អ្នកសារព័ត៌មានកម្ពុជាជាង១០០នាក់បានចូលរួមសិក្ខាសាលានៅប្រទេសថៃ

អ្នកសារព័ត៌មានកម្ពុជាជាង១០០នាក់បានធ្វើដំណើរទៅចូលរួមសិក្ខា សាលាអាស៊ាននៅសណ្ឋាគារ អ៊ិនឌូចិន ស្ថិតនៅក្នុងស្រុកអារ័ញ្ញខេត្តស្រះកែវប្រទេសថៃនៅព្រឹក ថ្ងៃទី២១ខែកក្កដាឆ្នាំ២០១២ក្រោមគណៈអធិបតីភាពលោក នូវ-សុវត្ថិរ៉ូ រដ្ឋលេខាធិការក្រសួងព័ត៌មានប្រចាំប្រទេសកម្ពុជា ព្រមទាំងលោកឆ័ត្រ-កិតតិនប់ឌុល អភិបាលរងខេត្តស្រះកែវ និងលោកប្រសិទ្ធ-សែងរុងរឿង ប្រធានសព័ន្ធ(យូម៉ា) ប្រចាំប្រទេសថៃ និងលោកសុខ-សុវណ្ណប្រធានសព័ន្ធប្រព័ន្ធផ្សព្វផ្សាយអាស៊ាន ប្រចាំប្រទេសកម្ពុជា រួមជាមួយអ្នកសារព័ត៌មានប្រទេសថៃ ប្រទេសវៀតណាម និងប្រទេស ភូមា សរុបជាង២៥០នាក់។

សិក្ខាសាលាប្រព័ន្ធផ្សព្វផ្សាយសហព័ន្ធអាស៊ាន( យូម៉ា ) មានគោលបំណងផ្លាស់ប្តូរបទពិសោធន៍រវាងគ្នាទៅវិញទៅមកដែល បានអនុវត្តការងារពាក់ព័ន្ធទៅនឹងសារព័ត៌មាន ក៏ដូចជាការចែករំលែកនូវបទពិសោធន៍ រវាងអ្នកកាសែតអាស៊ាន និងពង្រឹងកិច្ចប្រតិបត្តិការណ៍ សហការ ទំនាក់ទំនង រវាងអ្នកកាសែត ដែលមានប្រទេសព្រំប្រទល់ជាប់គ្នា ក្នុងការនាំយកព័ត៌មានពិតពីបណ្តារប្រទេសជិតខាងមក ធ្វើការផ្សព្វផ្សាយជូនដល់ប្រជាពលរដ្ឋ និងធ្វើឲ្យប្រជាពលរដ្ឋទទួលបាននូវប្រយោជន៍ពីវិស័យ សារព័ត៌មាន។

លោកឆ័ត្រ-កិតតិនប់ឌុល អភិបាលរងខេត្តស្រះកែវបានមានមតិស្វាគមន៍យ៉ាងកក់ក្តៅដល់ អ្នកកាសែត សមាគន៍សហព័ន្ធអាស៊ាន ដែលចេះសាមគ្គីគ្នា និងមានការទំនាក់ទំនងល្អរវាងប្រទេសជិតខាង ក្នុងការពិចារណាព័ត៌មាន មុនការផ្សព្វផ្សាយជូនដល់មហាជន។ លោកឆ័ត្រ-កិតតិនប់ឌុល បានគូសបញ្ជាក់ថា  ក្នុងនាមយើងជាអ្នកសារព័ត៌មាន ត្រូវតែនាំយកព័ត៌មានដែលបានផ្តល់នូវប្រយោជន៍ និងមិនគួរនាំយកព័ត៌មាន ដែលបង្កឲ្យមានភាពភ្ញាក់ផ្អើល ជ្រួលច្របល់ ដែលបណ្តាលឲ្យមានភាពចលាចលនាំអោយបាត់បង់ប្រយោជរាងខ្លួន និងមានការយល់ច្រឡំ។ លោកឆ័ត្រ-កិតតិនប់ឌុលបានបន្តថា អ្នកសារព័ត៌មានគឺជាកំលាំងសំខាន់ធំបំផុត ក្នុងការជួយដល់ប្រទេសជាតិ ដើម្បីការអភិវឌ្ឍន៍សង្គមជាតិ ផ្តល់ការរីកចំរើន គ្រប់វិស័យ តែបើគ្មានសារព័ត៌មាន សង្គមជាតិក៏ដើរមិនទាន់ពិភពលោក ថែមទាំងការអភិវឌ្ឍន៍មានភាពយឿតយ៉ាវទៀតផង។មិនតែប៉ុណ្ណោះ លោកឆ័ត្រ-កិតតិនប់ឌុល ផ្តោតសំខាត់ទៅលើសេដ្ឋកិច្ចរវាងប្រទេសថៃនិងប្រទេសកម្ពុជាដែល លោកចង់អោយរដ្ឋាភិបាលកម្ពុជាបើកច្រកមួយចំនួនបន្ថែមក្នុងខេត្ត ជាប់ព្រំប្រទល់ដើម្បីងាយស្រូលក្នុងការនាំទំនិញពីប្រទេសថៃមក កម្ពុជា និងពីកម្ពុជាទៅប្រទេសថៃដោយស្របច្បាប់។

