បំភ្លឺ: ពាក្យថាអ្នកជាប់គុគឬចេញពីគុគមិនធ្វើលិខិតបញ្ជាក់កិរិយាមាយាទគឺជាការយល់ច្រឡំ

នៅព្រឹកថ្ងៃទី០៧ ខែកក្កដា ឆ្នាំ២០២១នេះ លោកវីរសេនីយ៍ទោ ឃឹម ផល្លា អធិការរងនៃអធិការនគរបាល​ក្រុងសៀមរាប បានចុះមកដល់ប៉ុស្តិ៍នគរបាលសង្កាត់ជ្រាវ ក្នុងការសម្របសម្រួលចេញលិខិតបញ្ជាក់កិរិយាមាយាទជូនលោក សៀ ឆៃណា ដែលជា​ពលរដ្ឋរស់នៅ​ក្នុង​សង្កាត់​ជ្រាវរួចរាល់ហើយ ដែលមានការចូលរួមពីលោក ស៊ត់ សៃ មេប៉ុស្តិ៍សង្កាត់ជ្រាវ ​លោក ស៊ុត ជារាម មេធាវីរបស់លោកសៀឆៃ និងលោក សៀ ឆៃណាផងដែរ។

លោកវីរសេនីយ៍ទោ ឃឹម ផល្លា បានប្រាប់តាមទូរស័ព្ទនៅព្រឹកនេះថា អ្វីៗគឺជាការយល់ច្រឡំ ដោយភាគី​សង​ខាង​ស្តាប់​គ្នាមិនបាន និយាយ​ម្ខាងម្នាក់។ លោកបន្តថា ខាងលោក​មេប៉ុស្តិ៍ជ្រាវ និយាយថា អ្នក​ជាប់​គុគឬចេញពីគុគ​មិន​អាចចេញ​លិខិត​បញ្ជាក់​កិរិយា​មាយាទឱ្យបានទេ ​ព្រោះ​លោក​បាន​ឃើញ​លិខិត​មួយរបស់​តុលាការដាក់​​ឱ្យលោក​ សៀ ឆៃណា នៅ​ក្រៅ​ឃុំស្ថិតក្រោម​ការ​ត្រួតពិនិត្យ​របស់​តុលាការ ហើយ​គិត​ថា លោក សៀ ឆៃណា ត្រូវ​បាន​តុលាការកាត់ទោសហើយក្លាយ​ជាទណ្ឌិត ហើយធានាក្រៅ​ឃុំ ម្យ៉ាង​ទៀតលោក សៀ ឆៃណា និងលោក មេធាវី ស៊ុត ជារាម យល់ថាលិខិតនេះជាលិខិតថ្កោលទោស មនុស្ស​ពុំមានទោសហេតុអ្វីចេញលិខិតនេះមិនបាន។ លោកវីរសេនីយ៍ទោ ឃឹម ផល្លា បាន​បន្ថែមថា លិខិត​នេះជាលិខិតបញ្ជាក់កិរិយាមាយាទមិន​មែន​លិខិតថ្កោលទោស​ដូចធ្វើ​នៅ​ក្រសួង​យុត្តិធម៌នោះទេ ហើយលិខិតនេះប៉ុស្តិ៍អាចចេញឱ្យបាន តែត្រូវ​សរសេរបញ្ជាក់ទៅតាមសាច់រឿង​ដែល​កើត​មានកន្លង​មក។ លោកវីរសេនីយ៍ទោ ឃឹម ផល្លា បាន​បន្ថែមជាចុងក្រោយថា សុំខាងកាសែត កម្ពុជាសុវណ្ណភូមិជួយចុះផ្សាយបកស្រាយផងជៀសវាង​មាន​ការយល់ច្រឡំដាក់គ្នាទៅវិញ​ទៅមក ហើយជៀសវាង​មហាជនមានការយល់ច្រឡំផងដែរ។

