ខ្សែភាពយន្តប្រឆាំងអ៊ិស្លាមគំរាមកំហែងទំនាក់ទំនង បណ្តាប្រទេសអារ៉ាប់និងអាមេរិក

យោងតាមពួកអ្នកវិភាគថា បាតុកម្មទាំងឡាយដែលផ្ទុះរយៈពេលប៉ុន្មានថ្ងៃចុងក្រោយនេះ ក្នុងប្រទេសអារ៉ាប់ជាច្រើន ប្រឆាំងខ្សែភាពយន្តមួយផលិតនៅសហរដ្ឋអាមេរិក ដែលចោទថាប្រមាថដល់ព្រះមហាម៉ាត់ ធ្វើឱ្យប្រទេសអារ៉ាប់ទំាងឡាយស្ថិតក្នុងសភាពការណ៍រំខានមួយ ដែលញុំាងឱ្យមានការខូចខាតដល់ទំនាក់ទំនងរបស់ពួកគេជាមួយក្រុង វ៉ាស៊ិនតោន ។

លោកFAKHRY TAHTAWIសាស្ត្រាចារ្យវិទ្យាសាស្ត្រនយោបាយនៃសាកលវិទ្យាល័យ ក្រុងគែរ គូសបញ្ជាក់ថាព្រឹត្តិការណ៍ទាំងនោះ ជះឥទ្ធិពលខ្លាំងលើបណ្តាប្រទេសអារ៉ាប់ ដែលបង្ហាញតាមរយៈបាតុកម្មដោយខឹងសម្បាបំផុតតបចំពោះខ្សែភាពយន្ត ប្រឆាំងអ៊ិស្លាមនោះ ។ លោកបន្តថា សភាពការណ៍សនេះជំរុញ ឱ្យមានអន្តរាគមន៍មួយរបស់អាមេរិក ពិសេសការជ្រៀតជ្រែកខាងយោធា ឧទាហរណ៍ដូចជាការបញ្ជូនកងកម្លាំងជើងទឹកអាមេរិកនិងបណ្តានាវា ចម្បាំងមកកាន់ឆ្នេរសមុទ្រលីប៊ីក្រោយការសម្លាប់អ្នកការទូតអាមេរិក ៤នាក់នៅទីនោះមក ។

ផលវិបាកនានានៅអេហ្ស៊ីបអាចធ្ងន់ធ្ងរ ហើយញុំាងឱ្យអាមេរិកផ្អាកជំនួយរបស់ខ្លួន ហើយជំរុញឱ្យIMF បញ្ឈប់ការផ្តល់ប្រាក់កម្ចី និងឱ្យមានការផ្អាកវិនិយោគបរទេស មកពីអស្ថេរភាពក្នុងប្រទេស ។ខ្សែភាពយន្តប្រមាថដល់ព្រះមហាម៉ាត់នោះចាប់តាំងពីថ្ងៃទី១១ កញ្ញា មកនាំឱ្យមានរលកបាតុកម្មក្នុងប្រទេសអារ៉ាប់ជាច្រើនក្នុងនោះមាន អេហ្ស៊ីប លីប៊ី ទុយនីស៊ី និងយេម៉ែន ហើយដល់ប្រទេសបារំាងទៀត ។ បាតុករ៥នាក់ស្លាប់នៅយេម៉ែន ហើយមនុស្សម្នាក់ស្លាប់ នៅលីបង់ ។ កងកម្លាំងសន្តិសុខ បានបំបែកពួកបាតុករនៅទុយនីស៊ី ខណៈពួកគេប៉ុនប៉ងលុកចូលក្នុងស្ថានកុងស៊ុលអាមេរិក ។

ខណៈដែលបណ្តាប្រទេសអារ៉ាប់ ថ្កោលទោសខៃ្សភាពយន្តប្រឆាំងអ៊ិស្លាមនោះ តែប្រទេសទាំងនេះបានអះអាងពីការទទួលខុសត្រូវការពារបណ្តា បេសកកម្មការទូត និងបណ្តាស្ថានទូតបរទេសដែរ ។ចំណែកលោកTALAAT RAMEH អ្នកវិភាគនយោបាយអេហ្ស៊ីបម្នាក់ទៀតយល់ស្របដូចលោក TAHTAWI ដែរថា ទំនាក់ទំនងអារ៉ាប់-អាមេរិកឈានឆ្ពោះទៅស្រុតចុះ ។ លោកRAMEH បានដកស្រង់សម្តីប្រធានាធិបតីអាមេរិកលោកបារ៉ាក់អូបាម៉ា ដែលថ្លែងថា សហរដ្ឋអាមេរិកចាប់ពីពេលនេះទៅចាត់ទុកអេហ្ស៊ីប ពុំមែនជាសម្ព័ន្ធមិត្ត ឬពុំមែនជាសត្រូវមួយឡើយ ដោយកត់សម្គាល់ថាសភាពការណ៍គឺធ្ងន់ធ្ងរបំផុតសម្រាប់ទំនាក់ទំនង រវាងអេហ្ស៊ីបនិងសហរដ្ឋអាមេរិក ។

ក្រុងវ៉ាស៊ីនតោននឹងអាចផ្លាស់ប្តូរនយោបាយ របស់ខ្លួនចំពោះតំបន់ ប្រសិនបើការតវ៉ាប្រឆាំងផលប្រយោជន៍របស់ខ្លួនពុំអាចត្រួតត្រា បានទេនោះ ៕ ដោយ CCKNEWS