ពិធីសម្ភោធន៍ការិយាល័យគណៈគ្រូពេទ្យ

នៅរសៀលថ្ងៃទី២៧ ខែនិនា ឆ្នាំ២០២២ ម្សិលមិញនេះ ការិយាល័យរបស់គណៈគ្រូពេទ្យ ត្រូវ​បាន​បើកសម្ភោធន៍​ដាក់ឱ្យប្រើប្រាសជាផ្លូវការស្ថិតក្នុង ភូមិចន្លោង​ សង្កាត់ស្រង៉ែ ក្រុង-ខេត្តសៀមរាប ក្រោមអធិបតីភាព​​ឯកឧត្តម ពិន ប្រាកដ អភិបាលរងនៃគណៈអភិបាល​ខេត្តសៀមរាប​ រួមជាមួយភ្ញៀវកិត្តិយស និងមន្រ្តីរាជការសាធារណៈជាច្រើនស្ថាប័នផងដែរ។

លោកវេជ្ជបណ្ឌិត អ៊ុយ ចាន់ថុល ប្រធានគណៈគ្រូពេទ្យ​ខេត្តសៀមរាបបានមាន​ប្ររសាសន៍​ប្រាប់​កាសែត កម្ពុជាសុវណ្ណភូមិថា នៅខេត្តសៀមរាបមានសមាជិកក្រុម​ប្រឹក្សាគណៈគ្រូពេទ្យចំនួន១១​រូប និងគណៈគ្រូពេទ្យជាង៦រយរូប ហើយថវិការចំនួន​ជាង៦ម៉ឺន​ដុល្លារអាមេរិក​​​ដែល​បាន​ចំណាយទិញផ្ទះល្វែង ចំនួន២ល្វែង​ធ្វើ​ជាការិយាល័យនេះគឺកើតចេញពីការរួមសាមគ្គីរបស់​សមាជិក​គណៈគ្រូពេទ្យខេត្ត​សៀមរាបទាំងអស់គ្នា រួមជាមួយគណនីយភាព តម្លាភាព ហើយជាលើកដំបូងនៅក្នុងព្រះរាជាណាចក្រកម្ពុជា ដែល​ក្រុម​គណៈគ្រូពេទ្យ​មាន​ការិយាល័យផ្ទាល់ខ្លួន​បែបនេះ។ លោកវេជ្ជបណ្ឌិតបានបន្តទៀតថា សមិទ្ធិផលនេះនឹង​រក្សាដល់មនុស្ស​ជំនាន់ក្រោយ​ អ្នក​បន្តវេន មានកន្លែងធ្វើការសមរម្យ នឹងឱ្យសមទៅនឹងតម្លៃកេរត្តិ៍ឈ្មោះ កិត្តិយសជាគ្រូពេទ្យ ព្រោះមិនមានអ្វីអមតទេ មុខតំណែងតួនាទីមិន​មានប្លង់រឹងទេ មានតែអំពើល្អទេ​ដែល​រក្សា​កេរ្តិ៍ឈ្មោះបានយូរអង្វែង។ លោកវេជ្ជបណ្ឌិត អ៊ុយ ចាន់ថុល ប្រធានគណៈគ្រូពេទ្យ​ខេត្តសៀមរាប បាន​បន្ថែមថា ពិធីជុបលៀងក្រោយ​ពេល​​សម្ភោធន៍ល្ងាចនេះ ថវិការដែលចំណាយ​គឺបានមក​ពីសប្បុរសជន​ទាំងអស់ អ្នកខ្លះជួយជាថវិការ អ្នក​ខ្លះទឹកសុទ្ធ អ្នក​ខ្លះស្រាបៀរ ហើយលោកវេជ្ជបណ្ឌិតក៏សូមថ្លែងអំណរគុណចំពោះវត្តមានដ៏ខ្ពស់ខ្ពស់របស់គណអធិបតី ភ្ញៀវ​កិត្តិយសដែលបាន​ចូររួម និងសប្បុរសជនជិតឆ្ងាយដែលបានជួយឧបត្ថមដល់កម្មវិធីទាំងមូល។

គេសង្កេតឃើញថា កន្លងមក​នៅពេលក្រុម​គ្រូពេទ្យ​មាន​បញ្ហាអ្វីមួយប៉ះពាល់ដល់អាយុជីវិត​មនុស្ស​ តែងតែមានកម្លាំងមន្ត្រីនគរបាលយុត្តិធម៌ ឬកងរាជអាវុហត្ថ មក​នាំ​ខ្លួន​គ្រូពេទ្យ​ដោយ​មិន​មាន​ជូនដំណឹងដល់ប្រធាន​ស្ថាប័នរបស់គ្រូពេទ្យឡើយ។ ថ្មីៗនេះរាជរដ្ឋាភិបាលកម្ពុជា ​បាន​ចេញព្រះរាជក្រឹត្យ​ និងសេចក្តីជូនដំណឹងរបស់គណៈគ្រូពេទ្យជាតិ ស្តីពីនីតិវិធីចាប់ខ្លួនគ្រូពេទ្យ ត្រូវមាន​វត្តមានគណៈគ្រូពេទ្យជាចាំបាច់។

យោងតាម មាត្រា១៧ នៃច្បាប់ស្តីពីការគ្រប់គ្រងអ្នក​ប្រកបវិជ្ជាជីវៈ​វិស័យសុខាភិបាល ចែងថា ”រាល់ការវិនិច្ឆ័យ និងនីតិវិធីរបស់តុលាការ ឬស្ថាប័នមានសមត្ថកិច្ចផ្សែងៗ ពាកក់ព័ន្ទនឹងការ​ប្រព្រឹត្តរបស់អ្នក​ប្រកបរបរវិជ្ជាជីវៈសុខាភិបាល ចាំបាច់ត្រូវមានការចូលរួមពីគណៈវិជ្ជាជីវៈសុខា​ភិបាលដែលពាក់ព័ន្ធ“៕ ដោយ៖ ផ្លុងរ៉េត