លោក សននី ប្រាប់ថា អ្នកគ្រប់គ្រងផ្សារក្រោមធំជាងគេគឺជាអ្នកផ្សេងមិនមែនរូបលោកទេ

កាលពីរសៀល​ថ្ងៃទី១៣ ខែគុម្ភៈ ឆ្នាំ២០១៩ម្សិលមិញ លោក សននី អ្នក​គ្រប់​គ្រង​​​ផ្សារក្រោមធ្វើ​លើដីសួនច្បារ និង​ដី​ចំណីផ្លូវ បាន​បដិសេធថា លោកមិន​មែន​ជាអ្នក​គ្រប់​គ្រង​ធំនៅផ្សារ​នេះទេ គាត់​គ្រាន់តែ​ជាមេការរង​តែ​ប៉ុណ្ណោះ ឯមេធំដែលគ្រប់គ្រង​ផ្សារនេះគឺលោក​ ហ៊ុប ថៃ ដែល​ជាអ្នក​គ្រប់គ្រង​ផ្សារលើធំថ្មីក្នុងក្រុង​សៀមរាប​ និង​ផ្សារស្រុកពួកផងដែរ។

លោក សននី បានរៀបរាប់ថា ផ្សារក្រោម​ដែលគេចោទថា ធ្វើ​លើដីសួនច្បារនេះ ដើមឡើយ​ជាផ្សាររបស់គាត់តាំងតែពីឆ្នាំ១៩៨៣មកម្លេះ តែដោយសារអ្នកមានលុយមានអំណាច បាន​ឃុបឃិត​គ្នាធ្វើ​ផ្សារនៅក្បែរនេះ (ផ្សារតាសារ៉ន) បានព្យាយាមរំលាយផ្សាររបស់គាត់ ដើម្បីអោយ​អាជីវ​កររត់ទៅលក់ដូរនៅផ្សារក្រោមថ្មីរបស់គេ។ លោក សននី បន្ថែមថា ដីសួនច្បារវាគ្រាន់តែ​ជាពាក្យ​បន្លាយគេ​តែប៉ុណ្ណោះធាតុ វាមិន​ដែល​មាន​សួន​ច្បារអីនោះទេ តាំង​តែពីដើមរហូតមក។

នៅរសៀលថ្ងៃទី១៤ ខែគុម្ភៈ ឆ្នាំ២០១៩នេះ កាសែតកម្ពុជាសុវណ្ណភូមិ ពុំអាច​សុំការ​បក​ស្រាយ​ពី​លោក​ ហ៊ុប ថៃ អ្នកម៉ៅការផ្សារទាំងបីនេះបានទេ ព្រោះទូរស័ព្ទចូល​ពីរដង​គ្មានអ្នក​លើកទទួល។

សូមរំលឹកផងដែរថា លោក ហ៊ុបថៃ ធ្លាប់មានកាសែតក្នុង​ស្រុកជាច្រើន​ចុះផ្សាយពីរឿងអសកម្ម រឿងអាស្រូវ ដូចជាទឹកស្អុយហូរកាត់ផ្សារលើ សំរាមស្អុកពាសពេញផ្សារ មុខ​ផ្សារលើគ្មានចំណត បណ្តោយអោយរថយន្តចតពេញផ្លូវ បណ្តាលអោយកកស្ទះចរាចរណ៍ អ្នកក្រគ្មានកន្លែងលក់ដូរ អ្នកលក់បន្លែតែមួយកញ្ច្រែង ក៏យកផាស៊ីដែរ…។ល។ មហាជនបានចោទសួរថា បើលោក ហ៊ុបថៃ​ អសមត្ថភាពបែបនេះ ហេតុអ្វីនៅតែអាចឈរឈ្មោះជាអ្នក​ម៉ៅការ​ផ្សារបានរហូតមកដល់​សព្វថ្ងៃនេះ?

យោងតាមការ​ស្រាវ​ជ្រាវ ដើមឡើយ ហ៊ុបថៃ មិន​មែនជាអ្នក​មាន​ស្តុកស្តំអីនោះទេ តែតាំងពីបាន​ម៉ៅការ​គ្រប់គ្រង​ផ្សារលើមក ជីវភាពកាន់តែធូរធា មានបាន រហូត​ជិត​កើត​មហាសេដ្ឋីទៅហើយ នាពេលបច្ចុប្បន្ននេះ។

ប្រភពព័ត៌មានបែកធ្លាយមួយទៀត បានបង្ហើបថា លោក ហ៊ុបថៃ បានចំណាយលុយរាប់​ម៉ឺន​ដុល្លារ​អាមេរិក ក្នុង​មួយខែៗ ដើម្បីទប់តំណែង​របស់ខ្លួន និង​សូកប៉ាន់ដល់ស្ថា​ប័ណ​ពាក់​ព័ន្ធនានា​ដើម្បីបិតមាត់បិតភ្នែកបិត​ត្រចៀក កុំអោយរិះគន់រាល់រឿងអាស្រូវ និង​រឿង​អសកម្មផ្សេងៗ។

ពលរដ្ឋ​និង​អាជីវករមួយចំនួននៅខេត្តសៀមរាប កំពុងរងចំាមើល​ថាតើ លោក នួន ពុទ្ធារ៉ា អភិបាល​ក្រុង​​ថ្មីសម្តីផ្អែម ចាត់ការ​យ៉ាង​ណាចំពោះផ្សារក្រោម​ដែលធ្វើ​លើដីសួនច្បារ? ហើយតើទុកលោក ហ៊ុបថៃ អោយកាន់តំណែងជាអ្នកម៉ៅការ​ផ្សារទាំងបីនេះប៉ុន្មានរយឆ្នាំទៀត?៕ដោយ៖ ផ្លុងរ៉េត