ដកតំណែងប្រធានមណ្ឌលសុខភាពកាចាញព្រោះទុកអោយស្ត្រីម្នាក់សម្រាលកូនលើបង់មុខមន្ទីរពេទ្យ

ប្រធាន​មណ្ឌល​សុខភាព​សង្កាត់​កាចា​ញ ក្រុង​បាន​លុង ខេត្ត​រតនគីរី ត្រូវបាន​ដក​ចេញ​ ក្រោយពី​មានការ​ចោទ​ពី​ប្រជាពលរដ្ឋ​ថា មិន​យកចិត្តទុកដាក់​ក្នុងការ​ព្យាបាល អ្នក​ជំងឺ និងបាន​​ទុក​​អោយ​​ស្ត្រីម្នាក់​​ឆ្លងទន្លេ​នៅលើ​បង់​រង់ចាំ​មុខ​មណ្ឌល​សុខភាព​។

លោក កឹងសាវ៉ាត ប្រធាន​មណ្ឌល​សុខភាព​សង្កាត់​កាចា​ញ ខាង​លើ​នេះ ត្រូវបាន​​​ដក​​តំណែង​ពី​ប្រ​ធាន​មណ្ឌល​ខុស​ភាពអោយ​​​ទៅ​បម្រើ​ការងារ​នៅ​មន្ទីរ​សុខាភិបាល​វិញ នៅ​រសៀល​ថ្ងៃទី០​៣ ខែវិច្ឆិកា ឆ្នាំ​២០១៥ ដោយ​ប្ដូរ​ឲ្យ​លោក យឿ​ង​ពុទ្ធា បុគ្គលិក​មន្ទីរ​សុខាភិបាល​ខេត្ត មកជា​ប្រធាន​មណ្ឌល​សុខភាព​ជំនួស​វិញ​ ក្រោយពី​ប្រពល​រដ្ឋ​នៅ​សង្កាត់​កា​ចាញបាន​រិះគន់​ដោយ​ចោទ​ថា ប្រធាន​មណ្ឌល​សុខ​ភាពមិន​យកចិត្តទុកដាក់​ចំពោះ​អ្នកជំងឺ និង​ទុក​ឲ្យ​ស្ត្រី​ម្នាក់ ឆ្លងទន្លេ​នៅលើ​បង់​រង់ចាំ​មុខ​មណ្ឌល​សុខភាព​យ៉ាង​វេទនាបំផុត។

លោក ទន់ពៅ ​ចៅសង្កាត់​កាចា​ញ​បានបញ្ជាក់​តាម​ទូរស័ព្ទ​នៅ​រសៀល​ថ្ងៃនេះ​ថា ការផ្លាស់ប្ដូរ​ប្រធាន​មណ្ឌល​សុខភាព​នេះ ជា​នីតិវិធី​របស់​មន្ទីរ​សុខាភិបាល ក្នុងនាម​លោក​ជា​អជ្ញាធរ​ដែនដី គ្រាន់តែ​ចង់​ធ្វើយ៉ាងណា​ឲ្យ​យ​ប្រធាន​មណ្ឌល​សុខភាព​ថ្មី បម្រើ​ប្រជាពលរដ្ឋ និង​បង់​សេវា​ផ្សេងៗ​ឲ្យ​បានល្អ​ប្រសើរ​តែប៉ុណ្ណោះ​។

រីឯ​លោក យឿ​ងពុទ្ធា ជា​ប្រធាន​មណ្ឌល​សុខភាព​ទើប​កាន់តំណែង​ថ្មី បាន​ឲ្យ​ដឹង​តាម​ទូរស័ព្ទ​ថា លោក​នឹង​ខិតខំ​ធ្វើយ៉ាងណា​បម្រើ​ការងារ បម្រើសេវា​សុខភាព​ជូន​ប្រជាពលរដ្ឋ ក្នុងភូមិ ក្នុង​សង្កាត់​ឲ្យ​បានល្អ​។

ប្រជាពលរដ្ឋ​រស់នៅក្នុង​សង្កាត់​កាចា​ញ មានការ​ត្រេកអរ និង​សាទរ​យ៉ាងខ្លាំង ខណៈ​មានការ​ផ្លាស់ប្ដូរ​ប្រធាន​មណ្ឌល​សុខភាព​សង្កាត់​កាចា​ញ​នេះ​។ ពួកគាត់​សង្ឃឹមថា មណ្ឌល​សុខភាព​សង្កាត់​កា​ចាញ នឹងមាន​សេវា​បម្រើ​សុខភាព​ដល់​ពួក​គាត់​បាន​ល្អ​​ជាង​មុន​ជាក់​ជាមិនខាន​។

គួរ​បញ្ជាក់ថា កាលពី​ថ្ងៃទី​២៩ ខែវិច្ឆិកា ឆ្នាំ​២០១៥ ស្ត្រី​ម្នាក់ បាន​ឆ្លងទន្លេ​នៅលើ​បង់​អង្គុយ​រង់ចាំ​មុខ​មណ្ឌល​សុខភាព បង្ក​ឲ្យ​មានការ​ភ្ញាក់ផ្អើល​ដល់​ប្រជាពលរដ្ឋ ហើយ​ក៏បាន​រិះគន់​ដល់​ប្រធាន​មណ្ឌល​សុខភាព​ថា មិនមែនជា​លើកទីមួយ​ទេ ដែល​ប្រធាន​មណ្ឌល​សុខភាពខាង​លើ​នេះ​​មិន​យកចិត្តទុកដាក់​លើ​ស្ត្រី​មាន​ផ្ទៃពោះ​ឆ្លងទន្លេ​នៅ​មណ្ឌល​សុខ​ភាព​នេះ៕​