ថ្លែងក្នុងឱកាសនោះដែរលោកនូវ-សុវត្ថិរ៉ូ រដ្ឋលេខាធិការ ក្រសួងព័ត៌មាន បានមានប្រសាសន៍ថា លោកក៏ជាអតីតអ្នកសារព័ត៌មានដូចគ្នាដែរ តែបើសិនជាយើងចង់លើកកម្ពស់វិស័យសារពត៌មានឲ្យមានតំលៃ និងមានការពេញនិយមពីមហាជនអោយមហាជនទទួលស្គាល់ នោះយើងជាអ្នកសារព័ត៌មានក៏ត្រូវតែនាំយកព័ត៌មានដែលជា ការពិត ព័ត៌មានដែលមានភាពយុត្តិធម៌ ស្មោះត្រង់ មិនលំអៀង មិនបង្កើតព័ត៌មានដោយគំនុំផ្ទាល់ខ្លួន ពេលនោះព័ត៌មានរបស់យើងនិងត្រូវបានទទួលស្គាល់ពីមហាជន និងមានការគាំទ្រ អោយតំលៃយ៉ាងពិតប្រាកដ។លោក នូវ-សុវណ្ណារ៉ូបានមានប្រសាសន៍បន្តថា អ្នកសារព័ត៌មានកន្លងមកមិនសូវសរសេរព័ត៌មានពាក់ព័ន្ធនិងសេដ្ឋ កិច្ច ដូច្នេះលោកសូមអោយអ្នកសារព័ត៌ព្យាយាមពាំនាំព័ត៌មានសេដ្ឋកិច្ច យកទៅផ្សព្វផ្សាយចែកជូនអោយប្រជាពលរដ្ឋបានដឹងបានយល់។លោក នូវ-សុវណ្ណារ៉ូបានបន្ថែមថា សូមអោយប្រធាន(យួមា)ប្រចាំប្រទេសថៃខាងលើជួយបើកវគ្គខ្លីៗ ដើម្បីបណ្តុះបណ្តាលដល់អ្នកសារព័ត៌មានកម្ពុជាមួយចំនួនដែលនៅទន់ ខ្សោយអោយបានយល់ដឹងរីកចំរើនទៅមុខព្រោះនៅប្រទេសកម្ពុជាមិនទាន់ មានមហាវិទ្យាល័យសារព័ត៌មាននៅឡើយទេ។

សូមបញ្ជាក់បន្ថែមថា សិក្ខាសាលាសមាគមន៍សហព័ន្ធយូម៉ា(UMA) ថ្ងៃនេះមានគោលបំណងចំបងគឺ ពង្រឹងសាមគ្គីភាព រិះរកគន្លឹះសំខាន់ៗដើម្បីធ្វើឲ្យយូម៉ា មានភាពរ៉ឹងមាំ ក្នុងការសហការព័ត៌មានក្នុងប្រទេសអាស៊ាន និងបន្តពង្រីកទៅប្រទេសដែលជាសមាជិកអាស៊ានបន្តទៀត និងជាពិសេសមានការគាំទ្រពីរដ្ឋមន្ត្រីក្រសួងព័ត៌មាន ដែលជំរុញឲ្យអ្នកកាសែត ទូរទស្សន៍ វិទ្យុ មានគុណភាពខ្ពស់ មានប្រយោជន៍ក្នុងការជួយអភិវឌ្ឍន៍ប្រទេសជាតិ៕