កាលពីថ្ងៃទី០១ខែកក្កដាឆ្នាំ២០១៧ មានសេចក្តីរាយការពីពលរដ្ឋមកថា លោក ក្អោប រ៉ន ចៅសង្កាត់ជ្រាវ និងលោក គង់ មង្គល ប្រធានសហគមប្រើប្រាសទឹកសង្កាត់ជ្រាវ ជាអ្នកនៅពីក្រោយខ្នងនៃការឈូសឆាយព្រៃលិចទឹកចំនួន៤ហិកតា ស្ថិតនៅតំបន់បី ក្រោមទ្រនប់លេខ៧៨ ក្បែរទ្រនប់ប្រហួត ក្នុងភូមិជ្រាវ សង្កាត់ជ្រាវ ក្រុងសៀមរាប។
ជាក់ស្តែងកាលពីល្ងាចថ្ងៃទី០៦កក្កដាឆ្នាំ២០១៧ម្សិលមិញនេះ អ្នកសារព័ត៌មានយើងបានចុះទៅដល់កន្លែងព្រៃលិចទឹកដែលរងការឈូសឆាយនោះ បានសង្កេតឃើញថា ដី២ប្លង់ មានទំហុំប្រហែលជា៤ហិចតាដែលពីមុននេះបន្តិច ពោពេញទៅដោយព្រៃលិចទឹកមានពណ៍ខៀវស្រងាត់ នៅតំបន់៣ ដែលជាតំបន់ហាមឃាត់ សំរាប់ត្រីពងកូននៅរដូវវស្សា ពិតជាត្រូវបានគេឈូសឆាយកាយដុតឡើងក្លាយជាវាលរហោឋានគួរអោយសង្វេកពិតប្រាកដមែន។
លោក គង់ មង្គល ប្រធានសហគមប្រើប្រាសទឹកសង្កាត់ជ្រាវ បានប្រាប់ កម្ពុជាសុវណ្ណភូមិ តាមទូរស័ព្ទនៅព្រឹកថ្ងៃទី០៧កក្កដានេះថា លោកមិនមែនជាអ្នកនៅក្រោយខ្នងដូចការចោទប្រកាន់នោះទេ ព្រោះនៅពេលលោកចុះទៅដល់កន្លែងដីដែលឈូសឆាយខាងលើ គេឈូសរួចអស់ទៅហើយ លោកមិនបានជាប់ពាក់ព័ន្ធអ្វីទាំងអស់។ លោក គង់ មង្គល បានបន្ថែមថា តាមលោកដឹកដីខាងលើនេះមេភូមិមេឃុំបានលក់អោយទៅអ្នកមានម្នាក់នៅក្រុងភ្នំពេញតាំងពីឆ្នាំ២០០៥មកម្លេះ ហើយការឈូសឆាយខាងលើប្រហែលជាម្ចាស់ដីគេជួលគ្រឿងចក្រ អោយទៅឈូស បន្ទាប់ពីលោក គង់ ប៊ឹប ធ្វើផ្លូវមួយខ្សែក្បែរដីដែលឈូសនោះ ក្នុងការជីកស្រះកាយយកអាចម៌ដីមកចាក់ដីឡូល៍របស់គាត់។
លោក ក្អោប រ៉ន អតីតចៅសង្កាត់ជ្រាវនៅព្រឹកថ្ងៃទី០៧នេះបានប្រាប់តាមទូរស័ព្ទផងដែរថា លោកក៏មិនមានការជាប់ពាក់ព័ន្ធចំពោះការឈូសឆាយដីព្រៃ៤ហិកតាខាងលើនេះដែរ ហើយលោកក៏ពុំទាន់បានចុះទៅដល់កន្លែងកើតហេតុនៅឡើយផង។ លោក ក្អោប រ៉ន បានបញ្ជាក់បន្ថែមថា លោកមិនដឹងរឿងទេ ហើយលោកក៏មិនស្គាល់ម្ចាស់ដីជាអ្នកណាដែរ បើទោះជាលោកធ្លាប់ធ្វើជាមេឃុំចៅសង្កាត់ជាច្រើនឆ្នាំក៏ដោយ។
លោក នួន មុនី ប្រធានបរិស្ថាន ខេត្តសៀមរាប នៅម៉ោង១១និង៤៨នាទីព្រឹកថ្ងៃទី០៧នេះ មិនអាចសុំការពន្យល់បានទេពាក់ព័ន្ធទៅនឹងការឈូសឆាយព្រៃលិចទឹក៤ហិកតាខាងលើក្រោមការគ្រប់គ្រងរបស់មន្ទីរបរិស្ថានខេត្ត ព្រោះទូរស័ព្ទចូលមិនមានអ្នកលើកទទួល។
លោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទ បានប្រាប់កម្ពុជាសុវណ្ណភូមិតាមទូរស័ព្ទនៅម៉ោង១១និង៥១នាទីប្រឹកនេះផងដែរថា លោកបានអោយមន្ត្រីជំនាញចុះទៅដល់កន្លែងឈូសឆាយខាងលើហើយ តែទៅមិនទាន់ម្ចាស់អ្នកឈូសដី និងគ្រឿងចក្រដែលឈូសឆាយនោះ។ លោកបានបន្ថែមថា លោកកំពុងស្រាវជ្រាវរកអ្នកឈូសឆាយខាលើ បើដឹកថា អ្នកណាជាអ្នកឈូសសូមជួយប្រាប់ផង។
ព្រៃលិចទឹកតំបន់បី ដែលជាតំបន់ហាមឃាត់ សំរាប់ជាជំរកជីវ:ចំរុះ ជំរកត្រី ត្រីពងកូន ៤ហិកតា ត្រូវបានគេឈូសឆាយក្លាយជាវាលរហោឋាន ហើយដុតព្រៃដែលបានឈូសឆាយ បំផ្លាញភស្តុតាង បន្សល់តែផេះ ហើយនិងដីដ៏ស្រឡះវាលល្វឹង សំរាប់អោយជំនាញធ្វើការស៊ើបអង្កេតតែប៉ុណ្ណោះ។
ពលរដ្ឋនៅសង្កាត់ជ្រាវរិះគន់ថា បើពួកគាត់ជាអ្នកក្រីក្រ សុំចូលរកអុសក៏មិនបានដែរ តែសំរាប់អ្នកមាន អ្នកមានអំណាចចង់ឈួសឆាយព្រៃ កាយដីជិតដល់ក្បាលប្រែត ក៏ថ្នាក់លើចាប់មិនបានដែរ តើនេះបណ្តាលមកពីមូលហេតុអ្វី មកពីអំណាច ឬមកពីដុល្លារអាមេរីកកាំង? ពលរដ្ឋបាននិយាយទាំងអស់ចំណើចថា បើចង់រកអ្នកឈូសព្រៃមានអីពិបាក ចាប់តែម្ចាស់ដីដាក់គុគទៅចេញអ្នកឈូសហើយ ព្រោះបើម្ចាស់ដីមិនជួលអោយគេទៅឈូស តើមានអ្នកណាក៏មានសណ្តានចិត្តល្អ ទៅជួយឈួសព្រៃលើដីរបស់គេដោយមិនបានទទួលកំរៃ ហើយប្រឈរមុខចំពោះផ្លូវច្បាប់ទៀតនោះ។
ពលរដ្ឋនៅសង្កាត់ជ្រាវគាត់សម្តែងការខកចិត្តចំពោះការឈូសព្រៃលិចទឹកខាងលើនេះ ព្រោះពួកគាត់មួយចំនួនជាអ្នកធ្វើស្រែ ដាំបន្លែ និងជាអ្នកនេសាទ ដោយពួកគាត់គិតថា បើមានព្រៃអោយត្រីពងកូនច្រើន ពួកគាត់ក៏សម្បូរត្រីហូបដែរ តែបើត្រីធម្មជាតិដាច់ពូជហើយនោះ មានតែនាំគ្នាទិញត្រីប្រាស៊ី អាចម៌ យកមកស៊ី ដូចលោកតា ស៊ុច ទេសនាតែប៉ុណ្ណោះ។
ពលរដ្ឋសង្កាត់ជ្រាវ សុំអោយលោក នួន មុនី ប្រធានមន្ទីរបរិស្ថានខេត្ត លោក ទា គឹមសុទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្ត លោក ឃឹម ប៊ុនសុង អភិបាលខេត្ត លោក កើត វណ្ណរ៉េត ព្រះរាជអាជ្ញាសាលាដំបូងខេត្ត មេត្តវែកមុខម្ចាស់ដីឈូសព្រៃលិចទឹកខាងលើនេះ យកមកដាក់ទោសអោយបានធ្ងន់ ហើយដាំដើមឈើឡើងវិញ នៅលើដីដែលបានឈូសនេះផង ដើប្បីជាប្រយោជន៍រួមរបស់រដ្ឋ និងរាស្ត្រទៅថ្ងៃអនាគត់៕ ដោយ៖ ផ្លុងរ៉េត
.jpg)
.jpg)
.jpg)
.png)
.jpg)
.jpg)
