លោកព្រះរាជអាជ្ញារង លី សុផាណា ពុំទាន់សម្រេចចោទ ឬ មិនចោទប្រកាន់ លោក កឹម សុខា នៅ ឡើយទេ

តុលាការ​បាន​ចំណាយពេល​ជាង​៥​ម៉ោង ពោល​គឺ​ចាប់ពី​ម៉ោង​៨​និង​៣០​នាទី ក្នុង​ការសាកសួ​រលោក កឹម សុខា អនុប្រធាន​គណបក្ស​សង្គ្រោះ​ជាតិ ក្នុង​សំណុំរឿង ញុះញង់​ឱ្យ ប្រព្រឹត្ត​បទ​ឧក្រឹដ្ឋ ឬ ប្រព្រឹត្ត​អំពើ​បង្កឱ្យមាន​ភាពវឹកវ​រ ធ្ងន់ធ្ងរ​ដល់​សន្តិសុខ​សង្គម នៅ​ច្រើន កន្លែង​ក្នុង ប្រ​ទេស​កម្ពុជា ហើយជា​លទ្ឋផល លោក​ព្រះរាជអាជ្ញារង លី សុ​ផា​ណា ពុំ​ទាន់​សម្រេច​ចោទប្រកាន់ ឬ មិន​ចោទ ប្រកាន់​លោក​កឹម សុខា នៅឡើយ​ទេ។

​មុន​ពេល​ឈាន​ជើង​ចេញពី​តុលាការ លោក កឹម សុខា បាន​ថ្លែង​យ៉ាងខ្លី ថា “ រាល់​ការ ចោទប្រកាន់​របស់​តុលាការ លោក​សូម​ធ្វើការ បដិសេធចោល​ទាំងស្រុង ។ មេធាវី​ការពារ លោក​កឹម សុខា គឺ​លោក កែ​ត ឃី បាន​ថ្លែង​ផងដែរ​ថា ការសាកសួរ​នេះ​ត្រូវ​បាន​បិទ បញ្ចប់​ហើយ ពោល​គឺ​ពុំ​មាន​ការ​បន្ត​ទៅ ថ្ងៃ ស្អែក​ទៀត​ទេ ។ 

គួរបញ្ជាក់​ថា មូលហេតុ​ដែល​នាំឲ្យ​មាន​ការកោះហៅ​ចូល​ឆ្លើយ​នេះ គឺ​ដោយសារ​មើល ឃើញ​ពី​ភាព ចលាចល​ក្នុង​សង្គម​ប៉ះពាល់​ដល់​សន្តិសុខ​សណ្តាប់ធ្នាប់​សាធារណៈ យ៉ាងធ្ងន់ធ្ងរ នោះ កាលពី​ថ្ងៃ​ទី ៣ ខែ​មករា ឆ្នាំ​២០១៤ លោក​ព្រះរាជអាជ្ញា​អម​សាលាដំបូង​រាជធានី​ភ្នំពេញ បាន​ធ្វើ​ពាក្យ បណ្តឹង​ដែល​មាន​កម្មវត្ថុ​ប្តឹង​លោក​សម រង្សី លោក​កឹម សុខា លោក​រ៉ុង ឈុន  និង​បក្ខពួក​ពីបទ ញុះញង់​ឱ្យ​ប្រព្រឹត្ត​បទ​ឧក្រឹដ្ឋ ឬ ប្រព្រឹត្ត​អំពើ​បង្ក​ឱ្យ មាន​ភាពវឹកវរ ធ្ងន់ធ្ងរ​ដល់​សន្តិសុខ​សង្គម​។​

ពាក្យបណ្តឹង​នេះ​បាន​បង្ក​ជា​សំណុំរឿង​ព្រហ្មទណ្ឌ​លេខ​១៥ ចុះ​ថ្ងៃ​ទី​៣ ខែ​មករា ឆ្នាំ​២០១៤​  ដែល​មាន តំណាង​អយ្យការ ជា​ម្ចាស់​បណ្តឹងអាជ្ញា ហើយ​សំណុំរឿង​នេះ​មាន​ក្តោប ភស្តុតាង ជាច្រើន បញ្ជាក់ ពី​ពិរុទ្ឋភាព​របស់ ជនសង្ស័យ​នាក់​ទាំងបី ដូចជា​ករណី នៅ​ខេត្ត​កំពង់ចាម ក្រុង​បាវិត ខេត្ត​ស្វាយរៀង មុខ​រោងចក្រ​យ៉ាក ជីន ក្នុង​សង្កាត់​កំបូល ខណ្ឌ​ពោធិ៍​សែន​ជ័យ រាជធានី​ភ្នំពេញ ផ្លូវ​វ៉េងស្រេង ក្នុង​សង្កាត់​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ និង ករ​ណី​​ឡោមព័ទ្ធ​សាលា​ដំបូងរា​ជ​ធានី​ភ្នំពេញ ជាដើម​។​

​បន្ទាប់មក ប្រធាន​គណបក្ស​សង្គ្រោះ​ជាតិ លោក សម រង្ស៊ី និង​អនុប្រធាន លោក កឹម សុខា ព្រមទាំង​លោក រ៉ុង ឈុន ប្រធាន​សមាគម​គ្រូបង្រៀន​កម្ពុជា​ឯករាជ្យ បាន​ចូល​បំភ្លឺ​តាម ដីកាកោះ​របស់​តំណាង​អយ្យការ​អម​សាលាដំបូង​រាជធានី​ភ្នំពេញ រួចហើយ កាលពី​ព្រឹក ថ្ងៃទី​១៤ ខែ​មករា ឆ្នាំ​២០១៤ កន្លងទៅ ដើម្បី​ធ្វើ​ការឆ្លើយតប​ពី​ដំណើរ​រឿង​ញុះញង់ ឱ្យ​ប្រព្រឹត្ត​បទឧក្រិដ្ឋ ឬ ប្រព្រឹត្ត​អំពើ​បង្ក ឱ្យមាន​ភាពវឹកវរ​ធ្ងន់ធ្ងរ​ដល់​សន្តិសុខ​សង្គម ។​

​ចាប់តាំងពី​ពេលនោះ​មក តុលាការ​បាន​បន្ត​នីតិវិធី ដោយ​អញ្ជើញ​សមត្ថកិច្ច​និង តំណាង​ស្ថាប័ន ចូល​បំភ្លឺ​លើ​ករណី​នេះ​ដែរ ដើម្បីឲ្យ​ចំណាត់ការ​ក្នុង​សំណុំរឿង​នេះ មាន​តម្លាភាព​និង​យុត្តិធម៌ ៕