ម៉ូតូបុកម៉ូតូខ្ទាតទៅកណ្តាលផ្លូវត្រូវយីឌុបកិនពីលើបន្ត បណ្តាលឲ្យស្លាប់ម្នាក់ របួសម្នាក់

មនុស្សម្នាក់ត្រូវបានស្លាប់ និងម្នាក់ទៀតបានរង របួសធ្ងន់ត្រូវគេបញ្ជូនទៅសង្គ្រោះនៅមន្ទីរពេទ្យទាំងយប់ ក្រោយពីជួបគ្រោះថ្នាក់ចរាចរណ៍ រវាងម៉ូតូបុកជាមួយម៉ូតូ ហើយត្រូវរថយន្តយីឌុបកិនពីលើបន្ថែមទៀត កាលពីវេលាម៉ោង៦ល្ងាច ថ្ងៃទី១៩ ខែវិច្ឆិការ ឆ្នាំ២០១៤ លើកំណាត់ផ្លូវជាតិលេខ៥ ក្នុងភូមិសាលាដែង ឃុំឬស្សី ក្រោក ស្រុកមង្គលបូរី ខេត្តបន្ទាយមានជ័យ។

អធិការនគរបាលស្រុកមង្គលបូរី លោក ស៊ី ឌី បានឲ្យដឹងនៅថ្ងៃទី២០ ខែវិច្ឆិការ ឆ្នាំ២០១៤នេះ ថា ជនរងគ្រោះដែលស្លាប់បាត់បង់ជីវិតភ្លាមៗក្នុងហេតុការណ៍គ្រោះថ្នាក់ចរាចរណ៍នេះមានឈ្មោះសារ៉ាត់ ភេទប្រុស អាយុ៤៩ឆ្នាំ រស់នៅភូមិ៤ សង្កាត់ព្រះពន្លា ក្រុងសិរីសោភ័ណ។និង ម្នាក់ទៀតមិនទាន់ត្រូវបានគេស្គាល់អត្តសញ្ញាណនៅឡើយទេ ព្រោះរបួសធ្ងន់ត្រូវគេបញ្ជូន ទៅសង្គ្រោះនៅមន្ទីរពេទ្យភ្លាមៗ។

លោកអធិការបន្តថា មុនកើតហេតុម៉ូតូជនរងគ្រោះដែលស្លាប់បាត់បង់ជីវិតបានបុកគ្នាជាមួយ ម៉ូតូរបស់ភាគីម្ខាងទៀត ភ្លាមនោះក៏ត្រូវរថយន្តធុនធំ ពាក់ស្លាកលេខ ​ញ០៤៣៥ ភព៣ ​មកពីក្រោយបានកិនលើមនុស្សដែល កំពុងតែដេកដួល បណ្តាលឲ្យស្លាប់បាត់បង់ជីវិតតែម្តងទៅ។ខណះនោះអ្នកបើកបរបានបើក ទ្វាររត់បាត់ស្រមោលតែម្តង។

ក្រោយកើតហេតុកម្លាំងនគរបាលស្រុកមង្គលបូរី បានចុះអន្តរាគមន៍វាស់វែងបញ្ជូន ជនរង គ្រោះទៅពេទ្យ ទំនាក់ទំនងរកសាច់ញាតិសពមកទទួលយកទៅធ្វើបុណ្យតាមប្រពៃណី រឯម៉ូតូ និងរថយន្តត្រូវបាននគរបាលនាំយកទៅរក្សាទុកចាំដោះស្រាយគ្នាតាមផ្លូវច្បាប់៕