អធិការនគរបាលស្រុកសំពៅឡូន រងការរិះគន់ថា បង្ក្រាបបនល្បែង ចាប់មនុស្សគាបស៊ីម្នាក់៥០ម៉ឺនរៀល រួចដោះលែងវិញ

កម្លាំងនគរបាលអធិការដ្ឋានស្រុកសំពៅលូន ដឹកនាំដោយលោកអធិការរង ឈិត សេង បាន ចុះបង្ក្រាប សង្វៀនប្រជល់មាន់ដ៏ធំដុសស្លែ មួយកន្លែង កាលពី វេលាម៉ោង ៤និង៣០ នាទីល្ងាច ថ្ងៃទី១៧ ខែមីនា ឆ្នាំ២០១៤ នៅចំណុចបេងទ្រេត ស្ថិតក្នុងភូមិ ត្រពាំង ព្រលិត ឃុំសន្តិភាព ស្រុក សំពៅលូន ខេត្តបាត់ដំបង ព្រមទាំងរឹបអូស បានមាន់ជល់២ក្បាល ម៉ូតូ១២គ្រឿង អ្នកលែងល្បែង ១២នាក់ ធ្វើការអប់រំម្ចាស់ ទើបដោះលែង ឲ្យយកម៉ូតូ ត្រឡប់​ទៅផ្ទះវិញ។

គួរបញ្ជាក់ថា ក្នុងស្រុកសំពៅលូន ខេត្តបាត់ដំបង គឺជាតំបន់ជាយដែនកម្ពុជា ថៃ មានសមត្ថកិច្ចគ្រប់ស្ថាប័ន ដូចជា នគរបាល កម្លាំង អ ហ មេភូមិ មេឃុំ ចៅហ្វាយស្រុក ជាច្រើននាក់ឈរជើងនៅមូលដ្ឋាននោះ តែហាក់ដូចជា ថ្លោះ ត្រគៀក ជាប់ឆ្អឹងអស់  តែងតែដើរស្រែកតាមវេទិការសាធារណះថា យើងទាំងអស់គ្នាត្រូវអនុវត្តន៍គោលនយោបាយ ភូមិឃុំមានសុវត្ថិភាព ០៩ចំនុចរបស់ររាជរដ្ឋាភិបាល។

ផ្ទុយទៅវិញ ស្រុកសំពៅលូន គឺជាជង្រុកនៃបនល្បែង ដូចជាសង្វៀនជល់មាន់ បនល្បែងបៀរ អាប៉ោង ខ្លាឃ្លោក កន្ទុយលេខ គ្រប់ប្រភេទ មានវង់ល្បែងតូច ធំមិនតិចជាង១០ កន្លែងទេ ហើយវង់ល្បែងទាំងនោះ ត្រូវបានគេដឹងថា សុទ្ធតែជារបស់អ្នក មានលុយ មានអំណាច ក្នុងជួររាជការ។ វង់ល្បែងទាំងនោះលែងភ្នាល់ដើមផាន់ធំណាស់ គឺរាប់ម៉ឺន រាប់សែនបាត ហើយអាជីវកម្មទាំងនោះបានរលូន និងសុខសប្បាយតែរហូត មិនដែលឃើញមាន ស្ថាប័នណាចុះមកបង្ក្រាបទេ មានពេលខ្លះមានទាំងមន្ត្រីពាក់ស្បែកក៏មកលែងល្បែងភ្នាល់ដែរ។

ដោយឡែកប្រតិបត្តិការចុះបង្ក្រាបកាលពីម្សិលមិញនេះ ត្រូវបានក្រុមគ្រួសាររបស់អ្នកញៀនល្បែងម្ចាក់ សុំមិនបញ្ចេញ ឈ្មោះបានទូរសព្ទ័មកប្រាប់ សារពត៌មានអង្គរថែមស៍ នៅថ្ងៃទី១៨ ខែមិនា ឆ្នាំ២០១៤នេះថា ប្អូនប្រុសរបស់គាត់ត្រូវកូនចៅលោក ពេជ្រ សារ៉ែន អធិការនគរបាលស្រុកសំពៅលូន ចុះចាប់ខណះទៅលេង មាន់ជល់ ត្រូវបានគេយកទៅសួរនាំ គ្មានសួរអី ក្រៅពីរឿងមានលុយបង់ម្នាក់៥០ម៉ឺនរៀលឲ្យសមត្ថកិច្ចទើបរួចខ្លួន បើគ្មានប្រាក់បង់ទេ គឺ គេបញ្ជូនទៅដាក់គុក។ពេលនេះពួកគាត់បានបង់ប្រាក់ឲ្យនគរបាលទីនោះរួចរាល់ហើយ ទើបគេដោះលែងមកវិញ រួមជាមួយម៉ូតូ ក្រោមរូបភាពអបរំ។

ជុំវិញការចោទប្រកាន់នេះ សារពត៌មាន ពុំអាចសុំការអធិប្បាយពីលោក ពេជ្រ សារ៉ែន បាននៅឡើយទេ  ព្រោះទូរសព្ទ័មិនចូល៕ ដោយ កែវ នាង