ឌួង ហ្សូរីដា បើក​បេះដូងទទួល​ស្នេហ៍មិន​រើសមុខ ទោះ​ធ្លាប់មានប្រ​ពន្ធ​៥០​ក៏ដោយ​

ឌួង ហ្សូរីដា បាន​ប្រកាស​ថា នឹង​ស្វាគមន៍ បើក​បេះ​ដូង​ទទួល​យក​ស្នេហា​ថ្មី នៅឆ្នាំ​២០១៣​នេះ ធ្វើឱ្យ​មាន​ការ​សង្ស័យ​ថា ហ្សូរីដា អាច​បែក​បាក់​ស្នេហា ចាស់ ដែល​នាង​ប្រកាស​ប្រាប់​កាលពី​​ឆ្នាំ​មុន​ទៅ​ហើយ ទើប​បាន​ជា​វាចា​បែប​នេះ។ ឌួង ហ្សូរីដា បាន​ច្រាន​ចោល ហើយ​នាង​បាន​អះអាង​ថា ចំណង​ស្នេហា​នាង​នៅ​តែ​ធម្មតា ហើយ​នាង​បាន​ប្រកាន់​ជំហរ​ថា មនុស្ស​ប្រុស ដែល​នាង​ជ្រើស​រើស មិន​ប្រកាន់​អតីត​កាល​ទេ ទោះ​ជា​ធ្លាប់​មាន​ប្រពន្ធ​១០ កូន​៥០នាក់ ឬប្រពន្ធ​ ៥០​នាក់ ក៏​ដោយ​...។

ខុសពីតារាល្បីៗមួយចំនួន ដែល​និយាយឱ្យតែបានល្អ​មើលពីខាង​ក្រៅ ប៉ុណ្ណោះថា ដាច់ខាតមិន​យកប្តីគេ ឬមិនប្រឡាក់ប្រឡូស​ជាមួយ​បុរសណា ដែលមានស្រីច្រើនជាដាច់ខាត យកតែប្រុសណានៅកំលោះសុទ្ធ អត់ពាក់ព័ន្ធជាមួយស្រីផ្សេងឡើយ ពិធីការិនីល្បីឌួង ហ្សូរីដា បាននិយាយថា  មនុស្សដែលនាងស្រលាញ់ មិនគិតប្រកាន់ពីអតីតកាល ទាំងអស់ រួមទាំងការធ្លាប់មានប្រពន្ធកូនផងដែរ។

ហ្សូរីដា ដែលមានឈ្មោះក្រៅថា ហ្សូ បាននិយាយ ដោយម៉ឺងម៉ាត់ថា “រាល់មនុស្សប្រុសដែលស្រលាញ់ខ្ញុំ គាត់នៅតែមិនទាន់ហួសពេលឡើយ ទោះបីជា មនុស្សប្រុសនោះ ធ្លាប់មានប្រពន្ធ១០ កូន៥០នាក់ ឬប្រពន្ធ៥០ ក៏ដោយ ឱ្យតែប្រុសនោះ មិនធ្លាប់ បានរៀបការ ឬមិនមានការចុះអេតាស៊ីវិលអី ជាមួយស្រីណា ខ្ញុំនៅតែអាចជ្រើសរើសយក បុរសនោះ ធ្វើជាមនុស្សពិសេសរបស់ខ្ញុំបាន ព្រោះធ្វើម៉េច បើយើងបានជាស្គាល់គាត់ ក្រោយគេទៅហើយ”។

ការអះអាងរបស់ឌួង ហ្សូរីដា នេះ ជាលើកទី១ មិនធ្លាប់មានសោះ តាំងពីនាងបាន ប្រឡូកសិល្បៈនេះ បានកើតឡើងបន្ទាប់ពីមាន ការផ្សព្វផ្សាយថា ឌួង ហ្សូរីដា បាន​ប្រកាសបើកបេះដូងទទួលយកម្ចាស់ស្នេហាថ្មី នៅ ដើមឆ្នាំ២០១៣នេះហើយ ដែលបុរសដែលលួចស្រលាញ់នាងយូរហើយ ទាល់តែប្រញាប់ រួសរាន់បន្តិច ទើបបាន បើ​យឺតយ៉ាវ ប្រាកដជា ខកចិត្តជាមិនខាន។ ឌួង ហ្សូរីដា បានយល់ថា មនុស្សប្រុសសម័យ នេះ កម្រមានអ្នកណាអត់ស្គាល់ជាតិស្រីសោះ ហើយ មកស្រលាញ់យើង​លើក​ដំបូងណាស់។

ហ្សូរីដា បានបន្ថែមថា “បើតាមខ្ញុំមើលទៅ វាគ្មានទេ សម្រាប់មនុស្សប្រុសណាបរិសុទ្ធ នៅកំលោះ មកស្រលាញ់យើងដំបូងគេនោះ មិនងាយទេ ច្រើនតែធ្លាប់មានសង្សារ​អីហើយ តែខ្ញុំមិនប្តូរចិត្តទេថា ទោះជាមនុស្សប្រុសម្នាក់នោះ មានកូនប្រពន្ធ៥០ ក៏ដោយ តែបើមិនទាន់ រៀបការ ឬមិនបានចុះអេតាស៊ីវិលទេ អត់បញ្ហា អាចស្រលាញ់​គ្នាបាន”។

ការប្រកាន់ជំហរបែបនេះរបស់ឌួង ហ្សូរីដា អាចធ្វើឱ្យអ្នកខ្លះយល់ថា ហ្សូរីដា ប្រហែល​ជា​ស្រ​លាញ់​ប៉ះ​ចំបុរសដែលមានម្ចាស់ចិត្តទៅហើយ ជាអ្នកមិនទំនេរ ទើប បានជា​នាង​អះអាងបែបនេះ តែ​អ្នកខ្លះទៀត​យល់ស្របថា ការអះអាងរបស់នាង ក៏ វាត្រូវនឹងសង្គមមនុស្សបច្ចុប្បន្នដែរ ពោលគឺទោះបីបុរស​នោះធ្លាប់​មានប្រពន្ធកូន ពីមុនមក តែបើ​ឥឡូវលែងពាក់ព័ន្ធ ក៏នារីមួយចំនួន នៅតែអាចទទួលយកបាន។ ពិធីការិនីរូបនេះ បានសង្កត់ធ្ងន់ទៀតថា “ខ្ញុំមិនប៉ះពាល់ប្តីនរណាម្នាក់ទេ គឺ ដូចខ្ញុំនិយាយ​ខាង​លើ​អ៊ីចឹង បើមិនទាន់រៀបការ ឬចុះអេតាស៊ីវិលទេ គឺ អត់បញ្ហាទេ។ មនុស្សស្រីយើង បើប៉ះពាល់ប្តីគេ គេមិនឱ្យតម្លៃ ឡើយ សង្គមនឹងពេបជ្រាយយើងជាមិនខាន៕