លោក ស៊ត់-សៃ មេប៉ុស្តិ៍នគរបាលរដ្ឋបាលសង្កាត់ជ្រាវ ក្រុងសៀមរាប បានបដិសេធន៍ជាច្រើនដង មិនធ្វើលិខិតបញ្ជាក់កិរិយាមាយាទឱ្យពលរដ្ឋម្នាក់រស់នៅក្នុងភូមិជ្រាវ សង្កាត់ជ្រាវ ដោយលោកបានអះអាងថា ”ឱ្យតែពួកជាប់គុគ ឬ ចេញពីគុគ លោកមិនអាចធ្វើលិខិតបញ្ជាក់កិរិយាមាយាទឱ្យបានទេ“។
ពាក់ព័ន្ធករណីខាងលើនេះ លោក សៀ-ឆៃណា ពលរដ្ឋម្នាក់រស់នៅក្នុងភូមិជ្រាវ សង្កាត់ជ្រាវ ក្រុងសៀមរាប បានប្រាប់អ្នកយកព័ត៌មានយើងនៅរសៀលថ្ងៃទី២៩ ខែមិថុនា ឆ្នាំ២០២១នេះថា ”ខ្ញុំបានទៅដាក់ពាក្យសុំទៅលោក ស៊ត់-សៃ មេប៉ុស្តិ៍សង្កាត់ជ្រាវឱ្យជួយបញ្ជាក់កិរិយាមាយាទឱ្យខ្ញុំជាច្រើនដងមិនបាន រហូតដល់ខ្ញុំសុំឱ្យលោកមេធាវីរបស់ខ្ញុំធ្វើលិខិតបញ្ជាក់ថា ខ្លួនខ្ញុំគ្រាន់តែជាជនសង្ស័យពុំមែនជាពិរុទ្ធជនទេ តែទោះជាយ៉ាងណាក៏លោកមេប៉ុស្តិ៍រូបនេះនៅតែនិយាយពាក្យដដែលៗថា ”ឱ្យតែពួកអាជាប់គុគ ឬ ចេញពីគុគ លោកមិនអាចធ្វើលិខិតបញ្ជាក់កិរិយាមាយាទឱ្យបានទេ“។ លោក សៀ-ឆៃណា បានបន្ថែមថា កាលពីកន្លះឆ្នាំមុនលោកបានធ្វើជ្រុះអត្តសញ្ញាណប័ណ្ណសញ្ជាតិខ្មែរ ហើយលោកបានទៅដាក់ពាក្យបណ្តឹងនៅប៉ុស្តិ៍នគរបាលសង្កាត់ជ្រាវដដែល តែក៏ត្រូវលោកមេប៉ុស្តិ៍រូបនេះបដិសេធមិនព្រមទទួលពាក្យបណ្តឹងរបស់លោក ហើយប្រាប់មកលោកវិញថា ទៅប្តឹងនៅឯសាលាក្រុងទៅ ខាងប៉ុស្តិ៍គ្មានទទួលនាទីទទួលពាក្យបណ្តឹងទេ។
នៅរសៀលដដែលនេះលោក ស៊ត់-សៃ មេប៉ុស្តិ៍នគរបាលរដ្ឋបាលសង្កាត់ជ្រាវ បានប្រាប់កាសែតកម្ពុជាសុវណ្ណភូមិតាមទូរស័ព្ទថា ”ឱ្យតែពួកជាប់គុគ ឬ ចេញពីគុគ ខ្ញុំមិនអាចធ្វើលិខិតបញ្ជាក់កិរិយាមាយាទឱ្យបានទេ នៅប៉ុស្តិ៍ណាក៏គេមិនធ្វើឱ្យដែរ“។
លោក ដា-ចំរើន អធិការនគរបាលក្រុងសៀមរាបបានប្រាប់តាមទូរស័ព្ទនៅរសៀលដដែលនេះថា ”ប្រហែលជាលោកមេប៉ុស្តិ៍ ស៊ត់-សៃ គាត់មិនយល់ ចាំខ្ញុំប្រាប់ទៅគាត់ឱ្យធ្វើឱ្យ“។
