រថយន្តធួរីសដឹកឈើប្រណិតដែលមានមុខកាត់ធំៗមួយគ្រឿងរបស់ ចែញ៉ច (ឈ្មោះហៅក្រៅ) ដែលត្រូវបានគេស្គាល់ថា ជាភរិយារបស់លោក មិន-ចន្ថា អធិការស្រុកប្រាសាទបាគង ត្រូវបានអ្នកកាសែតហៅមេព្រៃអោយចាប់នៅវេលាម៉ោងប្រហែល១២ថ្ងៃត្រង់ ថ្ងៃទី២៦ ខែសីហា ឆ្នាំ២០១៤ ខណៈរថយន្តនេះបែកកង់នៅចម្ងាយប្រហែល១គឺឡូម៉ែត្រពីសង្កាត់រដ្ឋបាលព្រៃឈើស្រុកស្វាយលើ។
ប្រភពបានអោយដឹងថា ចែញ៉ច ជាឈ្មួញរកស៊ីដឹកឈើខុសច្បាប់ដុះស្លែរាប់សិបឆ្នាំមកហើយ មិនដែលមានសមត្ថកិច្ចណាហ៊ានចាប់រថយន្តដឹកឈើរបស់គាត់ទេ ដោយសមត្ថកិច្ចទាំងនោះខ្លាចអំណាចលោក មិនចន្ថា ដែលជាស្វាមី ដែលមានដំណែងជាអធិការស្រុកប្រាសាទបាគងខេត្តសៀមរាប។
អ្នកយកព័ត៌មានអោយកាសែត កម្ពុជាសុវណ្ណភូមិ បានអោយដឹងថា ពេលលោកឃើញរថយន្តដឹកឈើខាងលើ លោកបានចុចទូរស័ព្ទរាយការណ៍ជូនលោក យ៉ាន់ស៊ីវ័ត នាយសង្កាត់រដ្ឋបាលព្រៃឈើស្រុកស្វាយលើខាងលើ តែក្រុមហ៊ុនទូរស័ព្ទប្រាប់ថា លេខមិនមានក្នុងបណ្តាញ។ លោកបានចុចទូរស័ព្ទចូលលោក ទាគឹមសុទ្ធ នាយខណ្ឌរដ្ឋបាលព្រៃឈើខេត្តជាច្រើនដងតែមិនមានអ្នកលើកទូរស័ព្ទ។ អ្នកយកព័ត៌មានរូបនោះបានបើករថយន្តទៅដល់សង្កាត់រដ្ឋបាលព្រៃឈើស្រុកស្វាយលើ រាយការណ៍ជូនមន្រ្តីរដ្ឋបាលព្រៃឈើថាមានឡានដឹកឈើបែកកង់សូមជួយចាត់ការតាមផ្លូវច្បាប់ផង តែមេព្រៃម្នាក់ស្លៀកពាក់ឯកសណ្ឋានមេព្រៃដេកក្នុងអង្រឹង មិននិយាយតបជាមួយអ្នកកាសែតទេ ថែមទាំងទាញអង្រឹងគ្របមុខដេកធ្វើមិនដឹងមិនលឺអ្វីទាំងអស់។ ឃើញទង្វើអសកម្មបែបនេះទើបអ្នកកយកព័ត៌មានយើងបានសម្រេចចិត្តចុចទូរស័ព្ទទៅលោក ឯម មុន្នី អធិការខាងជើងបឹងទន្លេសាបទទួលបន្ទុកផ្នែកបង្ក្រាបបទល្មើសព្រៃឈើ ហើយលោក ឯម មុន្នី ឆ្លើយតបភ្លាមៗថា គាត់និងអោយកូបចៅគាត់ចុះទៅចាប់រថយន្តដឹកឈើខាងលើឥឡូវនេះភ្លាម ហើយអ្នកយកព័ត៌មានយើងក៏បានរាយការណ៍ជូនលោក កើត វណ្ណរ៉េត ព្រះរាជអាជ្ញាសាលាដំបូងខេត្តសៀមរាបផងដែរ។ ប្រហែល២០នាទីក្រោយមកទើបឃើញអស់លោកមេព្រៃសង្កាត់ខាងលើមកនាំយករថយន្តដឹកឈើខាងលើទៅទុកនៅសង្កាត់រដ្ឋបាលព្រៃឈើស្រុកស្វាយលើ ដោយមិនទំលាក់ឈើចេញពីរថយន្តទេ។
លោក យ៉ាន់-ស៊ីវ័ត នាយសង្កាត់រដ្ឋបាលព្រៃឈើស្រុកស្វាយលើ នៅព្រឹកថ្ងៃទី២៧នេះពុំអាចប្រាប់ពីចំនួនឈើនៅក្នុងរថយន្តធួរីសដែលចាប់បាននោះទេ ដោយលោកឆ្លើយថា លោកបានរាយការណ៍ជូនលោកនាយខណ្ឌរួចហើយ សូមអ្នកកាសែតសាកសួរទៅលោកនាយខណ្ឌចុះ ព្រោះឥឡូវលោកកំពុងជាប់ប្រជុំ។
