នៅយប់ម៉ោង១និង២៧នាទី រំលងអាធ្រាតថ្ងៃទី២៦ឈានចូលទី២៧ ខែឧសភា ឆ្នាំ២០១៦មានរថយន្តម៉ាកតូយូតា១បាំងកន្លះព័ត៌ក្រហមពាក់ស្លាកលេខ ភ្នំពេញ 2H-2910 ដឹកឈើប្រភេទលេខ១ពេញ ដែលម្ចាស់រថយន្តជាអង្គរក្សរបស់លោក ហ៊ីងប៊ុនហៀង ត្រូវបានមេព្រៃបង្ក្រាបទៅតាមផ្លូវច្បាប់នៅចំនុចភូមិព្រៃគុយ សង្កាត់អំពិល ក្រុងសៀមរាប។
ប្រភពព័ត៌មានពីក្រុមអ្នកសារព័ត៌មាន១ក្រុមបានអោយកម្ពុជាសុវណ្ណភូមិដឹងថា នៅម៉ោងជាង១រំលងអាធ្រាតខាងលើមានប្រជាពលរដ្ឋបានរាយការណ៍មកថា មានរថយន្តដឹកឈើដឹកយកទៅទម្លាក់នៅផ្ទះមួយដែលមានចម្ងាយប្រហែល១ពាន់ម៉ែត្រ(១គឺឡូដី)ពីកែងស្វាយធំផ្លូវជាតិលេខ៦(ខាងជើងផ្លូវជាតិលេខ៦ផ្លូវឆ្ពោះទៅព្រះដាក់)ដែលត្រូវបានពលរដ្ឋលួចបង្ហើបថា ម្ចាស់ផ្ទះឈ្មោះ យាយម៉ៅ (ឈ្មោះហៅក្រៅ)មានមាឌធំខ្មៅហើយធាត់។ អ្នកយកព័ត៌មានបានបន្តថា ពួកគេបានព្យាយាមឃ្លាំមើលមិនយូរប៉ុន្មានក៏ឃើញរថយន្ត២គ្រឿងដឹកឈើចូលទៅទម្លាក់នៅផ្ទះយាយម៉ៅដូចការរាយការណ៍របស់អ្នកភូមិ។ ឃើញដូច្នេះអ្នកសារព័ត៌មានបានទៅដល់មុខផ្ទះយាយម៉ៅងដង្ខៅឈើមិនទាន់បានថតរូបផងស្រាប់តែកូនប្រុសយាយម៉ៅនិងបក្ខពួកជិត១០នាក់នាំគ្នាទាញក្វែវ ផ្កាក់ ដំបង បម្រុងមកកាប់ឡានអ្នកកាសែត តែមានមនុស្សស្រី២នាក់បានព្យាយាមឃាត់ពួកគេអោយចូលទៅក្នុងផ្ទះវិញ។
ភ្លាមនោះក្រុមអ្នកកាសែត បានទូរស័ព្ទរាយការណ៍ទៅលោក យឹមស៊ីវន នាយសង្កាត់រដ្ឋបាលព្រៃឈើក្រុងសៀមរាប តែលោកបានប្រាប់ថា អោយទូរស័ព្ទទៅលោក វែងលី មន្រ្តីរដ្ឋបាលព្រៃឈើស្រុកប្រាសាទបាគងវិញ។
ប្រហែល២០នាទីក្រោយពេលកើតហេតុលោក វែងលី បានបើករថយន្តទៅដល់ កន្លែងកើតហេតុ ហើយបានឃាត់រថយន្តតូយូតាមួយគ្រឿងខាងលើ តែរថយន្ត១បាំងកន្លះមួយគ្រឿងទៀតដែលទម្លាក់ឈើអស់បានបើករតបាត់ ចំណែកឯឈើដែលបានទម្លាក់ទៅលើកដីក្នុងរបងយាយម៉ៅ១រថយន្តទៀតនោះ ត្រូវបានម្ចាស់ផ្ទះខាងលើយករថយន្តម៉ាកហៃលេនដឺពណ៍ទឹកប្រាក់១គ្រឿងដឹកចេញទៅអស់។