លោក ស៊ុត-ជារាម មេធាវីរបស់លោក សៀ-ឆៃណា បានប្រាប់តាមទូរព័ព្ទនៅរសៀលនេះផងដែរថា ”ខ្ញុំបានសរសេរលិខិតបញ្ជាក់មួយច្បាប់ឱ្យលោក សៀ-ឆៃណា ភ្ជាប់ជាមួយឯកសារផ្សេងៗ ដាក់ទៅប៉ុស្តិ៍នគរបាលរដ្ឋបាលសង្កាត់ជ្រាវ ដើម្បីសុំធ្វើលិខិតបញ្ជាក់កិរិយាមាយាទ តែបើខាងមេប៉ុស្តិ៍នគរបាលសង្កាត់ជ្រាវនៅតែមិនព្រមធ្វើឱ្យទៀត ខ្ញុំក៏មិនយល់ពីកិច្ចការងាររបស់គាត់ដែរ តែខ្ញុំគ្រាប់តែចង់បញ្ជាក់តាមផ្លូវច្បាប់ថាលោក សៀ-ឆៃណា ពុំមែនជាជនមានទោស ឬ ពិរុទ្ធជន នោះទេ គាត់គ្រាន់តែជាជនសង្ស័យដែលធានាក្រៅឃុំតែប៉ុណ្ណោះ ទោះជាក្រសួងយុត្តិធម៌ក៏គេបញ្ជាក់កិរិយាមាយាទឱ្យដែររឿងប៉ុណ្ណឹង“។
សូមបញ្ជាក់ផងដែរថា កាលពីថ្ងៃទី១៤ ខែមេសា ឆ្នាំ២០២១ លោក សៀ-ឆៃណា និង លោក សារឹម-វណ្ណថន ស្រវឹងស្រាអស់សាច់ក្លែងបែកគំនិតគិតខ្លីខ្ចីម៉ាស៊ីឆកត្រីពីម្ចាស់ផ្ទះផឹកស៊ីជាមួយគ្នា យកទៅឆកត្រីតាមប្រឡាយបានត្រីក្រាញ់បួនប្រាំក្បាល ហើយក៏ត្រូវបានមេប៉ុស្តិ៍នគរបាលសង្កាត់ជ្រាវចាប់បញ្ជូនខ្លួនឱ្យទៅមន្ត្រីជលផល កសាងសំណុំរឿងបញ្ជូនទៅតុលការ ជាប់ឃុំអស់រយ:ពេល១៧ថ្ងៃ ពីបទនេសាទដោយប្រើម៉ាស៊ីនខុសច្បាប់ តែត្រូវបានលោកមេធាវី ស៊ត ធារាម ធានាឱ្យនៅក្រៅឃុំជាបណ្តោះអាសន្ន។
សូរំលឹកផងដែរថា នៅសង្កាត់ជ្រាវនេះ មានអ្នករកស៊ីឆក់ត្រីជាអាជីពជាច្រើននាក់ ត្រូវបានកម្លាំងនគរបាលសង្កាត់ជ្រាវឃាត់ឃ្លួនបានជាញឹកញាប់ តែលោក ស៊ត-សៃ មេប៉ុស្តិ៍រូបនេះពុំដែលបញ្ជូនខ្លួនជនទាំងនោះឱ្យទៅជាប់គុគដូចលោក សៀ-ឆៃណា និង លោក សារឹម-វណ្ណថន នោះទេ គ្រាន់តែធ្វើកិច្ចសន្យាណែនាំ ឬ ផាកពិន័យតិចតួចតែប៉ុណ្ណោះ អភ័ព្វអ្វីតែបុគ្គលពីររូបនេះ ជាប់គុគអស់រយ:ពេល១៧ថ្ងៃ គ្រាន់តែស្រវឹងស្រាបាត់បង់ស្មារតី ទៅឆក់ត្រីយកមកក្លែមស្រា ដែលមិនមែនជាអ្នកអាជីពអ្នកឆកត្រីដូចគេនោះទេ។
លោក សៀ-ឆៃណា សំនូមពរទៅលោក ដា-ចំរើន អធិការនគរបាលក្រុងសៀមរាប ឯកឧត្តម ទិត្យ-ណារ៉ុង ស្នងការនគរបាលខេត្តសៀមរាប លោក នួន-ពុទ្ធារ៉ា អភិបាលក្រុងសៀមរាប និងជាពិសេស ឯកឧត្តម ទៀ-សីហា អភិបាលគណអភិបាលខេត្តសៀមរាប មេត្តាផ្តល់ភាពយុត្តិធម៌ដល់រូបលោកជាពលរដ្ឋម្នាក់ក្នុងខេត្តសៀមរាបនេះផង ហើយសូមថ្នាក់ដឹកនាំពាក់ព័ន្ធគ្រប់ជាន់ថ្នាក់មេត្តាជួយណែនាំលោកមេប៉ុស្តិ៍រូបនេះឱ្យចេះស្រលាញ់រាស្ត្រឱ្យបានស្មើៗគ្នាផង៕ ដោយ៖ ផ្លុងរ៉េត
.png)
.png)
.jpg)
.jpg)
.jpg)
.png)
.jpg)
.jpg)
.jpg)
