ដើមរាំងទឹក២៦ដើមធំៗត្រូវបានលោកឧកញ៉ាម្នាក់ដកទំាងឬសពីព្រៃលិចទឹកក្បែរបឹងអភិរក្ស

ដើមរាំងទឹក ជាប្រភេទដើមឈើដែលដុះនៅ​តំបន់ព្រៃលិចទឹក​ជុំវិញបឹងទន្លេ​សាប​​​ក្នុង​ប្រទេសកម្ពុជា សម្រាប់ជា​ជម្រកត្រីពងកូន ជម្រកសត្វស្លាបគ្រប់ប្រភេទ និង ជា​រនាំង​បាំង​ខ្យល់​រលកនៅរដូវ​វស្សា តែជាអកុសល្យ ដើមរាំងត្រូវ​បានគេកាប់បំផ្លាញ វាទយកដីព្រៃធ្វើជា​កម្ម​សិទ្ធ​ផ្ទាល់ខ្លួន ហើយ​ពេល​ថ្មីៗនេះ ប្រភពបានបង្ហើប​អោយ​ដឹងថា ដើមរាំងចំនួន​២៦ដើមធំៗ ត្រូវ​បាន​​លោកឧញ៉ាម្នាក់​បញ្ចាអោយគេគាស់ទាំងឬស​យក​ទៅ​ធ្វើ​ជាសម្បត្តិផ្ទាល់ខ្លួន។

កាលពីថ្ងៃទី១៣ ខែគុម្ភៈ ឆ្នាំ២០២០ ប្រភពព័ត៌មាន​ច្បាស់ការបាន​ផ្ញើ​រូបភាព​មក​កម្ពុជា​សុវណ្ណ​ភូមិ​អំពី​ការគាស់ដើមរាំងនៅ​ក្បែរ​តំបន់​​ រហាលប្រា ខាងត្បូងឈៀងខាងកើត បឹងពារាំង ដែល​ជា​តំ​បន់​អភិរក្សព្រៃ​លិច​ទឹកតំបន់​បី ស្ថិតក្នុងសង្កាត់​ជ្រាវ ​ក្រុងសៀមរាប ខេត្តសៀមរាប ហើយប្រភព​បាន​អះអាងថា ដើមរាំង​ចំនួន​២៦ដើមធំៗ ត្រូវ​បានខាងសហគមសង្កាត់ជ្រាវ​ គាស់ទាំង​ឬស ក្នុង​អំឡុងថ្ងៃទី១០ ខែគុម្ភៈ ឆ្នាំ២០២០ ដោយ​ក្រុម​អ្នក​គាស់​ដើម​រាំងខាង​លើនេះ អះអាងថា គាស់​យក​ទៅ​អោយ​លោកឧកញ៉ា សៀង ណាំ ដាំនៅ​ឯសណ្ឋាគាររបស់លោកឧញ៉ា។

នៅ​ព្រឹក​ថ្ងៃទី២៦  ខែគុម្ភៈ ឆ្នាំ២០២០នេះ លោក ក្អោប រ៉ន ចៅសង្កាត់ជ្រាវ​បាន​ប្រាប់ កាសែត​កម្ពុជា​សុវណ្ណភូមិ ​តាម​ទូរស័ព្ទថា ដើម​រាំង​២៦ដើមនោះ​ពិត​ជាលោកឧកញ៉ា សៀង ណាំ ស្នើ​សុំ​គាស់​យក​​ទៅ​ដាំនៅតំបន់​ធារាសាស្ត្រ ក្នុង​បុរី​ទី២របស់លោក នៅឯសង្កាត់​ស្រងែ ក្រុង​សៀម​រាប​ពិប្រា​កដមែន។ លោកចៅសង្កាត់​បាន​ប្រាប់​បន្ថែមថា ដើមឡើយ​លោក​ឧកញ៉ាបាន​សុំ​ពី​លោក​ផ្ទាល់​ តែលោកចៅសង្កាត់​មិន​ហ៊ាន​ផ្តល់​អោយទេ អោយ​លោកឧកញ៉ាសុំពីមន្ត្រីជំនាញពាក់ព័ន្ធ និង ​ថ្នាក់​លើ​របស់​លោកចុះ លុះ​មាន​ការ​អនុញ្ញាតពីសាលាក្រុង និង មន្ត្រីជំនាញទើបលោក​ចៅសង្កាត់ព្រមអោយគាស់ដើម​រាំង​ទាំង​នោះ​។

កម្ពុជាសុវណ្ណភូមិ​ មិន​អាច​សុំការ​ពន្យល់​ពី​លោកឧកញ៉ា សៀង ណាំ បាន​ទេ ព្រោះ​គ្មាន​លេខ​ទូរស័ព្ទ​​សម្រាប់​ធ្វើ​ការ​ទំនាក់​ទំនង ពាក់ព័ន្ធការគាស់​ដើម​រាំងទឹក​ធំៗ​ដែល​មាន​មុខ​កាត់​ទំហុំ​ចាប់​ពី​៤០​សង់ទីម៉ែត្រ(៤តឹក)ឡើងទៅ ចំនួន២៦ដើម នៅតំបន់​ត្រីពងកូនខាង​ត្បូងឈៀងកើត បឹង​ពារាំង​ ដែលជា​បឹង​អភិរក្សជីវចម្រុះ ស្ថិត​ក្នុងសង្កាត់​ជ្រាវ៕ ដោយ៖ ផ្លុង រ៉េត