ព្រៃលិចទឹកពីរហិកតាត្រូវបានគេឃុបឃិតគ្នាកាប់បំផ្លាញក្នុងរយ:ពេលតែបីថ្ងៃ

ព្រៃលិចទឹកតំបន់០៣​សម្រាប់ជម្រក​ត្រី​ពង​កូន​ចំនួន​០២ហិកតា ស្ថិតក្នុងភូមិជ្រាវ សង្កាត់ជ្រាវ ក្រុងសៀមរាប ខាងក្រោមក្រុមហ៊ុនទឹកស្អាតប្រហែលមួយពាន់ម៉ែត្រចន្លោះ​ទំនប់៧៨ និង ទំនប់ប្រហ៊ួត ត្រូវបានគេឃុបឃិតគ្នា​កាប់បំផ្លាញរាបដល់ដីក្នុង​រយ:ពេល​តែ០៣ថ្ងៃ​ប៉ុណ្ណោះ។

កាលពីរសៀលថ្ងៃទី២៥ ខែមីនា ឆ្នាំ២០២១ម្សិលមិញនេះ ខាងមន្ទីរបរិស្ថានខេត្តសៀមរាប ដែលដឹកនាំកម្លាំងដោយលោក ហ៊ីម បានចុះឃាត់ខ្លួនអ្នកកាប់ព្រៃលិចទឹក​ខា​ងលើ​បាន​ចំនួន០៥នាក់រួច​ឲ្យធ្វើកិច្ចសន្យាបញ្ឈប់ សកម្មភាព​​កាប់បំផ្លាញ​ព្រៃ បន្ទាប់មក​បានដោះលែងជន​ទាំង​០៥​រូប​នោះ​ឲ្យមានសេរីភាព​វិញ។

ប្រភពច្បាស់ការណ៍បានប្រាប់ឲ្យដឹងថា ការចុះឃាត់​ខ្លួនអ្នកកាប់ព្រៃលិចទឹកចំនួន០៥នាក់ដោយមន្ត្រីបរិស្ថាននេះ គ្រាន់តែជាឆាកល្ខោនសម្រាប់បិទបាំងអំពើស្អុយរលួយរបស់ខ្លួនតែប៉ុណ្ណោះ។ ប្រភពបានបន្តទៀតថា ការកាប់បំផ្លាញព្រៃលិចទឹកខាងលើនេះ គឺមាន​ការ​ឃុបឃិត​គ្នា​ធ្វើឡើងជា​ប្រព័ន្ធ ដែលមានការឃុបឃិតគ្នាបួនស្ថាប័ន ទី១.ប្រធាន​សហគមន៍ប្រើ​ប្រាស​ទឹក​សង្កាត់ជ្រាវ ទី២.ខាងមន្ត្រី​បរិស្ថាន ទី៣.ខាងមន្ត្រី​ជលផល និង ទី៤.ខាងមន្ត្រី​ធនធានទឹក។

លោកគង់មង្គលប្រធានសហគមន៍ប្រើប្រាស់ទឹកសង្កាត់ជ្រាវ បានប្រាប់ កាសែត​កម្ពុជា​សុវណ្ណភូមិ​តាមទូរស័ព្ទកាល​ពី​ម្សិល​មិញថា ការកាប់បំផ្លាញព្រៃលិចទឹកខាងលើនេះ មិនជាប់ពាក់ព័ន្ធជាមួយនឹងលោកទេ ហើយលោកបានបន្ថែមថា ដីព្រៃដែលកាប់បំផ្លាញនេះ ជារបស់លោក ដៀបសម្បត្តិ ដែលទើបតែលក់ឲ្យគេថ្មីៗនេះ។

ចំណែកឯលោក ដៀប សម្បត្តិ បានបដិសេធថា ដីព្រៃ០២ហិកតាដែលកាប់បំផ្លាញនេះមិនមែនជារបស់លោកទេ លោកគ្មានដីលក់ដូចការចោទប្រកាន់របស់លោកគង់មង្គលនោះឡើយ។ លោក ដៀប សម្បត្តិ បានបន្ថែមថា កន្លងមក​លោក​តែងតែ​ទទួល​រងការ​ស្តីបន្ទោស ទទួល​កំហុស​ជំនួស​គេតែរហូត តែអ្នក​ដែល​ជាមេខ្លោង រួច​ខ្លួន​តែរហូត ពេល​នេះ​លោ​ក​លែងល្ងង់​ទទួល​ថ្មបាក់​ជំនួសគេទៀតហើយ។

ពលរដ្ឋអ្នកបានដឹងហេតុការណ៍នេះបានចោទសួរថា ហេតុអ្វីខាងមន្ត្រីបរិស្ថានដែល​ដឹក​នាំ​កម្លាំង​ចុះ​បង្ក្រាប ការ​កាប់បំផ្លាញ​ព្រៃ​លិច​ទឹក​ខាងលើនេះ មិនឃាត់ខ្លួនអ្នកកាប់ព្រៃទុកមួយ​អន្លើ​សិន​ដើម្បីស្វែងរកអ្នកបញ្ជាពីក្រោយខ្នង? ឬមួយដូចការចោទប្រកាន់របស់ប្រភពខាងលើ ថាការកាប់បំផ្លាញព្រៃលិចទឹក២ហិកតានេះ គឺមានការឃុបឃិតគ្នាជាប្រព័ន្ធ ដែលមាន​ការ​ចូល​រួម​ចំណែក​ពី​មន្ត្រី​បរិស្ថានផងនោះ? ប្រជាពលរដ្ឋល្អៗនៅក្នុងសង្កាត់ជ្រាវ ស្នើសុំទៅស្ថាប័នពាក់ព័ន្ធ តុលាការខេត្តសៀមរាប និងជាពិសេសឯកឧត្តម ទៀសីហា អភិបាលនៃ​គណ​អភិ​បាល​ខេត្តសៀមរាប មេត្តាចាត់វិធានការទៅតាមផ្លូវច្បាប់ ចំពោះបុគ្គល​ដែលពាក់ព័ន្ធក្នុងករណីកាប់បំផ្លាញព្រៃលិចទឹកនៅ​តំបន់​ហាម​ឃាត់​ខាងលើនេះ។

កាសែតកម្ពុជាសុវណ្ណភូមិ ពុំទាន់អាចសុំការបកស្រាយពីប្រធាន​មន្ទីរពាក់ព័ន្ធ០៣​ស្ថាប័ន​ខាងលើបានទេ ព្រោះគ្មានលេខទូរស័ព្ទសំរាប់ធ្វើការទំនាក់ទំនង ពាក់ព័ន្ធការ​ចោទ​ប្រកាន់​ថា ស្ថាប័ន​រដ្ឋ​ទាំង០៣នេះ​មាន​ការ​ឃុបឃិតគ្នាជាប្រព័ន្ធ​ ​ក្នុង​ការ​កាប់បំផ្លាញ​ព្រៃ​លិចទឹកចំនួន​០២ហិកតា​នៅ​ក្នុង​សង្កាត់ជ្រាវ​៕ ដោយ: ផ្លុងរ៉េត