លោកមេធាវី ស៊ុត ជារាម បានប្រាប់តាម​ទូរស័ព្ទនៅព្រឹក​ថ្ងៃ០៧ដដែល​នេះថា លោកក៏មានការ​ភាន់​ច្រឡំដែរ ស្មាន​ថាលោក សៀ ឆៃណា ទៅសុំឱ្យលោក​​មេប៉ុស្តិ៍សង្កាត់ជ្រាវ​ធ្វើ​លិខិតថ្កោលទោស ទើប​លោក ធ្លាប់​បាន​និយាយថា មនុស្ស​ពុំទាន់មានទោស ដោយ​ពុំទាន់មានការ​ប្រកាសសាលក្រម​សម្រេច​ឱ្យ​ជាប់ទោស ហេតុអ្វីធ្វើ​លិខិត​ថ្កោលទោសមិនបាន សូម្បីតែនៅក្រសួងយុត្តិធម៌ក៏គេចេញ​ឱ្យដែរ។ លោកមេធាវី ស៊ុត ជារាម បានបន្ថែមថា ទើបតែព្រឹកនេះលោក​បាន​មក​ស្តាប់ការពន្យល់​របស់លោក លោកវីរសេនីយ៍ទោ ឃឹម ផល្លា ទើបបានយល់សាច់រឿង កន្លងមក​ស្តាប់តែខាងកូនក្តីរបស់​លោក គឺលោក សៀ ឆៃណា។ លោកមេធាវី ស៊ុត ជារាម បាន​បន្ថែមទៀតថា អ្វីៗវាបាន​បញ្ចប់ទៅហើយ ឯខាងលោក ស៊ត់ សៃ ក៏បានចេញលិខិតបញ្ជាក់កិរិយាមាយាទ​ឱ្យលោក សៀ ឆៃណា ហើយដែរ ចុងក្រោយ​អ្វីៗត្រូវបានបញ្ចប់ដោយដាក់បញ្ហាលើតុរកផ្លូវដោះស្រាយរួមគ្នា។

លោក សៀ ឆៃណា ពលរដ្ឋរស់នៅក្នុងភូមិជ្រាវ សង្កាត់ជ្រាវ ក្រុងសៀមរាម បានថ្លែអំណរគុណ​ដល់លោកវីរសេនីយ៍ទោ ឃឹម ផល្លា អធិការរងនៃអធិការដ្ឋាននគរបាល​ក្រុងសៀមរាប លោក ស៊ត់ សៃ មេប៉ុស្តិ៍នគរបាលសង្កាត់ជ្រាវ និងលោក មេធាវី ស៊ុត ជារាម ដែល​បាន​សហការគ្នាជួយ​រក​នីតិវិធីក្នុងការធ្វើ​លិខិត​បញ្ជាក់កិរិយា​មាយាទ​ឱ្យលោក​បាន​ដូច​សេចក្តីប្រាថ្នា។ លោក សៀ ឆៃណា​ ក៏សូមថ្លែងអំណរគុណផងដែរដល់​ថ្នាក់​ដឹក​នាំទាំង​អស់​នៅ​ក្នុងខេត្តសៀមរាបនេះ ជាពិសេស ឯកឧត្តម ទៀ សីហា អភិបាលគណអភិបាលខេត្តសៀមរាប ឯឧត្តម​ ទិត្យ ណារ៉ុង ស្នងការនគរបាលល​ខេត្តសៀមរាប លោក នួន ពុទ្ធារ៉ា អភិបាលគណអភិបាលក្រុងសៀមរាប និងលោក ដា ចំរើន អធិការនគរបាលក្រុងសៀមរាប៕ ដោយ៖ ផ្លុងរ៉េត

ខាងក្រោមនេះ គឺជាអត្ថបទដែលបានចុះផ្សាយកាលពីល្ងាចថ្ងៃទី២៩ ខែមិថុនា ឆ្នាំ២០២១ ដែល​មានចំណងជើងថា ”មេប៉ុស្តិ៍សង្កាត់ជ្រាវថា៖ ឱ្យតែពួកអាចេញពីគុគ ឬ ធ្លាប់ជាប់គុគ មិន​អាច​ធ្វើ​លិខិត​បញ្ជាក់កិរិយាមាយាទ​ឱ្យបានទេ“ ចុចលើតំណ(Link)ខាងក្រោម!