោះជាច្រើនគ្រួសារ រូបគេថែមទាំងបោក កូនខ្លួនឯងទៀត។នេះជា ទង្វើដែលមិនអាចអនុគ្រោះបានឡើយ។ ប៉ុន្តែលោកពុំបានបញ្ជាក់ពីអត្តសញ្ញាណ ម្ចាស់ដើមបណ្តឹងទេ។

            ក្រោយពេលឃាត់ខ្លួនអ្នកកាសែតរូបនោះ ព័ត៏មានធ្លាយថារូបគាត់ (អ្នកកាសែត) តែងតែនៅប្រចាំមុខ តុលាការ ចាំរត់ការរឿង(គួរជេរឿង) ហើយមានជនរងគ្រោះច្រើនណាស់ ដែលបានចំណាយប្រាក់លើគាត់ តែ លទ្ធផលគ្មាន។

            លោកឆោម ស៊ីថា ចាងហ្វាងការផ្សាយ កាសែតដំណឹងកម្ពុជា បានថ្លែងតាមទូរសព្ទ័ថា លោកទើបតែដឹង រឿងនេះទេ។ តែលោកនឹងសាកសួរសិនថា បើរូបគាត់ត្រូវចាប់ខ្លួន ក្នុងពេលបំពេញភារកិច្ច តាមវិជ្ជាជីវៈ លោក អាចរកវិធីដោះស្រាយ តែបើប្រព្រឹត្តិប្រាសចាក ពីតួនាទី លោកមិនអាចដោះស្រាយទេ។ លោកបន្តថា កូនចៅ លោករូបនេះ កន្លងមកតែងដើរបោកប្រាស់ពួកនេសាទ អះអាងថាខ្លួនមានខ្សែអ្នកនេះអ្នកនោះ លុះពេលលោក ដឹងលោកបានព្រមានជាច្រើនដងឲ្យបញ្ឈប់រាល់សកម្មភាពទាំងនោះ។ តែលើកនេះមិនដឹងថាគេធ្វើអ្វីទៀតទេ តែ បើការចាប់ខ្លួននេះ ពិតជាករណីនោះមែន លោកមិនអាចដោះស្រាយឡើយ។

            លោកចាងហ្វាងបញ្ជាក់ថា តាមពិតតាការ​សម្គាល់ខ្លួនរបស់គាត់ បានផុតកំណត់ទៅហើយ ហើយរូប លោកក៏មិនបានចេញថ្មីឲ្យទៀតដែរ ពីព្រោះមួយរយៈនេះ គាត់ធ្វើអ្វីមិនបានឆ្លងកាត់ចាងហ្វាងទេ ចឹងទេបើគ្មាន កាត ពីអង្គភាពទុកថាមិនមែនកូនចៅលោកទៀតឡើយ។

            ជាការកត់សម្គាល់ ខេត្តសៀមរាបនាពេលបច្ចុប្បន្ន គេសង្កេតឃើញមានការប្រើប្រាស់ កាតកាសែត ជាច្រើន ក្នុងនោះត្រឹមតែឈ្មួញរកស៊ីឈើខុសច្បាប់ ក៏ប្រើប្រាស់កាតកាសែតដែរ មិនដឹងថាលោកចាងហ្វាង បានគិតពីផលប៉ះពាល់ដល់របបសារព័ត៏មានដែរឬយ៉ាងណា?។

            គួររំលឹកថា កាលពីថ្ងៃទី១៩ឧសភាថ្មីៗនេះ អ្នកកាសែតជាតិសច្ចៈមួយរូបឈ្មោះហ៊ុន គឹមហេង ត្រូវបាន ចាប់ខ្លួន បញ្ជូនទៅដាក់ពន្ធនាគារ ពីបទជួញដូរគ្រឿងញៀន ៕អង្គរតូច