កងទ័ព​ភូមា បន្ត​ទំលាក់​គ្រាប់បែក​ទៅលើ​រដ្ឋការ៉េន ជាប់​ព្រំដែន​ថៃ

ពេញមួយថ្ងៃ២៧ និង ២៨ មេសា កងទ័ពជាតិភូមា បានប្រើយន្តហោះទំលាក់គ្រាប់បែក ជាច្រើនគ្រាប់ ទៅលើរដ្ឋការ៉េន ភាគខាងកើតភូមា ជាប់ព្រំដែនប្រទេសថៃ។ នេះគឺជាការឆ្លើយតប ទៅនឹងសកម្មភាពវាយប្រហារ របស់កងកម្លាំងសម្ព័ន្ធជាតិការ៉េន ដែលបានដុតបំផ្លាញបន្ទាយទាហានកងទ័ពភូមាមួយកន្លែង នៅក្នុងរដ្ឋនេះ។ ប្រជាជនជាច្រើនពាន់នាក់ បានរត់ភៀសខ្លួនទៅខាងទឹកដីថៃ។

លោក Sithichai Jindaluang​ អភិខេត្តមែហុងសន របស់ថៃ ដែលមានព្រំដែនជាប់រដ្ឋការ៉េន របស់ភូមា បានអះអាងប្រាប់អ្នកយក​ព័ត៌មានបារាំងថា យ៉ាងហោចណាស់ មានយន្តហោះ២គ្រឿង របស់កងទ័ពជាតិភូមា បានហោះមកទំលាក់គ្រាប់បែកជាច្រើនគ្រាប់ ទៅលើតំបន់ដែលស្ថិតនៅក្រោមការគ្រប់គ្រង របស់​កងកម្លាំងសម្ព័ន្ធជាតិការ៉េន។ ដោយ​មិន​អាចបញ្ជាក់ អំពីចំនួន​មនុស្សស្លាប់ និងរបួស លោក​អភិបាលខេត្តថៃរូបនេះ បានបន្ថែមថា​សម្លេងកាំភ្លើងលាន់ឮសូរឥតដាច់ តាំងតែពីថ្ងៃទី​២៧មេសាមកម្លេះ​។

សូមរំលឹកថា កាលពីថ្ងៃអង្គារទី​២៧មេសា នៅវេលាព្រឹក​ព្រហាម កងកម្លាំង​សម្ព័ន្ជជាតិការ៉េន​ (KNU) បានវាយដណ្តើមបាន​ និងដុតបំផ្លាញចោល​ បន្ទាយ​ទាហានមួយ​​កន្លែង របស់​កងទ័ពជាតិភូមា។ កងទ័ពជាតិភូមា បាន​ប្រកាស ធ្វើការវាយ​បកវិញ នៅក្នុងថ្ងៃដដែលនោះ។ ដោយសារតែការបាញ់រះ និងការ​ទំលាក់គ្រាប់បែក ប្រជាជន​ជាច្រើនពាន់នាក់ បានរត់ភៀសខ្លួនទៅខាងទឹកដីថៃ។ អាជ្ញាធររដ្ឋាភិបាលថៃ បានអះអាងថា គឺមិន​លូកដៃ គាំទ្រភាគីខាងណាមួយឡើយ។ ក៏ប៉ុន្តែរដ្ឋាភិបាលថៃ បានត្រៀមជួយ​ផ្នែកមនុស្សធម៌ ប្រសិនបើចាំបាច់។ ទឹកដីថៃធ្លាប់បានទទួលជនភៀសខ្លួនការ៉េន ជាច្រើនម៉ឺននាក់រួចទៅហើយ នៅក្នុងសម័យ​របបផ្តាច់ការយោធាភូមា កាលពីជំនាន់មុន។

សូមរំលឹកថា កាលពីចុងខែមីនា កងកម្លាំង​សម្ព័ន្ធជាតិការ៉េន បាន​វាយកម្ទេច​​បន្ទាយកងទ័ពជាតិភូមាមួយ​កន្លែងរួចហើយ និងបានសម្លាប់ទាហានភូមា១០នាក់។ ជាការឆ្លើយតប កងទ័ពជាតិភូមា ក៏បានទំលាក់គ្រាប់បែកលើភូមិជនជាតិការ៉េន ហើយ​បានបណ្តាលឲ្យ​មនុស្ស​ប្រមាណ​២៤០០០នាក់ ត្រូវភៀសខ្លួនចេញពីផ្ទះសម្បែង។

ដោយឡែក ក្រៅពី​ក្រុមសម្ព័ន្ធជាតិការ៉េន ដែល​បាន​ផ្ទុះអាវុធ ជាមួយ​កងទ័ពជាតិភូមា កងកម្លាំងដើម្បីឯករាជ្យរដ្ឋកាឈីន នៅភាគខាងជើងឯណោះ ក៏បាន​ចាប់ផ្តើ​មចេញប្រយុទ្ធ តទល់ជាមួយ​កងទ័ពជាតិភូមាដែរ។ លោក Naw Bu អ្នកនាំពាក្យ​របស់​កងកម្លាំង​ដើម្បីឯករាជ្យ​រដ្ឋកាឈីន (KIA) បានអះអាងប្រាប់អ្នកយកព័ត៌មានបារាំង នៅថ្ងៃពុធទី ២៨មេសាថា ការផ្ទុះអាវុធរវាងកងទ័ពទាំង២ បានបណ្តាលឲ្យ​មាន​ទាហានរបួសទាំងសងខាង តែមិនបានប្រាប់ចំនួនទេ។

សូមបញ្ជាក់ថា ក្រោយ​ពេល​កងទ័ពជាតិភូមា បាន​ធ្វើរដ្ឋប្រហារដណ្តើមអំណាចពីរដ្ឋាភិបាលលោកស្រីអ៊ុងសាន ស៊ូជី ក្រុមកងកម្លាំងជនជាតិភាគតិចជាច្រើនក្រុម បានប្រកាសប្រឆាំង ហើយ​បានសន្យាថានឹងកាន់អាវុធចូលប្រយុទ្ធ ដើម្បីជួយ​ប្រជាជនភូមា។ ភ្លើងសង្គ្រាមស៊ីវីល ដែលគេបារម្ភខ្លាចថានឹងឆាបឆេះនោះ គឺពេលនេះបានចាប់ផ្តើមឆេះទៅ​ហើយ៕

ប្រភពព័ត៌មានៈ RFI