នៅព្រឹកម៉ោង៩ថ្ងៃទី២៧ដដែលនេះយើងក៏ពុំអាចសុំការបំភ្លឺពីលោក ទា គឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាបបានដែរពាក់ព័ន្ធរយន្តដឹកឈើនិងចំនួនឈើខាងលើ ដោយលោកលើកទូរស័ព្ទហើយប្រាប់ថា មានការអីមកជួបខ្ញុំនៅខណ្ឌមក ព្រោះឥឡូវខ្ញុំជាប់ប្រជុំ រួចក៏បិតទូរស័ព្ទបាត់ទៅ។
គួររំលឹកផងដែរថា កាលពី២ឆ្នាំមុន ឈ្មួញរកស៊ីដឹកឈើខុសច្បាប់ម្នាក់ឈ្មោះ ចែផាត់ថាណា ដែលជាប្អូនស្រីបង្កើតរបស់ ចែញ៉ច និងត្រូវជាប្អូនថ្លៃរបស់លោក មិនចន្ថា អធិការស្រុកប្រាសាទបាគង បានដឹកឈើពេញមួយរថយន្តធួរីស នៅពេលអ្នកកាសែតតាមថតរូបប្រុងហៅសមត្ថកិច្ចអោយចាប់រថយន្តដឹកឈើនោះ ស្រាប់តែចែផាត់ថាណា ប្តឹងទៅស្ថាប័ណតុលាការថា អ្នកកាសែតតាមជំរិតទាប្រាក់១០០ដុល្លារ រហូតលោកមិនចន្ថាឃាត់ខ្លួនអ្នកកាសែត២រូបនោះយកទៅធ្វើសំណុំរឿងបញ្ជូនទៅតុលាការ អោយអ្នកកាសែតជាប់គុគ៣ខែ ចោលប្រពន្ធកូនដាច់បាយក្រហាយទឹកគួរអោយសង្វែកពេកក្រៃ នៃភាពអយុត្តិធម៌របស់ប្រព័ន្ធច្បាប់។
គេសង្កេតឃើញថា ការរកស៊ីដឹកឈើខុសច្បាប់របស់ប្រពន្ធលោក មិនចន្ថា នៅតែបន្តដោយរលួនមិនមានការទប់ស្កាត់ពីសមត្ថកិច្ចជំនាញ ឬស្ថាប័ណពាក់ព័ន្ធនោះទេ ដែលទង្វើបែបនេះត្រូវបានមជ្ឈដ្ឋានទូទៅគេរិះគន់ថា ប្រហែលជាមានអំពើពុករលួយជាប្រព័ន្ធ ទើបអាចរកស៊ីដឹកឈើខុសច្បាប់បានដោយរលួនបែបនេះ។
សូមបញ្ជាក់ថា កាលពីរសៀលថ្ងៃទី២៦ម្សិលមិញ មានមនុស្សម្នាក់បានខលទូរស័ព្ទមកចចារជាមួយអ្នកយកព័ត៌មានយើងថា អោយតែអ្នកយកព័ត៌មានយើងព្រមយកលុយជាថ្នូរនិងការដោះលែងឡានដឹកឈើខាងលើ នោះអ្វីៗនិងត្រូវបញ្ជប់ ទោះជាអ្នកយកព័ត៌មានយើងបានរាយការណ៍ដល់តុលាការក៏ដោយ ក៍គេអាចដោះលែងឡានដឹកឈើខាងលើបានដែរ ប៉ុន្តែអ្នកយកព័ត៌មានយើងមិនបានយល់ព្រមនិងការចចារនោះទេ ព្រោះនេះវាជាអំពើពុករលួយដែលសង្គមគេស្អប់ខ្ពើមជាទីបំផុត។
ពលរដ្ឋរងចាំមើលតើមេព្រៃខេត្តសៀមរាបគេចាត់ការបែបណាចំពោះរថយន្តដឹកឈើខុសច្បាប់របស់ ចែញ៉ច ដែលចាប់បានអូសចូលក្នុងសង្កាត់រដ្ឋបាលព្រៃឈើស្រុកស្វាយលើហើយនោះ ឬក៏ត្រូវស៊ីសស៊ុសគ្នាស្ងាត់ៗលួចដោះលែងទៅវិញ ឬ ត្រូវដកហូតទុកជាសម្បត្តិរដ្ឋតាមផ្លូវច្បាប់?៕ ដោយ៖ កម្ពុជាសុវណ្ណភូមិ
.jpg)
.jpg)
.jpg)
.png)
.jpg)
.jpg)
.jpg)