គណៈកម្មាធិការ​ជាតិ​រៀបចំការបោះឆ្នោត និងបង្កើត​គណៈកម្មការ​ ចម្រុះ​ស៊ើបអង្កេត​

គណៈកម្មាធិការ​ជាតិ​រៀបចំ​ការបោះឆ្នោត បានសម្រេច​បង្កើត​គណៈ​ក​ម្ម​ការចម្រុះ​មួយ​ដើម្បី​ស៊ើបអង្កេត​ទៅលើ​ភាពមិនប្រក្រតី​នៃ​ការបោះឆ្នោត ដើម្បី​ធ្វើយ៉ាងណា​ឲ្យ​គណបក្សនយោបាយ​ទាំងអស់​អស់ចិត្ត​ចំពោះ​លទ្ធផល​នៃ​ការបោះឆ្នោត​។​

​

លោក​ទេព នីថា បាន​និយាយថា ការប្រជុំ​បានសម្រេច​ប​ង្កើ​ត​គណៈកម្មការ​ចម្រុះ​មួយ ក្នុងនោះ​នឹងមាន​សមាសភាព​មកពី​គណៈកម្មាធិការ​ជាតិ​រៀបចំ​ការបោះឆ្នោត តំណាង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​ជា​សមាជិក​។ ចំណែក​តំណាង​មកពី​សង្គម​ស៊ីវិល ឬ​សហប្រជាជាតិ អាច​ដើរតួនាទី​ជា​អ្នកសង្កេតការណ៍​។​ លោកបាន និយាយបន្ថែមទៀតថា បន្តមកទៀតនឹងមានការពិភាក្សា អំពីអាណត្តិនិងភារកិច្ចរបស់គណៈកម្មការចម្រុះមួយនេះ។

ចំណែកលោក ព្រុំ សុខា តំណាងគណបក្សប្រជាជនកម្ពុជាវិញ បាននិយាយថា លទ្ធផល ប្រជុំថ្ងៃនេះមានន័យថា យើងកំពុងតែធ្វើដំណើរទៅមុខហើយ ។

ចំណែកលោក គួយ ប៊ុនរឿន តំណាងគណបក្សសង្រ្គោះជាតិ បាននិយាយថា ជាគោលការណ៍យើងនឹងបើកការស៊ើបអង្កេតមួយ។ គណៈកម្មការ នេះត្រូវបានបង្កើតឡើងបន្ទាប់ពីមានការតវ៉ាអំពីភាពមិនប្រក្រតីនៃការបោះឆ្នោត។

លទ្ធផល​ក្រៅផ្លូវការ​បង្ហាញថា គណបក្ស​ប្រជាជន​កម្ពុជា​ទទួលបាន​៦៨​អាសនៈ និង​គណបក្ស​សង្គ្រោះ​ជាតិ​ទទួលបាន​៥៥ អាសនៈ​​៕​ ប្រភពពី CEN