ប្លែកៗ៖ យកដីសួនច្បារ និងចំណីផ្លូវធ្វើជាផ្សារឯកជន ចៅហ្វាយក្រុងមើលមិនឃើញ

ដីសួនច្បារ និង​ផ្លូវ​សាធារណះ​​មួយ​កន្លែង​ស្ថិត​ក្នុង​ភូមិ​វិហ៊ារចិន សង្កាត់ស្វាយ​ដង្គំ ក្រុង​សៀមរាប (ផ្សារក្រោម) ត្រូវ​បាន​បុគ្គលឯក​ជន​ឈ្មោះ សន នី យក​ធ្វើ​ជា​ផ្សារជួល​អោយ​អាជីវករ​លក់​ដូរ និង​ដាក់​ផ្ញើរ​ឡានម៉ូតូ បង្ករការ​កកស្ទះចរាចរណ៍ ពេញ​ផ្លូវ ដោយ​គ្មាន​ការ​អើពើរ​​ពី​អាជ្ញាធរសមត្ថកិច្ចណា​ម្នាក់​ឡើយ។

ពលរដ្ឋ​នៅ​ទីនោះ និង​អ្នក​ធ្វើ​ដំណើរ​ឆ្លង​កាត់ទីនោះបាន​ធ្វើ​ការ​រិះ​គន់ថា មិន​សម​យក​ដី​សួន​ច្បារ និង​ផ្លូវ​សាធារណះមក​ធ្វើ​ជា​ផ្សារឯកជន​បង្ករ​ភាព ​រញេរញៃ កកស្ទះចរាចរណ៍ ចាក់​ទឹក​បង្ហូរ ចោល​​​​សំរាម​ មើល​ទៅ​​មិនសាក​សម​ជាទីក្រុង​ទេសចរណ៍សោះ។ ពលរដ្ឋ​បន្តថា កាលពីអភិបាល​ក្រុង​ចាស់មិន​ព្រម​រៀប​ចំផ្សារ​នេះអោយផុត​ពីដីសួនច្បារ ពួកគាត់​សង្ឃឹម​ថា អភិបាល​ក្រុង​ថ្មី​លោក​​ នួន ពុទ្ធារ៉ា អាច​ដោះស្រាយបាន តែ​ផ្ទុយ​ទៅវិញមួយដំបរ​ និង​បួន មួយ​ណា​ដូច​មួយណា​ ចង់​បាន​តែ​តំណែង តែការងារដូច​ជាមិន​យកចិត្ត​ទុក​ដាក់អីសោះ។

ពលរដ្ឋ​មួយចំនួន​នៅក្រុង​សៀមរាប​ស្នើរសុំអោយ​លោក នួន ពុទ្ធារ៉ា អភិបាលក្រុង​សៀមរាប មេត្តា​រៀប​ចំសណ្តាប់​ធ្នាប់ក្រុង​អោយបានល្អ ជាពិសេសផ្សារក្រោម​ដែលធ្វើរលើ​ដី​សួន​ច្បារ​នេះ​តែ​​ម្តង គួរ​តែ​រើចេញ រៀបចំសួនច្បារសាធារណះ​ដើម្បីលម្អរក្រុង​អោយ​មាន​សោភ័ណភាព ដើម្បី​ទាក់​ទាញភ្ញៀវ​ទេសចរណ៍ជាតិ និង​ភ្ញៀវ​អន្តរជាតិ មកដើរ​លេង​កម្សាន្ត​នៅខេត្តសៀមរាប។

កម្ពុជាសុវណ្ណភូមិ​មិន​ទាន់អាច​សុំ​ការ​ពន្យល់ពីលោក នួន ពុទ្ធារ៉ា ចៅហ្វាយក្រុង​សៀមរាប​បាន​ទេព្រោះគ្មាន​លេខ​ទូរស័ព្ទសម្រាប់ធ្វើការ​ទំនាក់ទំនង។

លោក សន នី ដែលត្រូវ​បាន​គេ​ស្គាល់ថា ជាថៅកែផ្សារក្រោមខាង​លើ​នេះ ពុំអាច​សុំការ​បំភ្លឺបាន​ទេ នៅព្រឹក​ថ្ងៃទី១៣ ខែគុម្ភះ ឆ្នាំ២០១៩នេះ ព្រោះពេលទូរស័ព្ទចូលលឺសម្លេងអ៊ូអ ហើយ​លោក​ឆ្លើយ​​ថា​ស្តាប់មិន​បាន​ ចាំលោក​ខលមកវិញ។

សូមបញ្ជាក់ផងដែរថា រឿងយកដីសួនច្បារ និង​ដីចំណីផ្លូវ​ធ្វើ​ជាផ្សារខាងលើនេះ ធ្លាប់មាន​ការ​ចុះ​ផ្សាយ ធ្វើ​អោយ​ចៅហ្វាយក្រុង​ចាស់រំជើបរំជួល​​ម្តង​ទៅហើយ តែក្រោមមក​ស្ងាត់​ឈឹង​តាំង​ពី​ចៅ​ហ្វាយ​​ក្រុង​ថ្មីឡើយ​កាន់​តំណែង ធ្វើ​អោយមហាជន​មាន​ការ​ងឿង​ឆ្ងល់ ដោយ​មិន​ដឹង​ថា មួល​ហេតុ​​អ្វីបាន​ជាទុកផ្សារ​មួយ​នេះ​អោយ​នៅលើ​ដីសួនច្បារដដែលយ៉ាងដូច្នេះ?៕ ដោយ៖ ផ្លុងរ៉េត