ការគ្រប់គ្រងមនុស្សគឺមិនមែនជាការងាយស្រួលនោះទេ មនុស្សគ្រប់រូបមានភាពវៃឆ្លាត មានការបទបែន មនុស្សខ្លះមានភាពក្រឡិចក្រឡុចលេមលើមអោបជើងអោបដៃ ហៃអើតម្រូវចិត្តមេ ទោះដឹងថាមេកំពុងដើរផ្លូវខុសក៏ដោយ អ្នកខ្លះនិយាយផ្សេងធ្វើផ្សេង ដែលទង្វើទាំងនេះធ្វើអោយអ្នកដឹកនាំមានការលំបាកក្នុងការគ្រប់គ្រង់ មិនថាអ្នកដឹកនាំគ្រួសារ ឬដឹកនាំប្រទេសនោះទេ។
គេសង្កេតឃើញថា នៅអាណត្តិទី០៥នេះ ប្រជាពលរដ្ឋហាក់បាត់បង់ជំនឿទៅលើគណបក្សកាន់អំណាច ព្រោះតែពួកគេមានការអាក់អន់ស្រពន់ចិត្តចំពោះទង្វើមន្រ្តីថ្នាក់ក្រោមដែលតែងតែជិះជាន់កៀបសង្កត់ អាងអំណាចនៅក្នុងដៃឃើញសថាខ្មៅ ឃើញខ្មៅថាជាស។ មន្រ្តីក្រោមឱវាតរបស់លោកនាយករដ្ឋមន្រ្តី ហ៊ុនសែន តែងតែធ្វើអ្វីលើសគោលការណ៍ ដែលថ្នាក់ដឹកនាំដាក់អោយ។
ជាក់ស្តែងដូចជា គេអោយសមត្ថកិច្ចទៅការពារក្បួនបាតុកម្មរបស់កម្មករ រោងចត្រ អោយទៅការពារក្បួនបាតុកម្មរបស់ពលរដ្ឋបុរីកីឡា បឹងកក់ ក្នុងការតវាទាមទារកយុត្តិធម៌អំពីជំលោះដីធ្លីជាដើម តែសមត្ថកិច្ចតែងតែធ្វើលើសគោលការណ៍ បែជាទៅប្រើអំពើហឹង្សា វាយដំប្រជាពលរដ្ឋអោយបែកក្បាលហូរឈាម ចាប់ដាក់គុគ បាញ់ទឹកដាក់ឡើងរបូតខោរបូតអាវ ដុតផ្ទះសំបែង ដែលទង្វើទាំងនេះហាក់សាហាវព្រៃផ្សៃ។
ម្យ៉ាងវិញទៀតក្រុមហ៊ុនដីសម្បទានសេដ្ឋកិច្ចឯកជនតាមខេត្តមួយចំនួន តែងតែរំលោភបំពានយកដីប្រជាពលរដ្ឋរហូតមានការតវា ប្តឹងផ្តល់ទៅអាជ្ញាធរដែនដី សមត្ថកិច្ចពាក់ព័ន្ធ តែអ្វីដែលពួកគេទទួលបានគឺភាពអយុត្តិធម៌ តែងតែចាញ់ក្តីជាមួយពួកវណ្ណៈអភិជនតែរហូត។
ពលរដ្ឋតែងតែនិយាយរិះគន់ជាចំហរថា មន្រ្តីថ្នាក់ក្រោមតែងតែលើកយករឿងល្អៗ ធ្វើជារបាយការណ៍ដាក់ជូនថ្នាក់លើ ដើម្បីឡើងបុណ្យឡើងសក្តិឡើងប្រាក់ខែ ឯទុក្ខលំបាករបស់រាស្រ្តគឺមិនដែលរាយការណ៍ជូនថ្នាក់លើនោះទេ។ រីឯប្រព័ន្ធផ្សបផ្សាយភាគច្រើនក៏ផ្សាយតែព័ត៌មានលើកជើងល្អៗតែរហូត មិនដែលផ្សាយរិះគន់ទង្វើអាក្រក់របស់អ្នកដឹកនាំថ្នាក់ក្រោមអោយថ្នាក់ដឹកនាំកំពូលបានដឹងនោះដែរ ដល់លទ្ធផលចុងក្រោយគឺធ្វើអោយថ្នាក់ដឹកនាំបាត់បង់ការជឿជាក់ពីប្រជារាស្រ្ត។
ពាក្យស្លោកមួយពោលថា ”សសើរអោយស្លាប់ បង្អាប់អោយរស់“ ពាក្យស្លោកនេះវាគ្រប់គ្រាន់សម្រាប់អោយមនុស្សទូទៅយកទៅពិចារណា។ ប្រពៃណីលើកជើងវាមិនចាត់ទុកថាមានកំហុសនោះទេ តែសូមលើកជើងតែរឿងដែលអ្នកគិតថា ត្រឹមត្រូវ កុំឃើញគាត់ធ្វើខុសហើយនៅតែលើកជើងទៀត នេះគឺវាមានន័យថា សសើរអោយស្លាប់ហើយ។
