អតីតតារា K-Pop ៥​រូប​លា​ឈប់​ពី​ជីវិត​តារា​មក​រស់​នៅ​សាមញ្ញធម្មតា

ការក្លាយជាតារា K-Pop មិនមែនមានងាយស្រួលទាំងអស់នោះទេ ព្រោះជីវិតរវល់នឹងការងារច្រើនសឹងតែគ្មានពេលទំនេរ ឯជីវិតផ្ទាល់ខ្លួនត្រូវមានអ្នកឃ្លាំមើល តាមដានមិនលស់ថ្ងៃ ជាពិសេសប្រសិនជាមានទំនាក់ទំនងស្នេហាទៀតសោត មិនមានភាពឯកជនឡើយ ។ ដោយ​សារ​តែ​ហេតុផល​នេះ និង​ហេតុផល​ផ្សេង​ទៀត តារា​ចម្រៀង​ខាងក្រោមនេះបានសម្រេចចិត្តឈប់ពីជីវិតជាតារា ហើយសម្រេចចិត្តរស់នៅសាមញ្ញធម្មតាវិញ។

១. Sunye អតីតក្រុម Wonder Girls 

អតីតតារាចម្រៀងរូបនេះបានបង្ហាញខ្លួនជាលើកដំបូងជាសមាជិកក្រុម Wonder Girls ក្នុងឆ្នាំ២០០៧  រហូតដល់ឆ្នាំ១០១៥ ទើបនាងសម្រេចចិត្តចេញពីក្រុម។ ត្រលប់ទៅឆ្នាំ ២០១៣ Sunye បានក្លាយជាតារាស្រីដំបូងគេដែលបានរៀបការខណៈពេលដែលនៅតែបន្តសកម្មភាពផ្សព្វផ្សាយក្នុងក្រុមនៅឡើយ។ ប៉ុន្តែដោយសារតែមានរឿងចម្រូងចម្រាស់ជុំវិញអាពាហ៍ពិពាហ៍ និងការមានផ្ទៃពោះរបស់នាង Sunye បានប្រកាសចូលនិវត្តន៍ក្នុងឆ្នាំ២០១៤ ដើម្បីផ្តោតលើការងារផ្សព្វផ្សាយសាសនា និងរស់នៅក្រៅប្រទេស។

២. G.O អតីតក្រុម MBLAQ

ក្នុងឆ្នាំ២០០៩ G.O បានបង្ហាញខ្លួនជាលើកដំបូងជាសមាជិកក្រុម MBLAQ ។ ភ្ជាប់ជាមួយគ្នានេះ G.O មិនដែលបានបញ្ជាក់ច្បាស់ពីមូលហេតុចាកចេញពីក្រុមឡើយខណៈក្រុមមិនទាន់រំសាយនៅឡើយ។ ងាកចេញពីជីវិតជាតារា លោកបានប្រើជីវិតធម្មតាដោយមានឆាណែលយូធូបផ្ទាល់ខ្លួន និងរីករាយជីវិតអាពាហ៍ពិពាហ៍របស់លោក និងតារាសម្តែង Choi Ye-seul ដែលបានរៀបការក្នុងឆ្នាំ២០១៩។ 

៣. Eunjin អតីតក្រុម DIA 

Eunjin បានចាកចេញពី DIA កាលពីខែឧសភា ឆ្នាំ២០១៨ តាមរយៈសំបុត្រសរសេរដោយដៃផ្ទាល់។ នៅក្នុងសំបុត្រ Eunjin បញ្ជាក់ថានាងមានអារម្មណ៍មិនល្អតាំងពីឆ្នាំ ២០១៧ ហើយបានបង្ហាញពីបំណងចង់ចាកចេញពីក្រុមទៅរស់នៅជាមួយជីវិតដែលមិនមែនជាតារា។ ទោះបីជាចាកចេញពីក្រុមក៏ដោយ Eunjin នៅតែមានសកម្មនៅលើប្រព័ន្ធផ្សព្វផ្សាយសង្គមរបស់នាងដើម្បីមានទំនាក់ទំនងជាមួយអ្នកគាំទ្រ។

៤. Yulhee អតីតក្រុម ​LABOUM

អតីតតារា K-pop រូបនេះបានបង្ហាញខ្លួនក្នុងក្រុម LABOUM ក្នុងឆ្នាំ២០១៤ រហូតចាកចេញពីក្រុមក្នុងឆ្នាំ២០១៧។ ការចាកចេញរបស់នាងបានកើតឡើងបន្ទាប់ពីពាក្យចចាមអារ៉ាមថានាងទាក់ទងស្នេហាជាមួយ Minhwan សមាជិក FTISLAND ដែលត្រូវបានបញ្ជាក់ថាជាការពិត។ តាម​រយៈ​ផលិតកម្មរបស់នាងបានឱ្យដឹងថា នាង​មិន​មាន​បំណង​វិល​ចូល​វិស័យ​កម្សាន្ត​នោះ​ទេ។

នៅខែមករា ឆ្នាំ២០១៨  Minhwan បានប្រកាសភ្ជាប់ពាក្យជាមួយ Yulhee ហើយរៀបការជាមួយគ្នានៅខែតុលា ឆ្នាំដដែល។ នៅក្នុងខែឧសភា ឆ្នាំ២០១៨ Yulhee បានស្វាគមន៍កូនដំបូងរបស់នាង ហើយនៅក្នុងខែកុម្ភៈ ឆ្នាំ២០២០  នាងបានស្វាគមន៍កូនស្រីភ្លោះទៀត។ 

៥. Kyla អតីតក្រុម PRISTIN

Kyla បានបង្ហាញខ្លួនលើកដំបូងជាមួយក្រុម PRISTIN ក្នុងខែមីនា ឆ្នាំ ២០១៧ ក្នុងនាមជាសមាជិកក្មេងជាងគេរបស់ក្រុម។ បន្ទាប់ពីការរំសាយក្រុមក្នុងខែឧសភា ឆ្នាំ២០១៩ Kyla បានសម្រេចចិត្តមិនបន្តអាជីពទោលក្នុងឧស្សាហកម្មកម្សាន្តឡើយ។ ផ្ទុយទៅវិញ នាងបានផ្លាស់ទៅស្រុកកំណើតនៅសហរដ្ឋអាម៉េរិកវិញ ដើម្បីបន្តការសិក្សាផ្នែកចិត្តវិទ្យា។

ក្រៅ​ពី​ការ​សិក្សា​របស់​នាង Kyla ក៏​ត្រូវ​បាន​គេ​ប្រទះ​ឃើញ​ធ្វើ​ការ​នៅ​សួន​កម្សាន្ត​មួយកន្លែង និងមានឆាណែលយូធូបផ្ទាល់ខ្លួនផងដែរ៕ 

ប្រភព៖ SBM News