ធ្វើកូដកម្មបង្អត់អាហារ១២ឆ្នាំ ដើម្បីប្រឆាំងនឹងច្បាប់មួយ

ស្ត្រីជនជាតិឥណ្ឌា ម្នាក់បានធ្វើកូដកម្មបង្អត់អាហារខ្លួនឯងអស់រយៈពេល១២ឆ្នាំ ហើយមិនបង្ហាញសញ្ញាណាមួយថា គាត់ឈប់ធ្វើបែបនេះឡើយ នេះបើយោង​តាមអត្ថបទមួយចុះផ្សាយកាលពីថ្ងៃទី៩ខែវិច្ឆិកាឆ្នាំ២០១២។

អ្នកស្រី អ៊ីរ៉ុម សាមីឡា មកពីរដ្ឋម៉ានីពួរភាគឦសានក្នុងប្រទេសឥណ្ឌា មិនព្រមទទួលទានអាហារទេ ដើម្បីប្រឆាំងនឹងច្បាប់មួយ ដែលផ្តល់អំណាចឱ្យកងកម្លាំងប្រដាប់អាវុធសម្លាប់មនុស្សដោយគ្មានហេតុផល។ ស្ត្រីវ័យ៤០ឆ្នាំរូបនេះកំពុងជាប់ឃុំនៅក្នុងមន្ទីរពេទ្យមួយកន្លែងនិងត្រូវក្រុមគ្រូពេទ្យបង្ខំបញ្ចូលសារធាតុបំប៉នរាងកាយតាមរន្ធច្រមុះពីរដងក្នុងមួយថ្ងៃដោយសារតែគាត់មិនព្រមទទួលទានអាហាររហូតទាល់តែច្បាប់ស្តីពីអំណាចពិសេសរបស់កងកម្លាំងប្រដាប់អាវុធនេះត្រូវលុបចោល។

ច្បាប់នេះផ្តល់អភ័យឯកសិទ្ធិដល់កងកម្លាំងប្រដាប់អាវុធសម្រាប់រាល់ការធ្វើប្រតិបត្តិការនៅក្នុងតំបន់ដែលមានការបះបោរ។ គួររំឭកថា កាលពីថ្ងៃទី២ខែវិច្ឆិកាឆ្នាំ២០០០ ទាហានមួយក្រុមមកពីកងពលកាំភ្លើងវែង Assam Riflesដែលទទួលបានការពារពីច្បាប់នេះបានបាញ់សម្លាប់ជនស៊ីវិលអស់១០នាក់ដែលកំពុងឈរនៅចំណតរថយន្តក្រុងមួយក្នុងតំបន់ប្រជុំជន ម៉ាឡូម។

ទាហានទាំងនោះមានការក្តៅក្រហាយជាខ្លាំង បន្ទាប់ពីក្រុមបះបោរមួយក្នុងចំណោមក្រុមបះបោរជាច្រើននៅក្នុងរដ្ឋម៉ានីពួរ បានវាយប្រហារទាហានម្នាក់ប៉ុន្តែអ្នកដែលរងការសម្លាប់សងសឹកទាំងនេះគ្មានកំហុសទេ ហើយក៏មិនពាក់ព័ន្ធនឹងហេតុការណ៍ដំបូងនោះដែរ។

ចាប់តាំងពីនោះមក ស្ត្រីរូបនេះមិនព្រមទទួលទានអាហារ មិនផឹកទឹកនិងសូម្បីតែដុសធ្មេញក៏មិនដុសផង ទើបបណ្តាលឱ្យគាត់រងការចោទប្រកាន់ពីបទប៉ុនប៉ងធ្វើអត្តឃាតបែបនេះ៕