ពលរដ្ឋបានបញ្ចេញមតិក្រោយថ្ងៃបោះឆ្នោតអាណត្តិទី០៥នៅថ្ងៃទី២៨ ខែកក្កដា ឆ្នាំ២០១៣ថា ពួកគេមិនបានស្អប់ថ្នាក់ដឹកនាំកំពូលទេ តែពលរដ្ឋស្អប់ថ្នាក់ដឹកនាំថ្នាក់ក្រោម ដែលចូលចិត្តប្រព្រឹត្តិអំពើពុករលួយ កេងប្រវ័ញ ជិះជាន់ បក្សពួកនិយម មិនមានភាពយុត្តិធម៌ អ្នកមាន អ្នកមានអំណាចអាងខ្សែស្រឡាយ រកស៊ីខុសច្បាប់ ទង្វើទាំងនេះហើយដែលធ្វើអោយគណបក្សប្រជាជនបាត់បង់ប្រជាប្រិយភាព។
នៅមានចំណុចខ្វះខាតមួយចំនួនទៀតដែលរដ្ឋាភិបាលមិនបានចាប់អារម្មណនោះគឺ បញ្ហាប្រជាពលរដ្ឋអត់ការងារធ្វើ ទៅធ្វើការនៅស្រុកគេ ប្រព័ន្ធអប់រំចុះខ្សោយហើយមានភាពពុករលួយ តម្លៃកសិផល របស់កសិករតែងតែធ្លាក់ចុះនៅពេលដល់រដូវប្រមូលផល និស្សិតបញ្ចប់ការសិក្សាគ្មានការងារធ្វើ បើគ្មានបក្សពួក ឬខ្សែស្រឡាយ តំលៃអគ្គីសនីថ្លៃ ក្រុមហ៊ុនឯកជនជាអ្នកគ្រប់គ្រងចំណូលធំៗពីវិស័យទេសចរណ៍ យួនអន្តោប្រវេសចូលមករស់នៅខុសច្បាប់ក្នុងស្រុកខ្មែរ តំលៃប្រាក់ឈ្នួលរបស់មន្រ្តីរាជការ និងប្រាក់ឈ្នួលកម្មករទាបមិនអាចរស់បានស្រួល មេទាហ៊ានកេងស្បៀងសំភារៈប្រើប្រាស កាត់ប្រាក់ខែកងទ័ព បទល្មើសព្រៃឈើ ក្មេងទំនើង ការផ្សាយពាណិជ្ជកម្មគ្រឿងស្រវឹងពង្វគ់ក្មេងជំនាន់ក្រោយដែលខុសពីការចង់បានរបស់អាណាព្យាបាលជាដើម ។ល។ កត្តាទាំងអស់ខាងលើនេះហើយ ដែលធ្វើអោយពលរដ្ឋហាក់អស់ជំនឿទៅលើគណបក្សប្រជាជនដែលជាអ្នកកាន់អំណាច។
គ្មានអាណាព្យាបាល ឬថ្នាក់ដឹកនាំណាម្នាក់ចង់អោយប្រទេសជាតិរបស់ខ្លួនលិចលង់ ឬបាត់បង់ការជឿជាក់ពីពលរដ្ឋរបស់ខ្លួននោះទេ តែដោយសាតែមនុស្សនៅក្រោមឱវាតមិនគោលរពគោលការណ៍ថ្នាក់លើ មានគំនិតមិនស្មោះត្រង់ ចង់បានតែផលចំណេញផ្ទាល់ខ្លួន រហូតរំលោភបំពានអ្នកដ៏ទៃ ដែលឥទ្ធិពលអាក្រក់ទាំងអស់នេះ វាជះទៅលើថ្នាក់លើដោយមិនដឹងខ្លួនទៅវិញ។ វាជាការពិតណាស់នៅក្នុងសង្គមគ្រួសារ កូនចៅធ្វើខុសម៉ែឳជាអ្នកទទួលកំហុស ដូចពាក្យស្លោកមួយបានពោលថា ”ហាទៅវាស្លាក់ ខ្ជាក់ទៅវាស្លែង ស្តោះទៅវាលើទ្រូងឯង“។
ពលរដ្ឋកម្ពុជាកំពុងរងចាំមើលលទ្ធផលការបោះឆ្នោតអាណត្តិទី០៥កាលពីថ្ងៃទី២៨ ខែកក្កដា ឆ្នាំ២០១៣ថ្មីៗនេះថា តើគណបក្សប្រជាជនបន្តកាន់អំណាច ឬគណបក្សសង្រ្គោះជាតិជាអ្នកកាន់អំណាចវិញ?
ពលរដ្ឋចង់ដឹងទៀតថា បើគណបក្សប្រជាជនបន្តជាប់ឆ្នោត តើថ្នាក់ដឹកនាំនិងបំពេញតម្រូវការដែលពលរដ្ឋខ្មែរចង់បាន ហើយអាចលុបបំបាត់ទង្វើអាក្រក់របស់ថ្នាក់ក្រោមដែឬទេ នៅអាណត្តិថ្មីនេះ? ហើយបើគណបក្សសង្រ្គោះជាតិជាអ្នកជាប់ឆ្នោតវិញ តើបក្សនេះគោរពតាមសន្យាដែលបានលើកឡើងជាច្រើនចំណុចដែរឬអត់៕ដោយ៖ ផ្លុង-រ៉េត
.jpg)
.jpg)
.jpg)
.png)
.jpg)
.jpg)
