ក្រុមអាជ្ញាធរអប្សរាចុះបំផ្លាញដំណាំប្រជាពលរដ្ឋជាច្រើនដង

ក្រុម​អាជ្ញាធរជាតិអប្សរាមួយក្រុម​ដែលមាន​​គ្នា​ជាងដប់នាក់ ជិះម៉ូតូ២គ្រឿង និងរថ​យន្ត​​១គ្រឿង បាន​ចុះ​ទៅ​កាច់បំបាក់ ធាក់ប្រលំ ដកទាំងឬស ផល​ដំណាំ​ប្រជាពលរដ្ឋ​មានដូច​ជា ដើម​ចេញ​ ដើម​ស្វាយ ​នៅ​ក្នុង​ដី​ចម្ការពលរដ្ឋ ស្ថិត​ក្នុង​ភូមិ​ត្រពាំ​រុណ ឃុំ​អំពិល​ ស្រុក​ប្រាសាទបាគង​ កាល​ពី​ថ្ងៃទី០៥ ខែកញ្ញា ឆ្នាំ២០១៩។

ពលរដ្ឋ​ដែល​ជាម្ចាស់ដី​បានរៀបរាប់ទាំង​អារម្មណ៍អួលអាក់ថា “ខ្ញុំ​មាន​ការ​ឈឺចិត្ត​ណាស់ តែ​មិន​ដឹង​ធ្វើ​យ៉ាង​មេច ព្រោះ​ក្រុម​អាជ្ញាធរ​អប្សរា មួយ​ក្រុម​នេះ​មក​រក​រឿង​រុកគួន​ខ្ញុំ​ច្រើន​ដង​ហើយ ពេល​ពួកគាត់​មក​ម្តងៗ គឺគ្មាន​ផល​ចំនេញ​ទេ មាន​តែ​កាប់​ កាច់ ទាត់ ធាក់​ ប្រលំ ដក​ទាំងឬស ​ផល​ដំ​ណាំ​របស់​ខ្ញុំ​អោយ​ដួល​រាបដល់ដី”។

បើ​យោងតាម​អនុក្រឹត្យរបស់សម្តេចតេជោ ហ៊ុន សែន នាយក​រដ្ឋ​មន្តី​នៃ​ព្រះរាជាណាចក្រកម្ពុជា ដី​នៅក្នុង​​ឃុំ​អំពិល​ត្រូវ​បាន​កាត់​ចេញ​ពី​តំបន់​អាជ្ញាធរ​អប្សរាហើយ តែ​ក្រុម​អាជ្ញាធរអប្សរា នៅ​តែ​មិន​ព្រម​អនុវត្តតាម​ទាល់តែសោះ នៅ​តែ​ដើរ​រុកគួន​ប្រជាពលរដ្ឋ​ អោយ​រងទុក្ខ​ឥតល្ហែល្ហើយ ធ្វើ​អោយ​ពួកគាត់ទឹក​ភ្នែក​រហេមរហាម ម្តង​ហើយ​ម្តងទៀត។

ប្រជាពលរដ្ឋ​ជាម្ចាស់ដី​ខាងលើ​បាន​លើដៃ​សំពះ​សុំ​អង្វទៅ​សម្តេច​តេជោ ហ៊ុន សែន នាយក​រដ្ឋ​មន្ត្រី​នៃ​ព្រះរាជា​ណាចក្រ​កម្ពុជា ឯកឧត្តម ទៀ សី​ហា អភិបាល​ខេត្តសៀមរាបជួយ​ដោះស្រាយ​ជូន​គាត់​ផង​ និង​សុំ​សំណូម​ពរយ៉ាង​ទទូច​​ទៅ​ ឯកឧត្តម​ ហង្ស ពៅ អគ្គនាយក​អាជ្ញាធរ​អប្សរា មេត្តា កុំ​អោយ​ក្រុម​អាជ្ញាធរអប្សរាមួយ​ក្រុម​នេះ​ទៅ​បំផ្លិចបំផ្លាញ​ផល​ដំ​ណាំ​របស់​ពួក​គាត់​ទៀត ព្រោះ​ទៅ​បំផ្លាញ​ច្រើន​ដង​ហើយ។

កាសែតកម្ពុជាសុវណ្ណភូមិ ​មិន​អាច​សុំ​ការបកស្រាយ​ពី​ឯកឧត្តម ហង្ស ពៅ បាន​ទេ ព្រោះ​គ្មាន​លេ​ខ​ទូរស័ព្ទ​សំ​រាប់​ធ្វើ​ការ​ទំនាក់​ទំនង៕ ដោយ: ផ្លុង រ៉េត