រថយន្តដឹកបទល្មើស និងឈើពេញ១រថយន្តដែលមេព្រៃប្រាប់ថាជាឈើប្រភេទតាសេក ត្រូវបានលោក វែងលី មន្ត្រីរដ្ឋបាលព្រៃឈើស្រុកប្រាសាទបាគងហែរហមអមដំណើរជូនយកទៅទុកនៅ ផ្នែករដ្ឋបាលព្រៃឈើស្រុកបន្ទាយស្រីទាំងយប់តាមនិតិវិធីច្បាប់។
សូមបញ្ជាក់ថា នៅក្នុងរថយន្តដឹកឈើខាងលើមានព្យួរកាតអង្គរក្សដែលចេញដោយលោក ហ៊ីង ប៊ុនហៀង ហើយនៅលើកាតនោះសរសេរថា៖ អគ្គបញ្ជាការដ្ឋាន បញ្ជាការដ្ឋានអង្គរក្ស ឈ្មោះសានសែន (SAN SEN) ថានន្ទរស័ក្កិ អនុសេនីយ៍ឯក មុខងាអង្គរក្ស ចេញប័ណ្ណថ្ងៃទី០១ខែធ្នូឆ្នាំ២០១៥ ផុតកំណត់ថ្ងៃទី៣១ ខែធ្នូ ឆ្នាំ២០១៦ ហត្ថលេខានិងត្រា នាយឧ.ផ្កាយមាស៤ ហ៊ីង ប៊ុនហៀង។ ចំណែកឯនៅកៅអីតៃកុងមានព្យួរអាវ១ប៉ារ៉ាមានស្លាកសញ្ញាខេមរភូមិន្ទ មានឈ្មោះថា សំ ប្រុស។
លោក សាន សែន បានបកស្រាយប្រាប់អ្នកកាសែត និងមេព្រៃនៅក្នុងហេតុការណ៍នោះថា ក្រុមលោកពុំបានទាញខ្វែវ ផ្កាក់ ដំបង បម្រុងប្រើហឹង្សាលើអ្នកកាសែតនោះទេ ក្រុមដែលទាញខ្វែវ ផ្កាក់ ដំបង នោះគឺជាកូនយាយម៉ៅ និងបក្ខពួក ដែលជាម្ចាស់ផ្ទះអ្នកទិញឈើពីពួកលោកតែប៉ុណ្ណោះ។ លោក សានសែន បន្ថែមថាឈើខាងលើពួកលោកដឹកគ្រាន់យកលុយចាក់សាំង និងហូបបានទឹកតែប៉ុណ្ណោះ។
អ្នកយកព័ត៌មានសង្កេតឃើញថា នៅពេលមេព្រៃទៅដល់សុំយកឡាននិងឈើ លោក សានសែន មិនបានបដិសេធន៍ ឬក្អេងក្អាដូចក្អាត់ចូលក្អមដូចកូន យាយម៉ៅឡើយ គឺលោកបានប្រគល់ឡាននិងឈើអោយមេព្រៃតាមសំណើរ។
ពលរដ្ឋនៅភូមិព្រៃគុយសូមអំពាលនាវដល់អាជ្ញាធរដែនដីក្នុងសង្កាត់អំពិល និងសមត្ថកិច្ចគ្រប់ជាន់ថ្នាក់មេត្តាបញ្ឈប់ការចរាចរណ៍ឈើ ឬការលក់ទិញដូរឈើនៅផ្ទះយាយម៉ៅនេះទៅ ព្រោះពេលយប់លាន់លឺប្រេវប្រាវតូងតាង ផឹកស៊ីវ៉ែវ៉ដូចគ្មានទើសក្បាលអ្នកណាអញ្ចឹង ម្យ៉ាងវិញទៀតដើម្បីចូលរួមទប់ស្កាត់បទល្មើសព្រៃឈើទៅតាមប្រសាសន៍ សម្តេចនាយករដ្ឋមន្ត្រី ហ៊ុនសែនផង។ ហើយពលរដ្ឋក៏សូមសំនូមពរទៅលោក ឧត្តមសេនីយ៍ផ្កាយមាស៤ ហ៊ីង ប៊ុនហៀងផងដែរ សូមកុំអោយកូនចៅធ្វើកាតដើររកស៊ីឈើព្រោះវាអាចខូចកិត្តិយសដល់ឯកឧត្តម ដែលធ្លាប់តែមានស្នាដៃល្អៗរាប់មិនអស់៕ ដោយ៖ ផ្លុងរ៉េត
.jpg)
.jpg)
.jpg)
.png)
.jpg)
.jpg)
.JPG)
